နောက်ဆုံးရ သတင်း
နေပြည်တော်၊ ဇန်နဝါရီ ၁၁ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ၂၀၂၃-၂၀၂၄ ဘဏ္ဍာနှစ်၊ တတိယသုံးလပတ်လုပ်ငန်းညှိနှိုင်းအစည်းအဝေးကို ၂၀၂၄ ခုနှစ်၊ ဇန်နဝါရီလ ၁၁ ရက် နေ့၊ (၀၈:၃၀) နာရီအချိန်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ် (၃)၊ ညီလာခံခန်းမ၌ ကျင်းပပြုလုပ်ခဲ့ရာ ပြည်ထောင်စုဝန်ကြီး ဦးထွန်းအုံ တက်ရောက်အမှာစကား ပြောကြားခဲ့သည်။
ပြည်ထောင်စုဝန်ကြီးက အမှာစကားပြောကြားရာတွင် ဝန်ကြီးဌာန၏ ၂၀၂၃-၂၀၂၄ ဘဏ္ဍာ နှစ်၊ တတိယသုံးလ ပတ်ကာလအတွင်း လုပ်ငန်းဆောင်ရွက်ပြီးစီးမှု အခြေအနေများနှင့် ဆက်လက် ဆောင်ရွက်ရမည့် ရှေ့လုပ်ငန်းစဉ်များ၊ နိုင်ငံတော်က ချမှတ်ထားသည့် စီးပွားရေးဦးတည်ချက် ၃ ရပ်နှင့်အညီ ဝန်ကြီးဌာန၏ လုပ်ငန်းတာဝန်များကို အကောင်အထည်ဖော် ဆောင်ရွက်သွားရေး၊ ပို့ကုန်တိုးမြှင့်တင်ပို့ရေး၊ ကုန်သွယ်မှုပမာဏလျာထားချက်များ ပြည့်မီအောင်ဝိုင်းဝန်းကြိုးပမ်းဆောင်ရွက်သွားရေး၊ မြန်မာ့ထုတ်ကုန်များအရည်အသွေး ပိုမို ကောင်းမွန်စွာ တိုးမြှင့်တင်ပို့နိုင်ရေးအတွက် အစိုးရနှင့်ပုဂ္ဂလိကအဖွဲ့အစည်းများအကြား ပူးပေါင်းဆောင်ရွက်သွားနိုင်ရေး၊ အသေးစား၊ အငယ်စား၊ အလတ်စားလုပ်ငန်းများ၏ ကုန်ထုတ်လုပ်မှုဖွံ့ဖြိုးတိုးတက်အောင် ပံ့ပိုးကူညီပေးရေး၊ ကုန်သွယ်မှု ကဏ္ဍပိုမိုဖွံ့ဖြိုးတိုးလာစေရေးအတွက် ပူးပေါင်းဆောင်ရွက်ရာတွင် အာဆီယံနှင့် ဒေသတွင်းနိုင်ငံများ နှင့်သာမက နိုင်ငံတကာကုန်သွယ်ဖက်နိုင်ငံများနှင့် ကုန်သွယ်ဆက်ဆံမှုများ ပိုမိုတိုးတက်ကောင်းမွန် အောင်ကြိုးပမ်းဆောင်ရွက်ရေးနှင့် ဝန်ကြီးဌာနရှိ ဝန်ထမ်းများ၏ စွမ်းဆောင်ရည်မြင့်မားတိုးတက်လာစေရေး တို့အတွက်ဆောင်ရွက်သွားရေး၊ အားနည်းချက်များကို ပြင်ဆင်ဖြည့်ဆည်း၍ အားသာချက်များကို အသုံးပြုဆောင်ရွက်ရေးတို့ကို မှာကြားခဲ့သည်။
ဆက်လက်ပြီး ဒုတိယဝန်ကြီး ဦးမင်းမင်းက ဝန်ကြီးဌာန၏ ဖွဲ့စည်းပုံ၊ ဝန်ထမ်းသက်သာ ချောင်ချိရေးဆောင်ရွက်ပေးမှု အခြေအနေများ၊ ဌာနတစ်ခုချင်းစီ၏ လုပ်ငန်းတာဝန်များအပေါ် ဆောင်ရွက်သင့်သည့်အချက်များ၊ ရှေ့လုပ်ငန်းစဉ်များ၊ လူ့စွမ်းအားအရင်းအမြစ် ပြုန်းတီးမှုမရှိစေရေးနှင့် အနာဂတ် အစီအမံများအား ချမှတ်ဆောင်ရွက်သွားရန်၊ ကမ္ဘာ့ကုန်သွယ်ရေးအဖွဲ့၏ အခြေခံစည်းမျဉ်းများကို ဌာနအတွင်းရှိ အရာထမ်း၊ အမှုထမ်းများအား အခြေခံအဆင့်ဖြင့် တတ်မြောက်စေ ရေးသင်တန်းများ ဖွင့်လှစ်သင်ကြားပေးရန်နှင့် မိမိဝန်ကြီးဌာနမှ ချမှတ်သည့် မူဝါဒများအား အဆိုပါ အခြေခံစည်းမျဉ်းများနှင့်ကိုက်ညီမှုရှိအောင် လိုက်နာဆောင်ရွက်သွားရေးတို့ကို မှာကြားခဲ့ပါသည်။
