နောက်ဆုံးရ သတင်း
နေပြည်တော်၊ စက်တင်ဘာ ၅
၂၀၂၂ ခုနှစ်၊ အောက်တိုဘာလ ၆ ရက်နှင့် ၇ ရက်တို့တွင် ကျင်းပပြီးစီးခဲ့သော မြန်မာ့ဆန်စပါးညီလာခံ ၂၀၂၂ ၏ ဖော်ထုတ်ချက်များနှင့် စပ်လျဉ်း၍ ပြန်လည်သုံးသပ်သည့် အစည်းအဝေးကို ၂၀၂၃ ခုနှစ်၊ စက်တင်ဘာလ ၅ ရက် (အင်္ဂါနေ့) နံနက်ပိုင်းတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပခဲ့ရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးညွန့်အောင် အမှာစကားပြောကြားပါသည်။
အစည်းအဝေးတွင် ဒုတိယဝန်ကြီးက မြန်မာ့ဆန်စပါးညီလာခံ ၂၀၂၂ ၏ဖော်ထုတ်ချက်များကို အကောင်အထည်ဆောင်ရွက်မှုသည် နိုင်ငံတော်စီမံအုပ်ချုပ်ရေးကောင်စီက ချမှတ်ခဲ့သော စီးပွားရေးဦးတည်ချက် ၃ ရပ်အနက် ပထမအချက်ဖြစ်သော “တိုင်းပြည်သာယာ ဝပြောရေးနှင့် စားရေရိက္ခာဖူလုံရေးတို့အတွက် တိုင်းရင်းသားပြည်သူတစ်ရပ်လုံးနှင့် အကျုံးဝင်သော စိုက်ပျိုးရေးနှင့်မွေးမြူရေးကို ခေတ်မီနည်းစနစ်များဖြင့် တိုးတက်အောင် ဆောင်ရွက်ပြီး အခြားစီးပွားရေး ကဏ္ဍများကိုလည်း ဘက်စုံဖွံ့ဖြိုးတိုးတက်အောင် တည်ဆောက်ရေး” ဟူသော ဦးတည်ချက်ကို အကောင်အထည်ဖော်ဆောင်ရွက်ခြင်း ဖြစ်ပါကြောင်း၊ ထိုသို့အကောင်အထည်ဖော် ဆောင်ရွက်ရာတွင် နိုင်ငံတော်နှင့် နိုင်ငံသားတစ်ရပ်လုံး၏ အကျိုးစီးပွားနှင့်သက်ဆိုင်သည့် ကိစ္စရပ်ဖြစ်သည့်အတွက် အစိုးရဌာန၊ အစိုးရအဖွဲ့အစည်းများ သာမက ပုဂ္ဂလိကစီးပွားရေးအဖွဲ့အစည်းများနှင့် ပါဝင်ဆက်စပ်နေသူများတွင်လည်း တာဝန်ရှိပါကြောင်း၊ နိုင်ငံ အတွက် ပြည်တွင်းစားသုံးမှုဖူလုံရေးကိစ္စသည် အရေးကြီးသကဲ့သို့ ပြည်ပတင်ပို့မှုကဏ္ဍဖွံ့ဖြိုးရေးကိစ္စသည်လည်း အရေးကြီးပါကြောင်း၊ မြန်မာ့ဆန်စပါးညီလာခံ၏ ဖော်ထုတ်ချက် ၄၃ ချက် ပတ်သက်ပြီး အကောင်အထည်ဖော် ဆောင်ရွက်သွားရန် လုပ်ငန်းစီမံချက် (Action Plan) ကို (၅) နှစ်တာကာလအတွက် ရေးဆွဲပြုစုထားပြီးဖြစ်ပါကြောင်း၊ ထို့ကြောင့် အဆိုပါလုပ်ငန်းစီမံချက်နှင့်အညီ ထိရောက်စွာ အကောင်အထည်ဖော်ဆောင်ရွက်သွားကြရန် တိုက်တွန်းလိုပါကြောင်းပြောကြားခဲ့ပါသည်။
