နောက်ဆုံးရ သတင်း
အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးဆောင် ကော်မတီ၏ ခွင့်ပြုချက်ဖြင့် Chin Dwin Shan Construction Co., Ltd. မှ တင်သွင်းလာသော တရုတ်နိုင်ငံထုတ် Faw Toyota bZ4X အမျိုးအစား လျှပ်စစ်သုံးမော်တော်ယာဉ်များ၊ Unitrust Enterprise Group Co., Ltd. မှ တင်သွင်းလာသော တရုတ်နိုင်ငံထုတ် Aiqar iCar 03 အမျိုးအစား လျှပ်စစ်သုံးမော်တော်ယာဉ်များနှင့် Aiqar eQ7 အမျိုးအစားလျှပ်စစ်သုံးမော်တော်ယာဉ်များ၊ Mandalar Minn Trading & Transportation Co., Ltd. မှ တင်သွင်းလာသော Asiastar အမှတ်တံဆိပ် လျှပ်စစ်သုံး ခရီးသည်တင်ယာဉ်နှင့် Myanmar Arr Thit Man Motor Co., Ltd. မှ တင်သွင်းလာသော တရုတ်နိုင်ငံထုတ် AIMA အမျိုးအစား လျှပ်စစ်သုံးမော်တော်ဆိုင်ကယ်သည် ရန်ကုန်ဆိပ်ကမ်းသို့ ရောက်ရှိလာပါသဖြင့် (၂၈-၆-၂၀၂၄) ရက်နေ့တွင် လုပ်ထုံးလုပ်နည်းနှင့်အညီ ထုတ်ယူခွင့်ပြုခဲ့ပါကြောင်း သတင်းရရှိသည်။
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ၂၀၂၄ ခုနှစ်၊ မိုးရာသီ သစ်ပင်စိုက်ပျိုးပွဲ အခမ်းအနားကို ယနေ့နံနက် ၀၈:၃၀ နာရီအချိန်တွင် နေပြည်တော်ရှိ စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၊ ရုံးအမှတ် (၃)၊ မူပိုင်ခွင့်ဦးစီးဌာနရုံးအနီးရှိ မြေကွက်လပ်၌ ကျင်းပပြုလုပ်ခဲ့ရာ ပြည်ထောင်စုဝန်ကြီး ဦးထွန်းအုံ၊ ဒုတိယဝန်ကြီး ဦးမင်းမင်း၊ ဦးစီးဌာနများမှ ညွှန်ကြားရေးမှူးချုပ်များနှင့် ဌာနဆိုင်ရာ အရာထမ်း၊ အမှုထမ်းများ တက်ရောက်ခဲ့ကြသည်။
ရှေးဦးစွာ ပြည်ထောင်စုဝန်ကြီးက သဘာဝပတ်ဝန်းကျင်နှင့် ဂေဟစနစ်ထိန်းသိမ်းရန်၊ ပတ်ဝန်း ကျင်စိမ်းလန်းစိုပြည်ရန်၊ လေထုကိုသန့်စင်ပေးနိုင်ရန်၊ မြေဆီလွှာတိုက်စားမှုကိုကာကွယ်နိုင်ရန်၊ စားရေ ရိက္ခာဖန်တီးပေးရန်နှင့် ရာသီဥတုကောင်းမွန်စေရန်ရည်ရွယ်၍ သစ်ပင်များစိုက်ပျိုးခြင်းဖြစ်ကြောင်း၊ သစ်ပင်များကို ရှင်သန်ဖွံ့ဖြိုးလာအောင် စိုက်ပျိုးပြုစုပျိုးထောင်ပေးခြင်းဖြင့် ပတ်ဝန်းကျင်ဆိုင်ရာ ဂေဟ စနစ် ပိုမိုအားကောင်းလာပြီး ပတ်ဝန်းကျင် စိမ်းလန်းစိုပြေသာယာလှပလာမည်ဖြစ်ကြောင်း၊ ရှင်အောင် စိုက်ပျိုး၊ ကြီးအောင်ပြုစု၊ မြဲအောင်ထိန်းသိမ်း၊ ထာဝရကုသိုလ်ရဖို့ သစ်ပင်စိုက်ပျိုးထိန်းသိမ်းစို့ ဟူသည့် ဆောင်ပုဒ်နှင့်အညီ စိုက်ပျိုးပြီးအပင်များကိုလည်း ရှင်သန်ဖြစ်ထွန်းစေရေး ဝန်ထမ်းများက ဝိုင်းဝန်း ဆောင်ရွက်ရန် ပြောကြားခဲ့သည်။