ထို့နောက် ပြည်ထောင်စုဝန်ကြီးရုံး၊ ညွှန်ကြားရေးမှူးချုပ်နှင့် ဦးစီးဌာနများမှ ညွှန်ကြားရေးမှူးချုပ်များနှင့် နယ်စပ်ကုန်သွယ်ရေးစခန်းတာဝန်ခံ ညွှန်ကြားရေးမှူးများက ဌာနအလိုက် လုပ်ငန်းဆောင်ရွက်နေမှုအခြေအနေများနှင့် ရှေ့ဆက်ဆောင်ရွက်မည့် လုပ်ငန်းစဉ်များကို တင်ပြခဲ့ရာ ပြည်ထောင်စုဝန်ကြီးနှင့် ဒုတိယဝန်ကြီးမှ လိုအပ်သည်များအား ဖြည့်စွက် လမ်းညွှန်မှာကြားခဲ့ပါသည်။
အခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး၊ ဦးမင်းမင်း ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဦးစီးဌာနများမှ အရာထမ်းများ၊ နယ်စပ် ကုန်သွယ်ရေးစခန်း တာဝန်ခံများနှင့် တိုင်းဒေသကြီး/ ပြည်နယ်ဦးစီးမှူးများ ၁၅၀ ဦး၊ Virtual စနစ်ဖြင့် ၃၆ ဦး၊ စုစုပေါင်း ၁၈၆ ဦးတက်ရောက်ခဲ့ကြကြောင်း သတင်းရရှိသည်။
နေပြည်တော်၊ ဇန်နဝါရီလ ၈ ရက်
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံသည် တာဝန်ရှိသူများနှင့်အတူ ယနေ့နံနက်ပိုင်းတွင် ရန်ကုန်တိုင်းဒေသကြီး၊ အလုံဆိပ်ကမ်းရှိ MV. Yong Sheng 151 သင်္ဘော၌ Tun Myat Thu ကုမ္ပဏီလီမိတက်၊ Hey Day Energy ကုမ္ပဏီလီမိတက်၊ Asia Empower ကုမ္ပဏီလီမိတက်၊ Myanmar Pulses Zone Co., Ltd. တို့က ဖိလစ်ပိုင်နိုင်ငံသို့တင်ပို့မည့် ပြောင်းစေ့ ၁၁၅၀၀ တန် သင်္ဘောတင်မှုအခြေအနေကို ကြည့်ရှု စစ်ဆေးပြီး ပြည်ထောင်စုဝန်ကြီးက၂၀၂၃ ခုနှစ်၊ ဧပြီလ ၁ ရက်မှ ဒီဇင်ဘာလအထိ တရုတ်နိုင်ငံ၊ ထိုင်းနိုင်ငံ၊ ဖိလစ်ပိုင်နိုင်ငံနှင့် စင်္ကာပူနိုင်ငံသို့ ပြောင်းစေ့တန်ချိန် ၉၃၄၈၈၂ တန် တင်ပို့နိုင်ခဲ့ရာ အမေရိကန်ဒေါ်လာ ၂၇၉ သန်းရရှိခဲ့သဖြင့် ပြောင်းစေ့များကိုပြည်ပသို့ပိုမိုတိုးမြှင့်တင်ပို့နိုင်ရန် အတွက် မှန်ကန်သည့် ကုန်သွယ်မှုဖြစ်ပေါ်စေရန်နှင့် ကုန်သွယ်မှုလုပ်ငန်းများ လျှင်မြန်ချောမွေ့စေရန်အတွက် ဘက်စုံကြိုးပမ်းဆောင်ရွက်ရန်တို့ကို မှာကြားသည်။
