စာပေနှင့်အနုပညာမူပိုင်ခွင့်မှတ်ပုံတင်ခြင်းဆိုင်ရာ ကိုယ်စားလှယ်သင်တန်းအမှတ်စဉ် (၁/၂၀၂၄) ဖွင့်လှစ်ခြင်း

နေပြည်တော်၊ ဇန်နဝါရီလ   ၈

   မူပိုင်ခွင့်ဦးစီးဌာန၏ စာပေနှင့်အနုပညာမူပိုင်ခွင့်မှတ်ပုံတင်ခြင်းဆိုင်ရာ ကိုယ်စားလှယ်သင်တန်း အမှတ်စဉ် (၁/၂၀၂၄) ဖွင့်ပွဲအခမ်းအနားကို ၂၀၂၄ ခုနှစ်၊ ဇန်နဝါရီလ ၈ ရက်နေ့တွင် နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ်(၅၂)၌ Virtual စနစ်ဖြင့် ကျင်းပခဲ့ရာ မူပိုင်ခွင့်ဦးစီးဌာနမှ ညွှန်ကြားရေးမှူးချုပ်၊ ဒေါက်တာမိုးမိုးသွယ်က အဖွင့်အမှာစကား ပြောကြားသည်။

   အဆိုပါသင်တန်းကို မူပိုင်ခွင့်ဦးစီးဌာနမှ စာပေနှင့်အနုပညာမူပိုင်ခွင့်မှတ်ပုံတင်ခြင်းများ လက်ခံဆောင်ရွက်ရာတွင် လျှောက်ထားသူများကိုယ်စားဆောင်ရွက်မည့် ကိုယ်စားလှယ်များကို စာပေနှင့်အနုပညာမူပိုင်ခွင့်ဥပဒေ၊ စာပေနှင့်အနုပညာမူပိုင်ခွင့်အကြောင်းသိကောင်းစရာများ၊ မူပိုင်ခွင့်မှတ်ပုံတင် ခြင်းအတွက် Copyright Registration System အသုံးပြုမှုနည်းပညာပိုင်းဆိုင်ရာများအား သိရှိနိုင်စေရန် ရည်ရွယ်၍ ဖွင့်လှစ်ခြင်းဖြစ်ပါသည်။

   စာပေနှင့်အနုပညာမူပိုင်ခွင့်မှတ်ပုံတင်ခြင်းဆိုင်ရာ ကိုယ်စားလှယ်သင်တန်းကို ၂၀၂၄ ခုနှစ်တွင် ပထမအကြိမ် ဖွင့်လှစ်ခြင်းဖြစ်ပြီး သင်တန်းတွင် မူပိုင်ခွင့်နှင့်အပြည်ပြည်ဆိုင်ရာစာချုပ်များ၊ စာပေနှင့်အနုပညာမူပိုင်ခွင့်ဥပဒေနှင့် စာပေနှင့်အနုပညာမူပိုင်ခွင့်အကြောင်း သိကောင်းစရာများ၊ စာပေနှင့်အနုပညာလက်ရာများ၊ ဆက်နွယ်သည့်အခွင့်အရေးဆိုင်ရာ ကိစ္စရပ်များကို မှတ်ပုံတင်ခြင်းဆိုင်ရာ နည်းဥပဒေ၊ စာပေနှင့်အနုပညာမူပိုင်ခွင့်မှတ်ပုံတင်ခြင်းနှင့် စပ်လျဉ်းသည့် လျှောက်လွှာများနှင့် အခကြေးငွေများ၊ စာပေနှင့်အနုပညာမူပိုင်ခွင့် မှတ်ပုံတင်ခြင်းအတွက် Copyright Registration System အသုံးပြုမှု  နည်းပညာပိုင်းဆိုင်ရာများနှင့်  အသုံးပြုမှုနည်းလမ်းများကိုလက်တွေ့သရုပ်ပြခြင်း၊  မူပိုင်ခွင့်ဆိုင်ရာကိုယ်စားလှယ်၏  အခန်းကဏ္ဍ၊  မှတ်ပုံတင်လျှောက်ထားခြင်းနှင့်စပ်လျဉ်း၍ ကိုယ်စားလှယ်များ သိရှိလိုက်နာသင့်သည့် အချက်များစသည့်တို့ကို ဒုတိယညွှန်ကြားရေးမှူးချုပ်နှင့်  ညွှန်ကြားရေးမှူးများ၊ ဘာသာရပ်ဆိုင်ရာ တာဝန်ယူဆောင်ရွက်နေသူများမှ သင်ကြားပို့ချပေးသွားမည်ဖြစ်သည်။

   အဆိုပါ သင်တန်းကို ၂၀၂၄ ခုနှစ်၊ ဇန်နဝါရီလ (၈) ရက်နေ့မှ (၁၅) ရက်နေ့အထိ(ရုံးပိတ်ရက်မပါ) (၅) ရက်ကြာ ဖွင့်လှစ်သင်ကြားသွားမည်ဖြစ်ပြီး သင်တန်းသား/သူ စုစုပေါင်း(၉၁)ဦးနှင့် လေ့လာသူ (၇)ဦး တက်ရောက်ကြောင်း သတင်းရရှိသည်။