ထို့နောက် အစည်းအဝေးသို့ တက်ရောက်လာကြသည့် သက်ဆိုင်ရာ ပြည်ထောင်စုဝန်ကြီးဌာနများမှ တာဝန်ရှိသူများ၊ မြန်မာနိုင်ငံ ဆန်စပါးအသင်းချုပ်ဥက္ကဋ္ဌတို့က ညီလာခံဖော်ထုတ်ချက်များနှင့်စပ်လျဉ်း၍ ဆောင်ရွက်ရန်ကိစ္စရပ်များကို ဆွေးနွေးတင်ပြခဲ့ကြရာ ဒုတိယဝန်ကြီးက ဆက်လက် ဆောင်ရွက်ရမည့်လုပ်ငန်းများအပေါ် ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။
နေပြည်တော်၊ စက်တင်ဘာ ၄ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့၏ (၃/၂၀၂၃) ကြိမ်မြောက် အစည်းအဝေးကို ၂၀၂၃ ခုနှစ်၊ စက်တင်ဘာလ ၄ ရက်နေ့၊ မွန်းလွဲပိုင်းက စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပပြုလုပ်ခဲ့ရာ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဥက္ကဋ္ဌ၊ စီးပွားရေးနှင့် ကူးသန်းရောင်းဝယ် ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦး အမှာစကားပြောကြားခဲ့သည်။
ဗဟိုလုပ်ငန်းအဖွဲ့ ဥက္ကဋ္ဌ၊ ပြည်ထောင်စုဝန်ကြီးက အထူးစီးပွားရေးဇုန်များနှင့်ပတ်သက်၍ နိုင်ငံတော်ဝန်ကြီးချုပ်၏ လမ်းညွှန်ချက်များအား အသေးစိတ်ဆွေးနွေးပြောကြားပြီး နိုင်ငံတော် ဝန်ကြီးချုပ်၏ လမ်းညွှန်ချက်များကို မူဝါဒအဖြစ်ခံယူကာ အထူးစီးပွားရေးဇုန်များ မြန်ဆန်စွာ ဖွံ့ဖြိုးတိုးတက်အောင် ဆောင်ရွက်ရေးကိုလည်းကောင်း၊ အထူးစီးပွားရေးဇုန်အလိုက် ဆက်လက် ဆောင်ရွက်ရမည့် လုပ်ငန်းစဉ်များကိုလည်းကောင်း ဆွေးနွေးပြောကြားပါသည်။
ထို့နောက် အစည်းအဝေးသို့ တက်ရောက်လာကြသည့် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဒုတိယဥက္ကဋ္ဌများ၊ အထူးစီးပွားရေးဇုန် စီမံခန့်ခွဲမှုကော်မတီ အသီးသီးမှ ဥက္ကဋ္ဌများ၊ ဗဟိုလုပ်ငန်းအဖွဲ့ အဖွဲ့ဝင်များနှင့် ဌာနဆိုင်ရာအသီးသီးမှ တာဝန်ရှိသူများက အထူးစီးပွားရေးဇုန်အလိုက် ဆောင်ရွက်ရန်ကိစ္စများ၊ လုပ်ငန်းများဖွံ့ဖြိုးတိုးတက်ရေးနှင့် ပတ်သက်သည့် အစီအစဉ်များကို ဝိုင်းဝန်းဆွေးနွေး အကြံပြုတင်ပြခဲ့ကြရာ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ ဥက္ကဋ္ဌက လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့ သည်။
