စနေနေ့ ၁၉ ဇန်နဝါရီလ ၂၀၁၃ 12:39 PM
ထိုင်း နိုင်ငံတွင် ၂၀၁၃ ခုနှစ် ဇန်နဝါရီ ၁ ရက်နေ့မ စပြီး အနိမ့်ဆုံး လစာ တစ်နေ့ ဘတ် ၃၀ဝ နှုန်း တပြေးညီ သတ်မှတ် လိုက်တဲ့ အတွက် ဘန်ကောက်၊ တာချ်၊ ဆလာပူရီ၊ ဘီဆနဲ့ ဘူရီလန် စတဲ့ ခရိုင်များမှာ အလုပ်သမား ငှားရမ်းခ မတတ်နိုင်၍ စက်ရုံ အချို့ ပိတ်ခဲ့ ရသလို အလုပ်သမား ထောင်ချီ လျော့ချ ခဲ့ရပါတယ်။ တာ့ခ်ခရိုင်မှာ အထည်ချုပ်၊ လျှပ်စစ် ပစ္စည်းနဲ့ ကြွေထည် မြေထည် စတဲ့ စက်ရုံ (၈) ရုံပိတ် လိုက်ရပြီး အလုပ်သမား (၁၀ဝဝ) ကျော် အလုပ် ဖြုတ်ခဲ့ ရတယ်လို့ ထိုင်းနိုင်ငံ သတင်းမှာ ဖော်ပြထား ပါတယ်။
အနိမ့်ဆုံး လစာ တိုးပေးရတဲ့ အတွက် အလုပ်ရှင်များ နစ်နာမှု မရှိအောင် အစိုးရ အနေနဲ့ အလုပ်သမားများ အတွက် အလုပ်ရှင်မှ ပေးသွင်းရသော လူမှု အာမခံကြေး ၅ ရာခိုင်နှုန်းမှ ၄ ရာခိုင်နှုန်းသို့ လျော့ချ ပေးခြင်း၊ ရင်းနှီး မတည်ငွေ အတိုးနှုန်း လျော့ချ ပေးခြင်းများ ပြုလုပ် ပေးခဲ့ သော်လည်း အလုပ်ရှင်များ အတွက် ချေမကိုက်ဘဲ ဖြစ်နေကြောင်း၊ ဒီပြဿနာ ဖြေရှင်း ပေးနိုင်ရေး အတွက် အစိုးရမှ ပြဌာန်းချက် တစ်ခုခု ထုတ်ပေးရန် လိုကြောင်း၊ အိမ်နီးချင်း မြန်မာ နိုင်ငံမှာ စက်ရုံ၊ အလုပ်ရုံ ဖွင့်ရန် အခြေခံ အဆောက် အဦ ခိုင်ခိုင် မာမာ မရှိသေးကြောင်း၊ နိုင်ငံခြား ကုမ္ပဏီများ အနေဖြင့် လုပ်သား ဈေး သက်သာသော နေရာသို့ ပြောင်းရွှေ့ကောင်း ပြောင်းရွှေ့ နိုင်ကြောင်း၊ အလုပ်သမား ရွှေ့ပြောင်းမှု ပို၍ များလာ နိုင်ကြောင်း၊ တရားမဝင် အလုပ်သမားများကို ငှားရမ်း သုံးစွဲ လာနိုင်ပြီး သုံးစွဲသော အခါ မတရား ဖိနှိပ်မှုများ ထပ်မံ ပေါ်လာ နိုင်တယ်လို့ သတင်းမှာ ရေးသားထား ပါတယ်။
ထိုင်းနိုင်ငံ အလယ်ပိုင်း ဆရပူရီခရိုင် ဂီဟန်ဒိုင် မြို့နယ်ရှိ ဂီနာကာမေလ် အတွင်းခံ အင်္ကျီချုပ် စက်ရုံကို ကြိုတင် အကြောင်း မကြားဘဲ ပိတ်လိုက်တဲ့ အတွက် အလုပ်သမား နစ်နာကြေး ရရှိရန် အလုပ်သမား (၂၀ဝ) ကျော်ခန့် ဇန်နဝါရီလ ၂ ရက်နေ့က အလုပ်သမား ကာကွယ်ရေး ရုံးမှာ ဆန္ဒပြ ခဲ့ပြီး အလားတူ နခွန်းရာ့ချ်ဆီမား ခရိုင်မှာ စက်ရုံ၊ အလုပ်ရုံ (၄)ခု ပိတ်လိုက် သောကြောင့် အလုပ်သမား (၈၀ဝ)ကျော် အလုပ်ပြုတ် သွားခဲ့ရ ပါတယ်။ ဆူရင်း ခရိုင်မှာလည်း ဖိနပ်ချုပ် စက်ရုံ (၁) ရုံနဲ့ အထည်ချုပ် စက်ရုံ (၁)ရုံ ပိတ်လိုက် သောကြောင့် အလုပ်သမား (၄၀ဝ)ကျော် အလုပ် လက်မဲ့ဖြစ် ခဲ့ပြီး ပူရီရမ် ခရိုင်မှာလည်း အလုပ်လက်မဲ့ (၁၂၀)ဦး ရှိကြောင်း၊ မြန်မာ ပြောင်းရွှေ့ အလုပ် သမား အများအပြား လုပ်ကိုင် နေသည့် ချင်းမိုင် ခရိုင်တွင် အလုပ်သမား တစ်ချို့သာ တစ်နေ့ ဘတ်(၃၀ဝ) ရရှိပြီး အများစုမှာ မရရှိ သေးကြောင်း သတင်းတွင် ဖော်ပြထား ပါတယ်။
Source:Online manager (မြင့်ရှိန်၊ မြဝတီ)