ဆက်လက်ပြီး ပြည်ထောင်စုဝန်ကြီးနှင့်အဖွဲ့သည် ကြည့်မြင်တိုင်မြို့နယ်ရှိ Kyimyindaing International Port (KMP) တွင် တင်သွင်းရောက်ရှိပြီးသော စားအုန်းဆီများကို မြန်မာ့ ကုန်ပစ္စည်း စစ်ဆေးရေးနှင့်စမ်းသပ်မှုလုပ်ငန်းလီမိတက်(Myanmar Inspection and Testing Services Ltd-MITS) မှ စစ်ဆေးထားရှိမှု၊ စစ်ဆေးပြီးစားအုန်းဆီများအား သိုလှောင်ကန်များတွင် သိုလှောင်ထားရှိမှုနှင့် သိုလှောင်ကန်မှ တိုင်းဒေသကြီး/ပြည်နယ်များသို့ ရည်ညွှန်းဈေးဖြင့် ဖြန့်ခွဲရောင်းချရန် စားအုံးဆီများအား တိုင်ကီနှင့် Boxer ထဲသို့ ဖြည့်ထည့်မှု၊ အလေးချိန် ပြည့်ဝမှန်ကန်ရန်စစ်ဆေးမှု၊ ဆီဖြည့်ပြီးတိုင်ကီနှင့် Boxer များ အဖုံးပိတ်လုံခြုံမှုစနစ် ဆောင်ရွက်မှုတို့ကို စစ်ဆေးပြီး သတ်မှတ်အလေးချိန်ပြည့်မီစေရန်၊ အချိန်နှင့်တပြေးညီ ဖြန့်ဝေရန်၊ သက်ဆိုင်ရာတိုင်းဒေသကြီး/ပြည်နယ်များသို့ သယ်ယူရာလမ်းတစ်လျှောက်တွင် ဆီလျှော့နည်းမှုမရှိစေရန်တို့ကို စနစ်တကျဆောင်ရွက်ရန်မှာကြားခဲ့သည်။
ထို့နောက် မွန်းလွဲပိုင်းတွင် ပြည်ထောင်စုဝန်ကြီးသည် ပဲခူးတိုင်းဒေသကြီး၊ ရေတာရှည်မြို့နယ်ရှိ အမှတ်(၅)သကြားစက်မြို့လှသို့ ရောက်ရှိရာ စက်ရုံအတွင်း တာဝန်ရှိ သူများက သကြားကြိတ်ခွဲထုတ်လုပ်ရန် ကြံဝယ်ယူရရှိမှု၊ ကြိတ်ခွဲမှုအဆင့်ဆင့်နှင့် ကုန်ချောသကြားများ ပြည်တွင်းသို့ ဖြန့်ဖြူးရောင်းချနေမှုအခြေအနေများအား ရှင်းလင်းတင်ပြပြီး ပြည်ထောင်စုဝန်ကြီးက ပြည်တွင်းစားသုံးရန်အတွက် လုံလောက်စွာဖြန့်ဖြူးရန်နှင့် လိုအပ်သောဒေသများသို့ အချိန်မီရောက်ရှိရေးဆောင်ရွက်ရန်၊ စားသုံးသူများကို သင့်တင့်မျှတသောဈေးနှုန်းဖြင့် ဖြန့်ဖြူးရောင်းချရန်၊ထုတ်ကုန်တိုးမြှင့်ထုတ်လုပ်ရန်တို့ကို မှာကြားခဲ့သည်။
အဆိုပါ သကြားစက်သည် တစ်ရက်လျှင် ကြံ ၂၂၀၀ တန် ကြိတ်ဝါးနိုင်ပြီး၊ တစ်ရက် သကြားဖြူ ၂၁၆ တန် ထွက်ရှိကာ ၂၀၂၃-၂၀၂၄ ဘဏ္ဍာနှစ်အတွင်း သကြားဖြူ ၁၃၀၅၇ တန် ထုတ်လုပ်နိုင်ကြောင်းသတင်းရရှိသည်။
