သောကြာနေ့၊ ၁၈ ဇန်နဝါရီလ ၂၀၁၃ 14:50 PM
မြဝတီ နယ်စပ် ကုန်သွယ်ရေး စခန်းတွင် စက်သုံး ဆီပြီလျှင် ဒုတိယ အများဆုံး ဝင်နေသည့် ကုန်ပစ္စည်း ဖြစ်သော ဘီယာသည် မိမိတို့ ဘက်သို့ တရားမဝင် တင်သွင်း နေခြင်း ဖြစ်ကြောင်း၊ အဆင့်ဆင့် စိစစ် တားဆီး ရာတွင် Mobile Team မှ အများဆုံး ဖမ်းဆီး ရမိနေကြောင်း၊ ကုန်သည် လုပ်ငန်းရှင်များကို အဓိက ပြောကြား လိုသည်မှာ တရားဝင် လမ်းကြောင်းပေါ်မှ ဆောင်ရွက်မှု များသည် အန္တရာယ် ကင်းကင်းနှင့် ဆောင်ရွက်နိုင်ပြီး တရားမဝင် သွားသည့် ပစ္စည်း များသည် Mobile Team မှ တားဆီး ထိန်းသိမ်းသည့် အနေအထားမှ ဥပဒေ အရ အရေးယူခြင်း ခံရသည့် အခြေအနေထိ ရောက်ရှိ သွားမည် ဖြစ်ကြောင်း မြဝတီ နယ်စပ် ကုန်သွယ်ရေး စခန်း တာဝန်ခံ ဦးရန်နိုင်ထွန်းက ကုန်သည် လုပ်ငန်းရှင် များကို အသိပေး ပြောကြားခဲ့ သည်ဟု သတင်း ရရှိသည်။
စားသုံးသူ အကာ အကွယ် ပေးရေးနှင့် တရားမဝင် ကုန်သွယ်မှု တားဆီးရေး Mobile Team အဖွဲ့၏ ထိန်းသိမ်း ပေးမှုကြောင့် မြဝတီ နယ်စပ် ကုန်သွယ်ရေး ဇုန်၏ ဒီဇင်ဘာလ ကုန်သွယ်မှု ပမာဏသည် ယမန်နှစ် ကာလတူ ထက် ကန်ဒေါ်လာ ၃၇ သန်းကျော် ပိုမို ဆောင်ရွက် လာနိုင်မှုသည် ထင်ရှား သိသာသော အချက်ပင်ဖြစ် ပါသည်။ အားလုံး ဘက်ပေါင်းစုံ တက်ညီ လက်ညီ ဆောင်ရွက် ခဲ့ကြ၍ ဖြစ်ပြီး နိုင်ငံတော်ပိုင်း မှလည်း ဆောင်ရွက်နိုင်သည့် ကုန်သွယ်မှု ပမာဏသန်း ၄ဝ နှင့် ညီမျှသော အခွန် ရရှိ သွားမည်ဖြစ် ပါသည်။
ပညာပေး ကာလ အတွင်းတွင် Mobile Team အဖွဲ့သည် နယ်စပ် ကုန်သွယ်ရေး ဦးစီး ဌာန/ စခန်းတို့မှ ခွင့်ပြု ထုတ်ပေးသည့် လိုင်စင်နှင့် အခွန်ပေး ဆောင်ပြီး အချိန်နှင့် တပြေးညီ စစ်ဆေးခံ သယ်ဆောင်၍ ရနိုင် သော်လည်း လိုင်စင်/ ဂျူတီမဲ့၊ အပို/ အလွဲများ၊ ကန့်သတ် ကုန်များကို ထိန်းသိမ်း ထားမည်ဖြစ်ပြီး လိုင်စင်၊ ID လုပ်ပေးပြီး မှသာ ပြန်လည် သယ်ယူခွင့် ရရှိမည် ဖြစ်ကြောင်း၊ ပညာပေး ကာလ ကျော်လျှင်မူ ဥပဒေ အရ အရေးယူမှုအား ဆောင်ရွက် သွားမည် ဖြစ်သည့် အတွက် ကုန်သည် လုပ်ငန်းရှင်များ အပိုင်းမှ နစ်နာမှု မရှိစေရေး တရားဝင် လမ်းကြောင်းမှသာ ကုန်သွယ်မှု ပြုကြရန် နှင့် လိုအပ်သည့် ကိစ္စများ ရှိလျှင် (OSS) အဖွဲ့၊ ဒေသ အုပ်ချုပ်ရေးအဖွဲ့၊ ကုန်သည်ကြီးများ အသင်းတို့ ပေါင်းစပ် ညှိနှိုင်း ဆောင်ရွက် ပေးသွားမည်ဟု မြဝတီ စခန်း တာဝန်ခံ ဦးရန်နိုင်ထွန်းကအသိပေး ပြောကြား ခဲ့သည်ဟု သတင်း ရရှိပါသည်။
Mobile Team အဖွဲ့ (၂) အနေနဲ့ အများဆုံး စစ်ဆေး တွေ့ရှိရတဲ့ ကန့်သတ် ကုန်ပစ္စည်း များမှာ ဘီယာ၊ (Leo, Heinken, Singha, Folsom, Diablo) ဝိုင် (Spy)တို့ အများဆုံး ဖြစ်နေ ပါတယ်။
Source: နကသ (မြဝတီ); MTN