အာဆီယံ-တရုတ် လွတ်လပ်သောကုန်သွယ်မှုသဘောတူစာချုပ် (၃.၀) အဆင့်မြှင့်တင်ခြင်းဆိုင်ရာ ထောက်ပံ့မှုကွင်းဆက်စဉ်ဆက်မပြတ်စေရေးလုပ်ငန်းအဖွဲ့၏ ဒုတိယအကြိမ်မြောက်အစည်းအဝေးအား ၂၀၂၄ ခုနှစ်၊ မေလ ၂၀ ရက်နေ့မှ ၂၁ ရက်နေ့ထိ Video Conference စနစ်ဖြင့် ကျင်းပပြုလုပ်ခဲ့ပါသည်။ အဆိုပါအစည်းအဝေးသို့ အာဆီယံအဖွဲ့ဝင်နိုင်ငံများနှင့် တရုတ်နိုင်ငံမှ ဘာသာရပ်တာဝန်ခံကိုယ်စားလှယ်များနှင့် အာဆီယံအတွင်းရေးမှူးချုပ်ရုံးမှ တာဝန်ရှိသူများ ပါဝင်တက်ရောက်ခဲ့ကြပါသည်။
အဆိုပါအစည်းအဝေးသို့ အာဆီယံနိုင်ငံများနှင့် တရုတ်နိုင်ငံတို့မှ ကိုယ်စားလှယ် (၄၃) ဦးသည် Video Conferencing စနစ်ဖြင့် ပါဝင်တက်ရောက်ခဲ့ကြပါသည်။ မြန်မာနိုင်ငံမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ အရာထမ်းကိုယ်စားလှယ် (၂) ဦးသည် Video Conferencing စနစ်ဖြင့် ပါဝင်တက်ရောက် ဆွေးနွေးညှိနှိုင်းခဲ့ပါသည်။
အစည်းအဝေးတွင် အာဆီယံ-တရုတ် လွတ်လပ်သော ကုန်သွယ်မှုသဘောတူစာချုပ် (၃.၀) အဆင့်မြှင့်တင်ရေးတွင် ထောက်ပံ့မှုကွင်းဆက်စဉ်ဆက်မပြတ်စေရေးအခန်းတွင် ပါဝင်ထည့်သွင်းမည့် နယ်ပယ်များနှင့်စပ်လျဉ်း၍ တရုတ်နိုင်ငံဘက်မှ အဆိုပြုခဲ့သည့် စာသား (မူကြမ်း) များအပေါ် အာဆီယံနိုင်ငံများမှ ပြန်လည်မေးမြန်းလာသည့်အချက်များ၊ ပြန်လည် အဆိုပြုသည့် စာသား (မူကြမ်း) များအား အဓိကထားဆွေးနွေးညှိနှိုင်းခဲ့ပါသည်။