ပထမအကြိမ် အာဆီယံ-နယူးဇီလန် ကုန်သွယ်မှုဆိုင်ရာလေ့လာမှုအစီအစဉ်ကို ၂၀၂၃ ခုနှစ်၊ မေလ (၈) ရက်နေ့မှ (၁၂) ရက်နေ့အထိ အင်ဒိုနီးရှားနိုင်ငံ၊ ဂျကာတာမြို့၊ မီလီနန်ဟိုတယ်တွင် ကျင်းပပြုလုပ်ခဲ့ပါသည်။ အဆိုပါအစီအစဉ်သို့ နယူးဇီလန်၊ ဖိလစ်ပိုင်၊ မလေးရှား၊ အင်ဒိုနီးရှား၊ ကမ္ဘောဒီးယား၊ မြန်မာ၊ တီမောလက်စတေနိုင်ငံတို့နှင့် အာဆီယံအတွင်းရေးမှူးချုပ်ရုံးတို့မှ စုစုပေါင်းကိုယ်စားလှယ် (၁၉)ဦး အသီးသီးပါဝင် တက်ရောက်ခဲ့ကြပါသည်။ မြန်မာနိုင်ငံမှ ကိုယ်စားလှယ်များအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ အရာထမ်းကိုယ်စားလှယ် (၁) ဦးသည် ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန၊ နိုင်ငံခြားစီးပွားဆက်သွယ်ရေးဦးစီးဌာနမှ ဦးစီးအရာရှိ (၁) ဦး၊ စီမံကိန်းနှင့်ဘဏ္ဍာရေးဝန်ကြီးဌာန၊ အကောက်ခွန်ဦးစီးဌာနမှ အကောက်ခွန်မှူး (၁) ဦးတို့နှင့်အတူ စုစုပေါင်း (၃) ဦး ပါဝင်တက်ရောက်ခဲ့ ပါသည်။
ကုန်သွယ်မှုဆိုင်ရာလေ့လာမှုအစီအစဉ်တွင် ကမ္ဘာ့ကုန်သွယ်မှုစနစ်၊ ကုန်သွယ်မှုဆိုင်ရာ သဘောတူစာချုပ်များ အကောင်အထည်ဖော်ရန်အတွက် လိုအပ်သည့် ပြင်ဆင်ထားရှိမှုနှင့် ညှိနှိုင်းဆွေးနွေးမှုများ၊ ကုန်သွယ်မှုဆိုင်ရာပေါ်ပေါက်လာနိုင်သည့်ကိစ္စရပ်များနှင့် လွတ်လပ်သော ကုန်သွယ်မှုဒေသသဘောတူစာချုပ်များ အကောင်အထည်ဖော်ရာတွင် အခြေခံရမည့်အချက်များ၊ ကုန်သွယ်မှုဆိုင်ရာစေ့စပ်ညှိနှိုင်းခြင်းစွမ်းရည် (Negotiation Skill) နှင့် သက်ဆိုင်သည့် အကြောင်းအရာများကို လေ့လာခွင့်ရခဲ့ပါသည်။
အဆိုပါ ကုန်သွယ်မှုဆိုင်ရာလေ့လာမှုအစီအစဉ်သို့ တက်ရောက်ခဲ့ခြင်းကြောင့် ASEAN အဖွဲ့ဝင်နိုင်ငံများမှ ကုန်သွယ်မှုဆိုင်ရာစေ့စပ်ညှိနှိုင်းသူ (Negotiator) မျိုးဆက်သစ်များအနေဖြင့် ကုန်သွယ်မှုဆိုင်ရာ သဘောတူစာချုပ်များ၊ ကုန်သွယ်မှုဆိုင်ရာညှိနှိုင်းဆွေးနွေးမှုကိစ္စရပ်များ၊ ကုန်သွယ်မှုလွယ်ကူချောမွေ့စေရေးဆိုင်ရာကိစ္စရပ်များစသည့် ကုန်သွယ်မှုဆိုင်ရာအသိပညာများ တိုးပွားသည့်အပြင် ကုန်သွယ်ဘက်နိုင်ငံများအကြား အကောင်အထည်ဖော်ဆောင်ရသည့် အတွေ့အကြုံများကို ဖလှယ်ခွင့်ရရှိခဲ့ပါသည်။