နောက်ဆုံးရ သတင်း
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးရုံးရှိ ဝန်ထမ်းများ ရုံးလုပ်ငန်းများဆောင်ရွက်ရာတွင် ကွန်ပျူတာကို ကျွမ်းကျင်စွာကိုင်တွယ်အသုံးပြုနိုင်ရန်အတွက် ရုံးလုပ်ငန်းသုံးကွန်ပျူတာမွမ်းမံသင်တန်း (၁/၂၀၂၄) အား ၂၀၂၄ ခုနှစ်၊ ဇန်နဝါရီလ ၈ ရက်နေ့၊ နံနက် ၁၀:၀၀ နာရီချိန်တွင် ကုန်သွယ်ရေးဦးစီးဌာန၊ ကွန်ပျူတာသင်တန်းခန်းမ၌ ဖွင့်လှစ်ခဲ့ပါသည်။
အဆိုပါသင်တန်းသို့ သင်တန်းသား (၂၀) ဦးတက်ရောက်ပြီး သင်တန်းဖွင့်ပွဲ၌ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ်မှ သင်တန်းသားများအား တွေ့ဆုံမှာကြားရာတွင် ဝန်ထမ်းအဆင့်တိုင်းကွန်ပျူတာတတ်မြောက်ထားရမည်ဖြစ်ကြောင်း၊ တာဝန်ပေးအပ် လာပါက ဆောင်ရွက်နိုင်စေရန် စနစ်တကျလေ့လာ သင်ယူသွားရမည်ဖြစ်ကြောင်း၊ လုပ်ငန်းခွင်မပျက်ကွက်စေပဲ ရက်တိုသင်တန်း ဖွင့်လှစ်ခြင်းဖြစ်သည့်အတွက် ကွန်ပျူတာအခြေခံအသုံးပြုနည်းကို သင်ကြားပေးသွားမည်ကြောင်းနှင့် စဉ်ဆက်မပြတ်လေ့လာနေရမည် ဖြစ်ကြောင်း တွေ့ဆုံမှာကြားခဲ့ပါသည်။
သင်တန်းကာလအနေဖြင့် နံနက်(၁၀:၀၀) နာရီမှ (၁၁:၃၀) နာရီအချိန်အထိ ရက်သတ္တပတ် (၂) ပတ်ကြာဖွင့်လှစ်သွားမည်ဖြစ်ပြီး သင်တန်းတွင် Microsoft Office (Word, Excel, Power Point) အား သင်ကြားပို့ချသွားမည်ဖြစ်ပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့် ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်း လဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေး ထိန်း ကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျ စရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက် ရှိပါသည်။
ယခုအပတ်အတွင်း ကမ္ဘာ့စားအုန်းဆီထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ်၊ ဇန်နဝါရီလ ၈ ရက်နေ့မှ ဇန်နဝါရီလ ၁၄ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၄,၉၅၅ ကျပ်ဖြစ်ကြောင်း ထုတ်ပြန်ကြေညာထားပါသည်။
ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့်လုပ်ဆောင်မှုများပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ် ပြန်ထားသည်။
အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။