အစည်းအဝေးသို့ မြန်မာအထူးစီးပွားရေးဇုန်ဆိုင်ရာဗဟိုလုပ်ငန်းအဖွဲ့ ဒုတိယဥက္ကဋ္ဌများနှင့် အဖွဲ့ဝင်များ၊ သီလဝါ၊ ကျောက်ဖြူနှင့် ထားဝယ်အထူးစီးပွားရေးဇုန် စီမံခန့်ခွဲမှုကော်မတီဥက္ကဋ္ဌများနှင့် ဌာနဆိုင်ရာအသီးသီးမှ တာဝန်ရှိသူများ တက်ရောက်ခဲ့ကြကြောင်း သတင်းရရှိသည်။
နေပြည်တော် စက်တင်ဘာလ ၃
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီ အနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ နှင့်အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန် ပေးလျက်ရှိပါသည်။
ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှုများအရ ၂၀၂၃ ခုနှစ်၊ စက်တင်ဘာလ ၄ ရက်နေ့ မှ စက်တင်ဘာလ ၁၀ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄၁၆၀ ကျပ် ဖြစ်ကြောင်း ထုတ်ပြန်ကြေညာထားပါသည်။
ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။
အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။
နေပြည်တော်၊ စက်တင်ဘာ ၂ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ၂၀၂၃-၂၀၂၄ ဘဏ္ဍာနှစ်၊ ပထမ (၆) လပတ် လုပ်ငန်းညှိနှိုင်းအစည်းအဝေး ဒုတိယနေ့ကို ၂၀၂၃ ခုနှစ်၊ စက်တင်ဘာလ ၂ ရက်နေ့၊ (၀၉:၀၀) နာရီအချိန်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ် (၃)၊ ညီလာခံခန်းမ၌ ဆက်လက်ကျင်းပပြုလုပ်ခဲ့ရာ မူပိုင်ခွင့်ဦးစီးဌာနနှင့် မြန်မာ ကုန်သွယ်မှုမြှင့်တင်ရေးအဖွဲ့တို့မှ ညွှန်ကြားရေးမှူးချုပ်များက ဌာနအလိုက် ဖွဲ့စည်းမှု၊ လုပ်ငန်း ဆောင်ရွက်နေမှုအခြေအနေများနှင့် ရှေ့ဆက်ဆောင်ရွက်မည့် လုပ်ငန်းစဉ်များကို တင်ပြခဲ့ကြသည်။
ဆက်လက်၍ အွန်လိုင်းမှ ရောင်းချသူများ (Online Sales) မှတ်ပုံတင်လုပ်ငန်းများ လက်ခံ ဆောင်ရွက်နိုင်ရေးအတွက် ပြင်ဆင်ဆောင်ရွက်ပြီးစီးမှုအခြေအနေများအား တာဝန်ခံအရာထမ်းမှ ရှင်းလင်းတင်ပြခဲ့ပါသည်။ ထို့နောက် နိုင်ငံဝန်ထမ်းတက္ကသိုလ် (အထက်မြန်မာပြည်) တွင်ဖွင့်လှစ်ခဲ့ သည့် အဆင့်မြင့်အရာရှိသင်တန်းအမှတ်စဉ် (၁၃)နှင့် အမှတ်စဉ် (၁၄) တို့တွင် ပထမဆုရရှိခဲ့ ကြသည့် ညွှန်ကြားရေးမှူး (၂) ဦးနှင့် အရာထမ်းလောင်း (အထူး)သင်တန်း အမှတ်စဉ် (၁၁) တွင် စံပြဆု ရရှိခဲ့သော ဦးစီးအရာရှိ (၁) ဦးတို့အား ပြည်ထောင်စုဝန်ကြီးမှ ဆုများချီးမြှင့်ခဲ့ပါသည်။