နေပြည်တော်၊ ဇန်နဝါရီ ၇ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံသည် ဧရာဝတီတိုင်းဒေသကြီး ဝန်ကြီးချုပ် ဦးတင်မောင်ဝင်းနှင့်အတူ တာဝန်ရှိသူများလိုက်ပါလျက် ယနေ့နံနက်ပိုင်းတွင် ပုသိမ်မြို့၊ ပုသိမ်စက်မှုစီမံကိန်းရုံး၌ ပို့ကုန် လုပ်ငန်းရှင်များနှင့် တွေ့ဆုံဆွေးနွေးရာတွင် ပို့ကုန်လုပ်ငန်းရှင်တစ်ဦးက စီမံကိန်းအကြောင်းရှင်းလင်းတင်ပြပြီး ပြည်တွင်း လယ်ယာထွက်ကုန်ဈေးကွက်တည်ငြိမ်စေရန်၊ ပြည်တွင်းစားသုံးမှု ဖူလုံစေရန်နှင့် တောင်သူများ၊ ပို့ကုန်လုပ်ငန်းရှင်များ အသင်းအဖွဲ့များ ပူးပေါင်းဆောင်ရွက်ရန်၊ စက်ရုံများအားလုံးလည်ပတ်ရေး ဆောင်ရွက်ရန်၊ ထုတ်လုပ်မှုစွမ်းဆောင်ရည်များတိုးချဲ့ရန်၊ အရည်အသွေးကောင်းအောင် စီမံခန့်ခွဲရန် နှင့် ကုန်သွယ်မှုသတင်းအချက်အလက်များ အချိန်နှင့်တစ်ပြေးညီ သိရှိအောင်ချိတ်ဆက် ဆောင်ရွက်ရန်တို့ကို မှာကြားသည်။
ဆက်လက်၍ ပြည်ထောင်စုဝန်ကြီးနှင့်အဖွဲ့သည် ဧရာဟင်္သာ Trading Co., Ltd. ၏ ပုသိမ် ဆန်စက်ကိုလည်းကောင်း၊ ဧရာဝတီအပြည်ပြည်ဆိုင်ရာစက်မှုဆိပ်ကမ်းကိုလည်းကောင်း၊ SHUANGXI (စွန်းချီ) ပုသိမ် Garments Co., Ltd. အထည်ချုပ် စက်ရုံကိုလည်းကောင်း သွားရောက်ကြည့်ရှုစစ်ဆေးခဲ့သည်။
ထို့နောက် ပြည်ထောင်စုဝန်ကြီးနှင့်အဖွဲ့သည် ပုသိမ်မြို့၊ Ayeywaddy Fisheries Ltd. အအေးခန်းစက်ရုံတွင် ပုစွန်သားပေါက် မွေးမြူရေးမှ ပြည်ပသို့တင်ပို့သည့် ကုန်ချောထုတ်လုပ်နေမှု အဆင့်ဆင့်ကို ကြည့်ရှုစစ်ဆေးပြီး ဝယ်ယူသည့်နိုင်ငံ၏ လိုအပ်ချက် စံချိန်စံညွှန်းပြည့်မီအောင်ဆောင် ရွက်ရန်၊ အလုပ်သမားများဘေးအန္တရာယ်ကင်းရှင်းရေး ဆောင်ရွက်ရန်နှင့် ပြည်ပသို့ ပိုမိုတိုးမြှင့်တင်ပို့ နိုင်ရန် မှာကြားသည်။
ဆက်လက်၍ ပြည်ထောင်စုဝန်ကြီးနှင့်အဖွဲ့သည် မြောင်းမြမြို့၊ Paddy Star ဆန်စက်နှင့် သိုလှောင်ရုံသို့ ရောက်ရှိပြီး စက်ရုံအတွင်း လှည့်လည်ကြည့်ရှုစစ်ဆေးပြီး လိုအပ်သည်များ ပေါင်းစပ် ညှိနှိုင်းပေးခဲ့သည်။
ထို့နောက် ပြည်ထောင်စုဝန်ကြီးနှင့်အဖွဲ့သည် ရန်ကုန်တိုင်းဒေသကြီး၊ ရွှေပြည်သာမြို့ရှိ Shwe Me Group of Company ၏ ပြောင်းသိုလှောင်ရုံသို့ ရောက်ရှိပြီး သိုလှောင်ရုံအတွင်း ပြည်ပသို့တင်ပို့ရန် အတွက် ပြောင်းများ သန့်စင်ပြီး ထုပ်ပိုးနေမှုတို့အား ကြည့်ရှုစစ်ဆေးကာ ပြည်တွင်း တိရိစ္ဆာန် အစားအစာဖူလုံမှုရှိပြီး ပိုလျှံသည့်ပြောင်းဖူးစေ့များ ပြည်ပသို့ပို့ကုန်အဖြစ် တင်ပို့နိုင်ရေး ဆောင်ရွက်ရန်၊ ပြည်ပဈေးကွက်ရရှိရေးတို့အား သတ်မှတ်စည်းမျဉ်းစည်းကမ်းအတိုင်း လိုက်နာဆောင်ရွက်သွားကြရန်မှာကြားပြီး လိုအပ်သည်များ ပေါင်းစပ်ညှိနှိုင်း ဆောင်ရွက် ပေးခဲ့ကြောင်း သတင်းရရှိသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးရုံးရှိ ဝန်ထမ်းများ ရုံးလုပ်ငန်းများဆောင်ရွက်ရာတွင် ကွန်ပျူတာကို ကျွမ်းကျင်စွာကိုင်တွယ်အသုံးပြုနိုင်ရန်အတွက် ရုံးလုပ်ငန်းသုံးကွန်ပျူတာမွမ်းမံသင်တန်း (၁/၂၀၂၄) အား ၂၀၂၄ ခုနှစ်၊ ဇန်နဝါရီလ ၈ ရက်နေ့၊ နံနက် ၁၀:၀၀ နာရီချိန်တွင် ကုန်သွယ်ရေးဦးစီးဌာန၊ ကွန်ပျူတာသင်တန်းခန်းမ၌ ဖွင့်လှစ်ခဲ့ပါသည်။
အဆိုပါသင်တန်းသို့ သင်တန်းသား (၂၀) ဦးတက်ရောက်ပြီး သင်တန်းဖွင့်ပွဲ၌ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ်မှ သင်တန်းသားများအား တွေ့ဆုံမှာကြားရာတွင် ဝန်ထမ်းအဆင့်တိုင်းကွန်ပျူတာတတ်မြောက်ထားရမည်ဖြစ်ကြောင်း၊ တာဝန်ပေးအပ် လာပါက ဆောင်ရွက်နိုင်စေရန် စနစ်တကျလေ့လာ သင်ယူသွားရမည်ဖြစ်ကြောင်း၊ လုပ်ငန်းခွင်မပျက်ကွက်စေပဲ ရက်တိုသင်တန်း ဖွင့်လှစ်ခြင်းဖြစ်သည့်အတွက် ကွန်ပျူတာအခြေခံအသုံးပြုနည်းကို သင်ကြားပေးသွားမည်ကြောင်းနှင့် စဉ်ဆက်မပြတ်လေ့လာနေရမည် ဖြစ်ကြောင်း တွေ့ဆုံမှာကြားခဲ့ပါသည်။
သင်တန်းကာလအနေဖြင့် နံနက်(၁၀:၀၀) နာရီမှ (၁၁:၃၀) နာရီအချိန်အထိ ရက်သတ္တပတ် (၂) ပတ်ကြာဖွင့်လှစ်သွားမည်ဖြစ်ပြီး သင်တန်းတွင် Microsoft Office (Word, Excel, Power Point) အား သင်ကြားပို့ချသွားမည်ဖြစ်ပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့် ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်း လဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေး ထိန်း ကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျ စရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက် ရှိပါသည်။
ယခုအပတ်အတွင်း ကမ္ဘာ့စားအုန်းဆီထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ်၊ ဇန်နဝါရီလ ၈ ရက်နေ့မှ ဇန်နဝါရီလ ၁၄ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၄,၉၅၅ ကျပ်ဖြစ်ကြောင်း ထုတ်ပြန်ကြေညာထားပါသည်။
ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့်လုပ်ဆောင်မှုများပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ် ပြန်ထားသည်။
အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။
Pages