၂၀၂၃ ခုနှစ်၊ ဒီဇင်ဘာလ (၂၃ ရက် မှ ၂၉ ရက်ထိ) ရက်သတ္တပတ်အတွင်း မြန်မာနိုင်ငံ၏ ပြည်ပပို့ကုန်တင်ပို့မှုတန်ဖိုး အမေရိကန်ဒေါ်လာ ၂၇၈ သန်းကျော်ရရှိခဲ့သည်။ ယခုရက်သတ္တပတ် တွင် လယ်ယာထွက်ကုန်များမှ ဆန်၊ ပြောင်း၊ ရာဘာစိမ်းနှင့် မတ်ပဲ၊ ပဲတီစိမ်း၊ ပဲစဉ်းငုံ၊ ပဲယင်း၊ စွန်တာနီ/စွန်တာပြာပဲ၊ ပဲနီကြား၊ မြေပဲဆံတို့ ပိုမိုတင်ပို့နိုင်ခဲ့သည်။ စားဖိုဆောင်သီးနှံများဖြစ်သည့် ငရုတ်၊ ဂျင်း၊ မန်ကျည်းသီး၊ နနွင်းတက်၊ ကြက်သွန်နီများကိုလည်း တရုတ်၊ ထိုင်း၊ မလေးရှား၊ စင်္ကာပူ၊ ယီမင်၊ အိန္ဒိယ၊ ဘင်္ဂလားဒေ့ရှ်၊ ဗီယက်နမ်နိုင်ငံ ဈေးကွက်များသို့ ပမာဏများများတင်ပို့နိုင် လျက်ရှိသည်။
မြန်မာ့ပဲမျိုးစုံ၏ အဓိကဝယ်လက်ဖြစ်သော အိန္ဒိယနိုင်ငံသည် မတ်ပဲ၊ ပဲစဉ်းငုံ လွတ်လပ် စွာတင်သွင်းခွင့်ကို ၂၀၂၅ ခုနှစ်၊ မတ်လအထိ တစ်နှစ်သက်တမ်းတိုးလိုက်ပြီး ယခုနှစ်အိန္ဒိယနိုင်ငံ၏ ပဲလိုအပ်ချက်အရ ဝယ်လိုအားများလျက်ရှိသည်။ ယခုအပတ်အိန္ဒိယဈေးကွက်၌ မတ်ပဲတစ်တန် လျှင် ၈၆၀၀၀ မှ ၈၈၀၀၀ ရူပီး၊ ပဲစဉ်းငုံ တစ်တန်လျှင် ၉၀၅၀၀ မှ ၉၃၀၀၀ ရူပီး အထိပေါက်ဈေးရှိပြီး လက်ရှိပဲရာသီ၌ ပြည်တွင်းဈေးမှာ ပဲစဉ်းငုံမှာ ကျပ် ၃၃ သိန်းကျော်၊ မတ်ပဲ (FAQ) မှာ တစ်တန်လျှင် ကျပ် ၃၀ သိန်းဝန်းကျင်ဖြင့် အရောင်းအဝယ်ဖြစ်လျက်ရှိကြောင်း သိရှိရသည်။
ပြည်ပပို့ကုန်အလားအလာသည် ဝယ်လက်နိုင်ငံများ၏ ပြည်တွင်းလိုအပ်ချက်၊ ဈေးနှုန်းရရှိမှု ပေါ်မူတည်လျက်ရှိသည်။ မိမိတို့နိုင်ငံအနေဖြင့် အလားအလာရှိသော ပြည်ပဈေးကွက်များသို့ ပိုမိုတိုး တက်တင်ပို့နိုင်ရေးကို စိုက်ပျိုးသူတောင်သူများ၊ ကုန်ထုတ်လုပ်သူများ၊ ပို့ကုန်လုပ်ငန်းရှင်များ၊ အသင်း အဖွဲ့များနှင့် ဌာနဆိုင်ရာများအားလုံး ပေါင်းစပ်ညှိနှိုင်းပြီး ဝိုင်းဝန်းကြိုးပမ်းဆောင်ရွက်လျက် ရှိသည်။
ယခုရက်သတ္တပတ်၌ နိုင်ငံပိုင်ကဏ္ဍမှ မြန်မာ့ကျောက်မျက်ရတနာပြပွဲများတွင် ရောင်းချထား သည့် ကျောက်စိမ်း ၄၁၃၉ ကီလိုကို တရုတ်နိုင်ငံသို့ လည်းကောင်း၊ ကျောက်စိမ်း ၃၉၁၈ ကီလိုကို သြစတြေးလျနိုင်ငံသို့လည်းကောင်း လေကြောင်းလိုင်းဖြင့် တင်ပို့ခဲ့သည်။ ပုဂ္ဂလိကကုမ္ပဏီ အသီးသီးမှ လည်း အခြား ခဲ၊ သွပ်၊ ကြေးနီ၊ သတ္တုတွင်းထွက်ပစ္စည်းများ တန်ဖိုး အမေရိကန်ဒေါ်လာ ၈ သန်း ကျော်ကို တရုတ်၊ ထိုင်း၊ ကိုရီးယား၊ မလေးရှား၊ ဗီယက်နမ်နိုင်ငံများသို့ တင်ပို့မှုရှိသည်။
ပြည်တွင်းကုန်ထုတ်လုပ်မှုမှ ပြည်ပပို့ကုန် တိုးတက်လာစေရေးကို အဖက်ဖက်မှကြိုးပမ်း ဆောင်ရွက်လျက်ရှိရာ စိုက်ပျိုးရေး၊ မွေးမြူရေးကိုအခြေခံသည့် ကုန်ထုတ်လုပ်မှုများ တန်ဖိုးမြှင့် ထုတ်လုပ်နိုင်ရေး၊ ရေမြေသဘာဝလျောက် အရည်အသွေးရှိသော သဘာဝတွင်းထွက် ထုတ်ကုန် ကုန်ကြမ်းများအား တီထွင်ဆန်းသစ်သော နည်းလမ်းများဖြင့် အဆင့်မြှင့်တင်ပြီး တင်ပို့နိုင်ရေး၊ ရင်း နှီးမြှုပ်နှံမှုလုပ်ငန်းများ ပိုမိုတိုးတက်အောင်ဆောင်ရွက်ခြင်းဖြင့် နိုင်ငံ့စီးပွား မြင့်မားတိုးတက်အောင် ဝိုင်းဝန်းကြိုးပမ်းဆောင်ရွက်ကြရန် ယခုရက်သတ္တပတ် ပို့ကုန်တင်ပို့နိုင်မှုအခြေအနေအား ဖော်ပြ တိုက်တွန်းအပ်ပါသည်။
အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများဖွံ့ဖြိုး တိုးတက်ရေးဦးဆောင်ကော်မတီ၏ ခွင့်ပြုချက်ဖြင့် N.P.K Motors Co., Ltd. မှ တင်သွင်းလာသော တရုတ်နိုင်ငံထုတ် Leapmotor T03 (Luxury) အမျိုးအစားလျှပ်စစ်သုံးမော်တော်ယာဉ်များ Auto Top Power Co., Ltd. မှ တင်သွင်းလာသော တရုတ်နိုင်ငံထုတ် Faw Toyota bZ4X အမျိုးအစား လျှပ်စစ်သုံးမော်တော်ယာဉ်များ၊ Asia Pacific Automaker Corporation Co., Ltd. မှ တင်သွင်း လာသော တရုတ်နိုင်ငံထုတ် Dongfeng Nissan Ariyaအမျိုးအစားလျှပ်စစ်သုံးမော်တော်ယာဉ်များနှင့် Qingdao CRRC Sifang Rolling Stock Co., Ltd. မှ တင်သွင်းလာသော တရုတ်နိုင်ငံထုတ် GAC Toyota bZ4X အမျိုးအစားလျှပ်စစ်သုံးမော်တော်ယာဉ်များသည် ရန်ကုန်ဆိပ်ကမ်းသို့ ရောက်ရှိလာပါ သဖြင့် (၃-၁-၂၀၂၄) ရက်နေ့တွင် လုပ်ထုံးလုပ်နည်းနှင့်အညီ ထုတ်ယူခွင့်ပြုခဲ့ပါကြောင်းသတင်း ရရှိပါ သည်။
နေပြည်တော်၊ ဇန်နဝါရီ ၃ ၂၀၂၄ ခုနှစ်၊ ဇန်နဝါရီလ ၃ ရက်နေ့၊ နံနက်(၁၀:၀၀) နာရီအချိန်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ် (၅၂)၌ ကျင်းပပြုလုပ်ခဲ့သည့် မြန်မာနိုင်ငံ စားသုံးသူကာကွယ်ရေး ကော်မရှင် လုပ်ငန်းညှိနှိုင်းအစည်းအဝေး (၁/၂၀၂၄)သို့ မြန်မာနိုင်ငံ စားသုံးသူကာကွယ်ရေးကော်မရှင်ဥက္ကဋ္ဌ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံ တက်ရောက်အမှာစကားပြောကြားခဲ့သည်။
ကော်မရှင်ဥက္ကဋ္ဌ ပြည်ထောင်စုဝန်ကြီးက အမှာစကားပြောကြားရာတွင် မြန်မာနိုင်ငံ စားသုံး သူကာကွယ်ရေးကော်မရှင်အနေဖြင့် စားသုံးသူကာကွယ်ရေးဥပဒေ ပုဒ်မ ၂ (က) တွင် ပြဋ္ဌာန်းသော စားသုံးသူကာကွယ်ရေးဟူသည့် အဓိပ္ပာယ်ဖော်ပြချက်နှင့်အညီ စားသုံးသူကာကွယ်ရေးလုပ်ငန်းစဉ် များကို ထိရောက်စွာ အကောင်အထည်ဖော်ဆောင်ရွက်ပေးရန် အဓိကတာဝန်ရှိပါကြောင်း၊ ကုန်စည် နှင့်ဝန်ဆောင်မှုများကို သုံးစွဲခြင်းကြောင့် ဖြစ်ပေါ်လာသည့် စားသုံးသူထိခိုက်နစ်နာဆုံးရှုံးမှုများကို ထိရောက်စွာကာကွယ်ပေးနိုင်ရန်အတွက် သက်ဆိုင်ရာ ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်များအလိုက် ဦးစားပေးကုန်စည်များကို ရွေးချယ်သတ်မှတ်၍ ဆောင်ရွက်ရုံမျှသာမက စစ်ဆေးရေးမှူးများကိုလည်း ဥပဒေနှင့်အညီ ခန့်အပ်တာဝန်ပေးအပ်ထားပြီးဖြစ်သည့်အတွက် ကုန်စည်များကို ဘေးအန္တရာယ်ရှိ/မရှိ စောင့်ကြည့်စစ်ဆေးသွားရန် လိုအပ်ပါကြောင်း၊ စစ်ဆေးရေးမှူး များအနေဖြင့် သက်ဆိုင်ရာနယ်ပယ်အလိုက် တာဝန်ယူဆောင်ရွက်ရာတွင် လုပ်ငန်းကျွမ်းကျင်မှုရှိရန် လိုအပ်သကဲ့သို့ သက်ဆိုင်ရာလုပ်ငန်းတာဝန်များ၊ လုပ်ထုံးလုပ်နည်းများကိုလည်း ရှင်းလင်းပြတ်သားစွာ နားလည်သဘောပေါက်ကြရန် လိုအပ်ပါ ကြောင်း၊ သက်ဆိုင်ရာ ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်အလိုက် စားသုံးသူရေးရာကော်မတီများ၊ ဦးစီးမှူးရုံးများအနေဖြင့် စားသုံး သူတိုင်ကြားမှုများကို ဖြေရှင်းဆောင်ရွက်ရာတွင် တိုင်ကြားသူ၏ နစ်နာဆုံးရှုံးမှု၊ ကျူးလွန်ဖောက် ဖျက်ခံရမှုအပေါ်မူတည်၍ ဥပဒေနှင့်အညီ သင့်လျော်သော အရေးယူမှုများ ဆောင်ရွက်ရန်လိုအပ်သကဲ့သို့ နှောင့်နှေးကြန့်ကြာမှုမရှိဘဲ ဖြေရှင်းဆောင်ရွက်ပေးရန် လိုအပ်ပါကြောင်း၊ လာမည့် ၂၀၂၄ ခုနှစ်၊ မတ်လ ၁၅ ရက်တွင် ကျရောက်မည့် ကမ္ဘာ့စားသုံးသူအခွင့်အရေးများနေ့ အထိမ်းအမှတ် အခမ်းအနားကိုလည်း စားသုံးသူအခွင့်အရေးများ ပိုမိုကျယ်ပြန့်စွာ သိရှိနိုင်ရေးအတွက် ရည်ရွယ်၍ ကျင်းပ ဆောင်ရွက်သွားမည်ဖြစ်သဖြင့် ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်များ အလိုက် ကျင်းပဆောင်ရွက်ကြစေလိုကြောင်း ပြောကြားပါသည်။
ဆက်လက်၍ ယခင်လုပ်ငန်းညှိနှိုင်း အစည်းအဝေးဆုံးဖြတ်ချက်များအပေါ် ဆောင်ရွက်ပြီး စီးမှုအခြေအနေများ၊ ကော်မရှင်ကအဆုံးအဖြတ်ပေးရမည့် လုပ်ငန်းဆောင်ရွက်ချက်များနှင့် စပ်လျဉ်း၍ ကော်မရှင်အတွင်းရေးမှူး၊ စားသုံးသူရေးရာဦးစီးဌာန၊ ခေတ္တညွှန်ကြားရေးမှူးချုပ်က ရှင်းလင်းတင်ပြခဲ့ရာ တင်ပြချက်များအပေါ် ကော်မရှင်ဥက္ကဋ္ဌ၊ ဒုတိယဥက္ကဋ္ဌများနှင့် ကော်မရှင်အဖွဲ့ဝင် များက ဆွေးနွေး၍ ဆုံးဖြတ်ချက်များချမှတ်ခဲ့သည်။ အဆိုပါအစည်းအဝေးသို့ ကော်မရှင်ဒုတိယ ဥက္ကဋ္ဌများဖြစ်ကြသော ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်တိုးရီ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးမင်းမင်း၊ ကော်မရှင်အဖွဲ့ဝင်များ၊ ဌာနဆိုင်ရာ အကြီးအကဲများနှင့် တာဝန်ရှိသူများ တက်ရောက်ခဲ့ကြပြီး ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်စားသုံးသူရေးရာကော်မတီဥက္ကဋ္ဌများဖြစ်ကြသည့် စီးပွားရေးရာဝန်ကြီးများက Online ဖြင့် တက်ရောက်ခဲ့ကြကြောင်း သတင်းရရှိသည်။
Pages