ယင်းနောက် ပြည်ထောင်စုဝန်ကြီးက ရတနာတန်းဝင်ကျွန်းပင်ကို ဦးဆောင်စိုက်ပျိုးခဲ့ပြီး ဒုတိယဝန်ကြီး ဦးမင်းမင်း၊ ညွှန်ကြားရေးမှူးချုပ်များ၊ ပြည်ထောင်စုဝန်ကြီးရုံးနှင့် ဦးစီးဌာနများမှ အရာထမ်း၊ အမှုထမ်းများက ရတနာတန်းဝင်ကျွန်းပင်နှင့် ပျဉ်းကတိုးပင်များကို သတ်မှတ်နေရာများ၌ စိုက်ပျိုးခဲ့ကြရာ ပြည်ထောင်စုဝန်ကြီးနှင့် အဖွဲ့ဝင်များက ဝန်ထမ်းများ သစ်ပင်စိုက်ပျိုးနေမှုများကို လှည့်လည်ကြည့်ရှုအားပေးခဲ့သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ နှစ်စဉ်မိုးရာသီ သစ်ပင်စိုက်ပျိုးပွဲကို ကျင်းပပြုလုပ်ပြီး ယခုနှစ်မိုးရာသီ သစ်ပင်စိုက်ပျိုးပွဲတွင် ရတနာတန်းဝင်ကျွန်းပင် ၃၁၃ ပင်နှင့် ပျဉ်းကတိုးပင် ၃၀၀ ပင်၊ ပတ္တမြားငမောက် ၈၀၀ ပင်၊ စိန်တလုံးသရက် ၃၂၅ ပင်နှင့် ဝါးပိုးဝါး ၁၀၀ ပင် အပါအဝင် သစ်ပင် ၂၀၉၈ ပင်တို့ကိုစိုက်ပျိုးခဲ့သည်။ ရုံးအမှတ် (၃) နှင့် ရုံးအမှတ် (၅၂)တို့တွင် ယခင်နှစ်မိုးရာသီသစ်ပင်စိုက်ပျိုးပွဲတွင် စိုက်ပျိုးပြီးသော စိန်တလုံးသရက်ပင် ၁၁၀၀၀ ပင်၊ ပတ္တမြားငမောက်သရက်ပင် ၇၀၀ ပင်၊ ရတနာတန်းဝင်ကျွန်းပင် ၂၁၀၀ ပင်၊ ပျဉ်းကတိုးပင် ၄၀၀ ပင်၊ မဟော်ဂနီပင် ၁၅၀ ပင်၊ မန်ဂျန်ရှား ၁၅၀ ပင်နှင့် ဝါးပိုးဝါး ၁၀၀၀ ပင်များမှာ အောင်မြင်ဖြစ်ထွန်းလျက် ရှိသည်။
ဆက်လက်၍ ပြည်ထောင်စုဝန်ကြီးသည် ရုံးအမှတ် - ၃၊ အစည်းအဝေးခန်းမ၌ ကုန်သွယ်ရေး ဦးစီးဌာန၊ ဒုတိယညွှန်ကြားရေးမှူး ဒေါ်ဇာနည်တင်မှ Implementation of Article 66.2 of the WTO TRIPS Agreement ခေါင်းစဉ်ဖြင့် ဆွေးနွေးသော စကားဝိုင်းဆွေးနွေးပွဲသို့ တက်ရောက်ခဲ့သည်။
အဆိုပါဆွေးနွေးပွဲတွင် ကမ္ဘာ့ကုန်သွယ်ရေးအဖွဲ့ဝင် ဖွံ့ဖြိုးပြီးနိုင်ငံများမှ ပေးအပ်သော ကင်းလွတ် ခွင့်များ၊ ကုန်သွယ်မှုဆိုင်ရာ အကျိုးခံစားခွင့်များနှင့်စပ်လျဉ်းပြီး တင်ပြဆွေးနွေးခဲ့ရာ ပြည်ထောင်စု ဝန်ကြီးက ကုန်သွယ်မှုဆောင်ရွက်ရာတွင် သတ်မှတ်ချက်နှင့်အညီ ဆောင်ရွက်ရန်နှင့် ပို့ကုန်မြှင့်တင် ရေးကို အလေးထားဆောင်ရွက်သွားရန် မှာကြားခဲ့ကြောင်း သတင်းရရှိသည်။
