Department of Trade

    အာဆီယံ-ကနေဒါ လွတ်လပ်သောကုန်သွယ်မှုသဘောတူစာချုပ် (ASEAN-Canada Free Trade Agreement-ACAFTA) ညှိနှိုင်းဆွေးနွေးမှုများအတွက် ဆဋ္ဌမအကြိမ်ယှဉ်ပြိုင်မှုဆိုင်ရာလုပ်ငန်း အဖွဲ့အဆင့်အကြို ညှိနှိုင်းအစည်းအဝေး(Caucus of the 6th ACAFTA WGC)ကို ၂၀၂၄ ခုနှစ်၊ မေလ ၇ ရက်နေ့တွင် Virtual စနစ်ဖြင့် ကျင်းပပြုလုပ်ခဲ့ပါသည်။                

      အစည်းအဝေးတွင် ပဉ္စမအကြိမ် ယှဉ်ပြိုင်မှုဆိုင်ရာလုပ်ငန်းအဖွဲ့အဆင့် အစည်းအဝေးတွင် ဆွေးနွေးခဲ့မှုများအပေါ် ဆောင်ရွက်ပြီးစီးမှုအခြေအနေများ၊ အာဆီယံ-ကနေဒါ လွတ်လပ်သော ကုန်သွယ်မှုသဘောတူစာချုပ် ယှဉ်ပြိုင်မှုအခန်းတွင် ထည့်သွင်းမည့်အချက်အလက်များ၊ ယှဉ်ပြိုင်မှု အခန်းအပြင် စားသုံးသူကာကွယ်ရေးအခန်းကိုပါ ထည့်သွင်းနိုင်ရေးနှင့် ဆက်လက်ဆောင်ရွက်သွားမည့် လုပ်ငန်းစဉ်တို့ကို ဆွေးနွေးခဲ့ကြပါသည်။

  အစည်းအဝေးသို့ အာဆီယံအဖွဲ့ဝင်နိုင်ငံများ၏ ယှဉ်ပြိုင်မှုကဏ္ဍမှ ကိုယ်စားလှယ်များနှင့် အာဆီယံအတွင်းရေးမှူးချုပ်ရုံးမှ ကိုယ်စားလှယ်များတက်ရောက်ခဲ့ကြပါသည်။

ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနသို့ ဌာနကူးပြောင်းရောက်ရှိလာသော ဝန်ထမ်းများနှင့် ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာန (ရုံးချုပ်) နှင့် တိုင်းဒေသကြီး / ပြည်နယ်များတွင် အသစ်ခန့်ထားသည့် ဝန်ထမ်းများကို မြန်မာနိုင်ငံရင်းနှီးမြှုပ်နှံမှုဥပဒေ၊ နည်းဥပဒေ၊ မြန်မာနိုင်ငံကုမ္ပဏီများဥပဒေ၊ လူမွဲခံယူခြင်းဆိုင်ရာဥပဒေ၊ နည်းဥပဒေများ၊ ဝန်ထမ်းစည်းမျဉ်းစည်းကမ်းများ၊ လုပ်ထုံးလုပ်နည်းများ သိရှိစေရန်၊ ရင်းနှီးမြှုပ်နှံမှုနှင့် ဆက်စပ်ဝန်ကြီးဌာနများ၏ လုပ်ထုံးလုပ်နည်းများ သိရှိစေရန်နှင့် လက်တွေ့လုပ်ငန်းခွင်တွင် လိုက်ပါဆောင်ရွက်နိုင်စေရန်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်း အမှတ်စဉ် (၁၂) ကို ၂၀၂၄ ခုနှစ်၊ ဖေဖော်ဝါရီလ ၁၃ ရက်နေ့မှ မတ်လ ၂၀ ရက်နေ့အထိ ပို့ချလျက်ရှိပါသည်။

အဆိုပါသင်တန်းတွင် ၂၀၂၄ ခုနှစ်၊ မတ်လ ၁၈ ရက်နေ့၌ ယှဉ်ပြိုင်မှုဥပဒေသင်ခန်းစာကို ယှဉ်ပြိုင်မှုကော်မရှင်ရုံးမှ လက်ထောက်ညွှန်ကြားရေးမှူး ဒေါ်ဝေရည်ကျော်က သွားရောက်ပို့ချခဲ့ပြီး ယှဉ်ပြိုင်မှုဥပဒေ၊ နည်းဥပဒေများနှင့် မြန်မာနိုင်ငံယှဉ်ပြိုင်မှုကော်မရှင်အကြောင်းကို ရှင်းလင်းဆွေးနွေးခဲ့ပါသည်။

(၃၂) ကြိမ်မြောက် အာဆီယံယှဉ်ပြိုင်မှုဆိုင်ရာ ကျွမ်းကျင်သူများအဖွဲ့ အစည်းအဝေး (ASEAN Experts Group on Competition-AEGC) နှင့် ဆက်စပ်အစည်းအဝေးများကို ၂၀၂၄ ခုနှစ်၊ မတ်လ ၁၁ ရက်မှ ၁၅ ရက် အထိ ထိုင်းနိုင်ငံ၊ ဘန်ကောက်မြို့တွင် လူကိုယ်တိုင်နှင့် Virtual စနစ်တို့ဖြင့် ပူးတွဲပုံစံ (Hybrid) ကျင်းပပြုလုပ်ခဲ့ပါသည်။ အစည်းအဝေးတွင် ၂၀၂၃ ခုနှစ်အတွက် အာဆီယံယှဉ်ပြိုင်မှုဆိုင်ရာ ကျွမ်းကျင်သူများအဖွဲ့ ဥက္ကဋ္ဌဖြစ်သူ ဖိလစ်ပိုင်ယှဉ်ပြိုင်မှုကော်မရှင် အဖွဲ့ဝင် Ms. Lolibeth Ramit-Medrano က  ၂၀၂၄ ခုနှစ်အတွက် အာဆီယံယှဉ်ပြိုင်မှုဆိုင်ရာ ကျွမ်းကျင်သူများအဖွဲ့ ဥက္ကဋ္ဌအဖြစ် ထိုင်းယှဉ်ပြိုင်မှုကော်မရှင်၊ ကော်မရှင်အဖွဲ့ဝင်ဖြစ်သူ Mr. Raksagecha Chaechai ကို တာဝန်လွှဲပြောင်းပေးအပ်ခဲ့ပါသည်။