ထို့နောက်ဌာနများ၏ တင်ပြချက်များနှင့်စပ်လျဉ်းပြီး ဒုတိယဝန်ကြီးက တရားမဝင် ကုန်သွယ်မှုများ လျော့နည်းပပျောက်ရေးအတွက် နယ်စပ်ကုန်သွယ်ရေးစခန်း တစ်ခုချင်းအလိုက် စိစစ်ဆောင်ရွက်ရမည့်အချက်များ၊ ကုန်ဈေးနှုန်းများ အထူးသဖြင့် အခြေခံစားကုန်များဖြစ်သည့် ဆန်၊ ဆီဈေးနှုန်းများကျဆင်းရေးနှင့် နိုင်ငံတော်မှချမှတ်ထားသည့်စီးပွားရေးဦးတည်ချက်များ အောင်မြင်စွာအကောင်အထည်ဖော် ဆောင်ရွက်နိုင်ရေးအတွက် ဝန်ထမ်းများအားလုံး အလေးအနက်ထား ဆောင်ရွက်သွားကြရန်ကိစ္စ များကို မှာကြားခဲ့သည်။
နိဂုံးချုပ်အနေဖြင့် ပြည်ထောင်စုဝန်ကြီးက ပြောကြားရာတွင် ဌာနများအနေဖြင့် အခြေခံ ကျကျသုံးသပ်ပြီး စီမံကိန်းလျာထားချက်များ ပြည့်မီအောင်၊ ယင်းမှတစ်ဆင့် ကျော်လွန်အောင် ကြိုးစားဆောင်ရွက်သွားရန်၊ မိမိတာဝန်ကျရာ နယ်မြဒေသ၊ ခရိုင်၊ တိုင်းအလိုက် ပို့ကုန်တိုးမြှင့် ထုတ်လုပ်နိုင်ရေး၊ အသေးစား၊ အငယ်စား၊ အလတ်စားလုပ်ငန်းများ(MSME) ဖွံ့ဖြိုးတိုးတက်လာ စေရေးတို့အတွက် ကူညီပံ့ပိုးပေးသွားရန်၊ Digitalized Ministry ဖြစ်လာစေရေးအတွက် ဝန်ထမ်း များအားလုံးမှ စဉ်ဆက်မပြတ် လေ့လာသင်ယူသွားကြရန်နှင့် ဝိုင်းဝန်းကြိုးပမ်း ဆောင်ရွက်သွားကြရန် လမ်းညွှန်မှာကြားခဲ့ပါသည်။
ဒုတိယနေ့အစည်းအဝေးသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဦးစီးဌာနများမှ အရာထမ်းများ၊ နယ်စပ်ကုန်သွယ်ရေး စခန်း တာဝန်ခံများနှင့် တိုင်းဒေသကြီး/ပြည်နယ် ဦးစီးမှူးများ ပါဝင်တက်ရောက်ခဲ့ကြကြောင်း သတင်းရရှိသည်။
ကရင်ပြည်နယ်နေရာအနှံ့ မိုးကြီးခဲ့မှုကြောင့် ၂၀၂၃ ခုနှစ်၊ ဩဂုတ်လ ၇ ရက်နေ့ နံနက်ပိုင်းတွင် မြဝတီမြို့နှင့် ကော့ကရိတ်မြို့အကြားရှိ ဒေါနတောင်၊ တောနော်ရေတံခွန် အနီးဝန်းကျင်တစ်ဝိုက်တွင် လမ်းပိုင်းတစ်ခု ပြတ်တောက်သွားခြင်း၊ နေရာနှစ်ခုတွင် တောင်ပြိုကျ ခြင်းများဖြစ်ပေါ်၍ ယာဉ်များသွားလာမရနိုင်တော့ပဲ ကုန်သွယ်မှုလမ်းကြောင်းများ ပြတ်တောက် သွားခဲ့ပါသည်။