ထိုင်းနယ်စပ်ကုန်သွယ်မှု လမ်းကြောင်းအသစ်ဖြစ်သည့် ရန်ကုန်-ကော့သောင်း-ရနောင်း ကွန်တိန်နာစနစ်ဖြင့် လုပ်ငန်းဆောင်ရွက်မှုကို ၂၀၂၄ ခုနှစ်၊ ဇွန်လတွင် စတင်တော့မည် ဖြစ်ပါသည်။ GOLD SHIPPING AGENCY SERVICES LIMITED မှ သင်္ဘောဖြစ်သည့် MV. Beypore Sultan သည် မြန်မာပို့ကုန် ပြောင်းဆံများသယ်ဆောင်ပြီး ထိုင်းနိုင်ငံ၊ ရနောင်းဆိပ်ကမ်းသို့ ၂၈-၆-၂၀၂၄ ရက်နေ့တွင် ထွက်ခွာရန် စီစဉ်ထားရှိပါသည်။ အပြန်တွင် ရနောင်းဆိပ်ကမ်းမှ သွင်းကုန်ပစ္စည်းများ သယ်ဆောင်ပြီး ရန်ကုန်ဆိပ်ကမ်းသို့ ရောက်ရှိလာမည်ဖြစ်ပါသည်။ ပို့ကုန်သွင်းကုန်လုပ်ငန်းရှင်များ အနေဖြင့် မြန်မာ-ထိုင်း နယ်စပ်ကုန်သွယ်မှုလမ်းကြောင်းအသစ်ဖြင့် ဆောင်ရွက်နိုင်ပါကြောင်းနှင့် ပို့ကုန်၊ သွင်းကုန်နှင့်ပတ်သက်သည့်သတင်းလွှာ ၁/၂၀၂၄ ပါ စံပြုလုပ်ငန်းစဉ်များကို လေ့လာနိုင်ပါကြောင်း အသိပေးအပ်ပါသည်။
အသိပေးကြေညာချက်
၂၀၂၄ ခုနှစ်၊ ဇွန်လ ၂၄ ရက်
၁။ ပြည်တွင်းဆန်စပါးဖူလုံရေး၊ ပြည်ပသို့ စနစ်တကျတင်ပို့ရောင်းချနိုင်ရေး၊ ဆန်စပါးစျေး ကွက်နှင့် စျေးနှုန်းတည်ငြိမ်မှန်ကန်စေရေးနှင့် ဆန်စပါးသိုလှောင်မှုအခြေအနေများကို စနစ်တကျ စာရင်းပြုစုမှတ်ပုံတင်ထားနိုင်ရေး၊ သိုလှောင်ရုံကုန်အပ်လက်မှတ်ကို အခြေပြုသည့် ငွေကြေး ထောက်ပံ့မှုစနစ်ကို ဖော်ဆောင်နိုင်ရေးတို့အတွက် ပြည်တွင်း၌ လုပ်ကိုင်ဆောင်ရွက်လျက်ရှိသည့် ဆန်စပါးသိုလှောင်ရုံလုပ်ငန်းများအနေဖြင့် Online Registration စနစ်ဖြင့် Myanmar Rice Online (MyRo)-www.myro.com.mm တွင် ၂၀၂၃ ခုနှစ်၊ နိုဝင်ဘာလ ၃ ရက်နေ့ မှစတင်၍ မှတ်ပုံ တင်ဆောင်ရွက်ရမည်ဖြစ်ကြောင်း အသိပေးကြေညာခဲ့ပြီးဖြစ်ပါသည်။
၂။ ယခုအခါ ၂၀၂၄ ခုနှစ်၊ ဇွန်လ ၂၃ ရက်နေ့အထိ Myanmar Rice Online (MyRo)- www.myro.com.mm တွင် မှတ်ပုံတင်ထားသော ကုမ္ပဏီများ၏ သိုလှောင်ရုံအရေအတွက် ၂၁၃ လုံး၊ တစ်ဦးချင်းလုပ်ငန်းရှင်များ၏ သိုလှောင်ရုံ ၅၁၃ လုံး၊ စုစုပေါင်းသိုလှောင်ရုံ အရေအတွက် ၇၂၆ လုံး မှတ်ပုံတင်ဆောင်ရွက်ထားပြီးဖြစ်ပါသည်။