အဆိုပါအစည်းအဝေးများ ကျင်းပပြုလုပ်ရခြင်း၏ ရည်ရွယ်ချက်မှာ အာဆီယံအဖွဲ့ဝင် နိုင်ငံများအကြား ယှဉ်ပြိုင်မှုဥပဒေ၊ ယှဉ်ပြိုင်မှုမူဝါဒများနှင့်စပ်လျဉ်း၍ လက်ရှိဆောင်ရွက်နေမှု အခြေအနေများ၊ ဆောင်ရွက်ပြီးစီးမှုအခြေအနေများ၊ ရှေ့ဆက်ဆောင်ရွက်သွားမည့် အစီအစဉ် များနှင့် ရင်ဆိုင်ကြုံတွေ့နေရသော အခက်အခဲများ၊ စိန်ခေါ်မှုများအပေါ် ဖြေရှင်းဆောင်ရွက်နိုင် မည့် နည်းလမ်းများကို ညှိနှိုင်းဆွေးနွေးနိုင်ရန်အတွက် ကျင်းပပြုလုပ်ခြင်းဖြစ်ပါသည်။

(၃၂) ကြိမ်မြောက် အာဆီယံယှဉ်ပြိုင်မှုဆိုင်ရာကျွမ်းကျင်သူများအဖွဲ့ အစည်းအဝေးနှင့် ဆက်စပ် အစည်းအဝေးများကို အောက်ပါအစီအစဉ်အတိုင်း ကျင်းပပြုလုပ်ခဲ့ပါသည် -

(က)    (၃၂)ကြိမ်မြောက် အာဆီယံယှဉ်ပြိုင်မှုဆိုင်ရာ ကျွမ်းကျင်သူများအဖွဲ့ အစည်း အဝေး (၂၀၂၄ ခုနှစ်၊ မတ်လ ၁၁ ရက်မှ ၁၃ ရက်ထိ)

( ခ )   (၂၀)ကြိမ်မြောက် အာဆီယံ-ဩစတြေးလျ-နယူးဇီလန် လွတ်လပ်သော ကုန် သွယ်မှုဒေသ ကော်မတီအစည်းအဝေး (၂၀၂၄ ခုနှစ်၊ မတ်လ ၁၄ ရက်)

( ဂ )   (၁၁)ကြိမ်မြောက် စီမံကိန်းဦးဆောင်ကော်မတီ အစည်းအဝေး (၂၀၂၄ ခုနှစ်၊ မတ်လ ၁၄ ရက်)

(ဃ)    ၂၀၂၅ ခုနှစ်အလွန် အာဆီယံယှဉ်ပြိုင်မှုဆိုင်ရာ လုပ်ငန်းစီမံချက် (ACAP) ရေးဆွဲရေးဆိုင်ရာ ပထမအကြိမ် ညှိနှိုင်းအစည်းအဝေး (၂၀၂၄ ခုနှစ်၊ မတ်လ ၁၄ ရက်)

( င )   အာဆီယံယှဉ်ပြိုင်မှု မူဘောင်သဘောတူစာချုပ် ရေးဆွဲရေးဆိုင်ရာ နဝမအကြိမ် ညှိနှိုင်းအစည်းအဝေး (၂၀၂၄ ခုနှစ်၊ မတ်လ ၁၅ ရက်)

(၃၂) ကြိမ်မြောက် အာဆီယံယှဉ်ပြိုင်မှုဆိုင်ရာကျွမ်းကျင်သူများအဖွဲ့ အစည်းအဝေး နှင့် ဆက်စပ်အစည်းအဝေးများသို့ အာဆီယံအဖွဲ့ဝင်နိုင်ငံများမှ အာဆီယံယှဉ်ပြိုင်မှုဆိုင်ရာ ကျွမ်းကျင်သူများအဖွဲ့ ကိုယ်စားလှယ်များ၊ အာဆီယံအတွင်းရေးမှူးချုပ်ရုံးမှ တာဝန်ရှိသူများ တက်ရောက် ခဲ့ကြပါသည်။

ဆက်စပ်အစည်းအဝေးများသို့ ဩစတြေးလျ၊ နယူးဇီလန်၊ ဂျပန်၊ အမေရိကန်၊ ယူကေ၊ ကနေဒါနိုင်ငံတို့နှင့် ဖွံ့ဖြိုးမှုမိတ်ဖက်အဖွဲ့အစည်းများဖြစ်သည့် GIZ အဖွဲ့မှ ကိုယ်စားလှယ်များ၊ ယှဉ်ပြိုင်မှုဆိုင်ရာကျွမ်းကျင်သူများ တက်ရောက်ခဲ့ကြပါသည်။