ကရင်ပြည်နယ်အစိုးရ၏ ကြီးကြပ်မှု၊ လမ်းဦးစီးဌာန၏ အားသွန်ခွန်စိုက် ဆောင်ရွက်မှုများကြောင့် လမ်းပိုင်းပြတ်တောက်သည့်နေရာတွင် ဘေလီတံတား ဆောက်လုပ်ခဲ့ပြီး ၂၀၂၃ ခုနှစ်၊ ဩဂုတ်လ ၂၅ ရက်နေ့ နံနက်ပိုင်းမှစတင်၍ ယာဉ်ငယ် များ ဖြတ်သန်းခွင့်ပြုခဲ့ပြီး ပို့ကုန် သွင်းကုန် ယာဉ်ကြီးများကိုပါ ပြန်လည်ဖြတ်သန်း နိုင်ရေး ဆောင်ရွက်ခွင့်ပြုပေးပြီး ဖြစ်ပါသည်။
လမ်းပိုင်းပြန်လည်ကောင်းမွန်သွား၍ ပို့ကုန်ပစ္စည်းများမှ ပုပ်သိုးပျက်စီးလွယ်သည့် ရေထွက်ကုန်ပစ္စည်းများ၊ ကုန်စိမ်းပို့ကုန်များဖြစ်သည့် ကြက်သွန်နီနှင့် ငရုတ်မ ချိန်ကိုက် ပျက်စီးမှုမရှိပဲ တစ်ဖက်နိုင်ငံသို့ လွယ်ကူချောမွေ့စွာတင်ပို့နိုင်ရေး ဦးစားပေးဆောင်ရွက် နိုင်ခဲ့ပါသည်။ အခွန်ကင်းလွတ်ခွင့်ဖြင့် တင်ပို့သည့် ပြောင်းသီးနှံကိုလည်း သတ်မှတ်ရက် အတိုင်း အချိန်မီတင်ပို့နိုင်ရေး ဆောင်ရွက်ပေးနိုင်ခဲ့ပါသည်။ ပြည်တွင်းလိုအပ်မှုရှိနေ သည့် သွင်းကုန် ပစ္စည်းများဖြစ်သည့်ဓါတ်မြေဩဇာ၊ တိရိစ္ဆာန်အစာ၊ CMP ကုန်ကြမ်းပစ္စည်းများ၊ ဆောက်လုပ်ရေး လုပ်ငန်းသုံးပစ္စည်းများကိုလည်း အဆင်ပြေ ချောမွေ့စွာ တင်သွင်းနိုင်ရေး ဆောင်ရွက်ပေးနိုင်ခဲ့ပါ သည်။
မြဝတီကုန်သွယ်ရေးဇုန်အနေဖြင့် ၂၀၂၃ ခုနှစ်၊ ဩဂုတ်လအတွင်း ပို့ကုန်ယာဉ် ၁၄၅၇ စီး၊ တန်ဖိုး ၁၅.၂၁၉ ဒေါ်လာသန်း၊ သွင်းကုန်ယာဉ် ၂၃၂၇ စီး၊ တန်ဖိုး ၄၀.၀၂၃ ဒေါ်လာသန်း၊ ကုန်သွယ်မှုပမာဏ ၃၇၈၄ စီး၊ တန်ဖိုး ၅၅.၂၄၂ ဒေါ်လာသန်းကို ကုန်သွယ်မှုပြန်လည်ဆောင်ရွက် နိုင်ခဲ့ပါသည်။
မြဝတီလမ်းပိုင်းသည် မြန်မာ-ထိုင်း နယ်စပ်ကုန်သွယ်ရေးအတွက် အဓိက ကုန်စည် ကူးသန်းနေသည့် လမ်းပိုင်းဖြစ်သည့်အပြင် ဒေသတွင်းကရင်ပြည်နယ်၊ မွန်ပြည်နယ်တို့အတွက် အရေးပါသည့် လမ်းပိုင်းဖြစ်၍ သက်ဆိုင်ရာပြည်နယ်အစိုးရနှင့် တာဝန်ရှိသူများမှ ကုန်သွယ်မှု လျင်မြန်ချောမွေ့စေရေးအတွက် ဝိုင်းဝန်းကြိုးပမ်း လျက်ရှိပါကြောင်း သတင်းရရှိပါသည်။
မြဝတီကုန်သွယ်ရေးဇုန်
Pages