၃။ သို့ဖြစ်ပါ၍ စီးပွားရေးလုပ်ငန်းအလို့ငှာ ဆန်တန်ချိန် ၅၀ သို့မဟုတ် စပါးတင်း ၅၀၀၀ နှင့် အထက် သိုလှောင်သည့် ဆန်စပါးသိုလှောင်ရုံပိုင်ဆိုင်သူများအနေဖြင့် မိမိတို့၏ သိုလှောင်ရုံများကို Myanmar Rice Online (MyRo)-www.myro.com.mmတွင် မဖြစ်မနေ မှတ်ပုံတင်ဆောင်ရွက် ပေးကြပါရန် ထပ်မံ အသိပေးကြေညာအပ်ပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန
၂၀၂၄ ခုနှစ်၊ ဇွန်လ ၂၄ ရက်နေ့ နံနက် (၀၉:၃၀) နာရီအချိန်တွင် အစည်းအဝေးခန်းမ၌ ကျင်းပပြုလုပ်ခဲ့သည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ၂၀၂၄ ခုနှစ်အတွက် ပညာရည်ထူးချွန်ဆုပေးပွဲနှင့် ပညာသင် ထောက်ပံ့ကြေးပေးအပ်ပွဲအခမ်းအနားသို့ စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံ တက်ရောက် အမှာစကားပြောကြားခဲ့သည်။
အခမ်းအနားတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံက အဖွင့်အမှာစကားပြောကြားရာတွင် ယနေ့နိုင်ငံတော်အစိုးရအနေဖြင့် တစ်မျိုးသားလုံး ပညာရည်မြင့်မားရေးကို အမျိုးသားရေးမျှော်မှန်းချက်ချမှတ်ပြီး ခေတ်နှင့်လျော်ညီသည့် ပညာရေး ပြုပြင်ပြောင်းလဲမှုများကို စီမံကိန်းချမှတ်၍ အကောင်အထည်ဖော် အားပေးမြှင့်တင် ဆောင်ရွက်လျက် ရှိပါကြောင်း၊ နိုင်ငံသားတိုင်း အခြေခံပညာကို ကောင်းစွာသင်ယူတတ်မြောက်ရေး၊ ဘက်စုံထူးချွန် ထက်မြက်ပြီး နိုင်ငံတကာအဆင့်မီ ပညာရည်မြင့်မားရေးနှင့် အရည်အသွေးမြင့်မားသည့် လူ့စွမ်းအား အရင်းအမြစ်များ ပေါ်ထွန်းလာရေးဟူသည့် မျှော်မှန်းချက်များ အောင်မြင်အောင် စနစ်တကျ စီမံ ဆောင်ရွက်လျက်ရှိပါကြောင်း၊ မိမိတို့ဝန်ကြီးဌာနအနေဖြင့်လည်း နိုင်ငံတော်အစိုးရမူဝါဒနှင့်အညီ ဝန်ကြီးဌာနမှ ဝန်ထမ်းများ၏ သား/ သမီးများ ပညာသင်ကြားရာတွင် အဆင်ပြေစေရေးနှင့် အထောက်အပံ့ဖြစ်စေရေးတို့အတွက် ပညာသင်ထောက်ပံ့ကြေးများကို နှစ်စဉ်တိုးမြှင့်ထောက်ပံ့ပေးလျက်ရှိပါကြောင်း၊ သို့ဖြစ်ရာ ကျောင်းသားမိဘများအနေဖြင့် မိမိတို့၏ သား/ သမီးများကို ပညာတတ်လူချွန် လူကောင်းများဖြစ်လာစေရေးအတွက် အလေးထားပြုစု ပျိုးထောင်ပေးစေလိုပါကြောင်း၊ ကျောင်းသား/ ကျောင်းသူများအနေဖြင့်လည်း ပညာရဲရင့် ပွဲလယ်တင့်ဆိုသည့်အတိုင်း ပညာရည်မြင့်မားမှသာ မိမိ ဘဝတိုးတက်မည်ကို သိရှိနားလည်ပြီး ထူးချွန်ထက်မြက်သော ပညာရှင်များဖြစ်အောင်၊ နိုင်ငံတော်က အားထားရသည့် သားကောင်း၊ သမီးမွန်ရတနာများဖြစ်အောင် ကြိုးစားဆောင်ရွက်သွားကြပါဟု တိုက်တွန်းမှာကြားလိုပါကြောင်း ပြောကြားခဲ့သည်။
ဆက်လက်၍ ဂုဏ်ပြုဆုပေးအပ်ပွဲအခမ်းအနားကို ပြုလုပ်ရာ ပြည်ထောင်စုဝန်ကြီးမှ ငါးဘာသာဂုဏ်ထူးဖြင့်အောင်မြင်သူ မောင်သန်းထိုက်ဆွေ၊ မောင်လင်းလွင်ဟိန်း၊ မနှင်းနန္ဒာခင်နှင့် လေးဘာသာဂုဏ်ထူးဖြင့် အောင်မြင်သူ မောင်မင်းသန့်အောင်၊ မဟန်နီဇော်တို့အား လည်းကောင်း၊ ဒုတိယဝန်ကြီးမှ သုံးဘာသာဂုဏ်ထူးဖြင့် အောင်မြင်သူ မောင်ရင်မင်းသန့်၊ မလင်းလတ်ရွှေရည်သန့် နှင့် နှစ်ဘာသာဂုဏ်ထူးဖြင့် အောင်မြင်သူ မမေသဇင်ဦးတို့အား လည်းကောင်း ဂုဏ်ပြုဆုများကို အသီးသီးချီးမြှင့်ပေးအပ်ခဲ့သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနရှိ ဝန်ထမ်းသား/ သမီးများမှ တက္ကသိုလ်ဝင်တန်းဖြေဆိုသူ ၅၄ ဦးအနက် ဂုဏ်ထူးရ ကျောင်းသား/ ကျောင်းသူများအပါ အဝင် စုစုပေါင်းတက္ကသိုလ်ဝင်တန်း ၄၁ ဦး ဖြေဆိုအောင်မြင်ခဲ့ပါသည်။
ထို့နောက် ပြည်ထောင်စုဝန်ကြီး၊ ဦးထွန်းအုံက စီးပွားရေးနှင့် ကူးသန်းရောင်းဝယ်ရေးဝန်ကြီး ဌာန၊ ပြည်ထောင်စုဝန်ကြီးရုံးနှင့် ဦးစီးဌာနများအလိုက် ဝန်ထမ်းသား/သမီးများအတွက် ပညာသင် ထောက်ပံ့ကြေးများအား သက်ဆိုင်ရာ ညွှန်ကြားရေးမှူးချုပ်များထံသို့ အသီးသီးပေးအပ်ခဲ့သည်။ ယခုနှစ်ပညာသင်နှစ်တွင် ဝန်ကြီးဌာနမှ ဝန်ထမ်းသားသမီးများအနက် မူလတန်း၊ အလယ်တန်း၊ အထက်တန်းနှင့် တက္ကသိုလ်ကျောင်းသား/ ကျောင်းသူ စုစုပေါင်း ၁၀၈၀ ဦးအတွက် ပညာသင်ထောက် ပံ့ကြေး စုစုပေါင်းငွေကျပ် ၃၂,၂၃၀,၀၀၀/- (ကျပ်သုံးရာနှစ်ဆယ့်နှစ်သိန်းသုံးသောင်းတိတိ) အား ထောက်ပံ့ပေးခဲ့သည်။
အခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးမင်းမင်း၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ တာဝန်ရှိသူများ၊ ကျောင်းသားမိဘများနှင့် ဂုဏ်ထူးရ ကျောင်းသား/ ကျောင်းသူများ တက်ရောက်ခဲ့ကြကြောင်း သတင်းရရှိသည်။
Pages
