ပညာပေး/လှုပ်ရှားမှုများ

စိတ်အဟာရ အလှမွေးငါးကလေးများနှင့် ပို့ကုန် လူသားမှန်သမျှအားလုံးတို့သည် နေ့စဉ်နှင့်အမျှ သမုဒ္ဒရာဝမ်းတစ်ထွာအတွက် လူမှုဆက်ဆံရေး နယ်ပယ် တွင် နေ့စဉ်နှင့်အမျှလွှဲရှောင်မရ ထိတွေ့ဆက်ဆံနေကြရမည်ဖြစ်ပေသည်။ ထိုသို့ဆက်ဆံရာတွင် ပျော်ရွှင်ခြင်း၊ ဝမ်းနည်းခြင်း၊ ချစ်ခြင်း၊ မုန်းခြင်း၊ အောင်မြင်ခြင်း၊ ရှုံးနိမ့်ခြင်းဟူသော ဝိရောဓိများနှင့် လောကနိယာမတရားများကို နိစ္စဓူဝ ရင်ဆိုင် တွေ့ကြုံနေကြရမည် ဖြစ်ပေသည်။ ထိုထိုဤဤ အချင်းအရာများကိုတော့ “စိတ်“ ဟူသော အသိက ဦးဆောင်နေပြီး စိတ်၏ စေညွှန်းရာအတိုင်း “နာမ်“ ဟူသော ရုပ်ခန္ဓာက လိုက်ပါဆောင်ရွက်နေရခြင်းဖြစ်ပေသည်။ ထို့ကြောင့် ကုသိုလ်ကောင်းမှုပြုခြင်းသည်လည်းကောင်း၊ အကုသိုလ်မကောင်းမှု ပြုခြင်းကိုလည်းကောင်း၊ အရာရာကို စိတ်က သာ ဦးဆောင်နေကြောင်း “စိတ်သာရှင်စော“ဟု မြတ်ဗုဒ္ဓက ဟောကြားခဲ့ခြင်းဖြစ်ပါသည်။ မြန်မာစကားပုံတွင် စိတ်နှင့်ပတ်သက်၍ “စိတ်ထောင်းလို့ကိုယ်ကြေ“ ဆိုသော စကားမှာ လူမှုဆက်ဆံရေး နယ်ပယ်တွင် အဆင်မပြေမှုများစွာ ကြုံတွေ့လာရသောအခါ စိတ်ဖိစီးမှု (Stress) ဖြစ်ပေါ်ကာ စိတ်ပင်ပန်းနွမ်းနယ်မှု ၊ စိတ်ကျရောဂါနှင့် အခြားရောဂါပေါင်းစုံတို့က အလွယ်တကူ ဝင်ရောက်လာနိုင်ခဲ့သဖြင့် လူဘဝ၏ ကျဆုံးမှုကို ဖြစ်စေသည်။ အလားတူ ဆန့်ကျင်ဘက် စကားပုံဖြစ်သော “ စိတ်ပျိုမှ ကိုယ်နု“ ဟူသော စကားပုံလည်းရှိသည်။ လောကသုံးပါးစလုံးကို ရှုမြင်ရာတွင် အရာရာကို ယထာဘူတကျကျ တွေးခေါ်ဆင်ခြင်ခြင်း နှင့် မတူကွဲပြား ခြားနားသည်တို့ကိုလည်း အကောင်းဘက်မှ ရှုမြင်သုံးသပ်ကာ သည်းခံခွင့်လွှတ်သည့်စိတ်ဓါတ်ဖြင့် ကူညီတတ် သူတို့မှာ အောင်မြင်မှုများနှင့်အတူ အစဉ်နုပျိုလန်းဆန်းနေမည်သာဖြစ်ကြောင်း စိတ်နှင့်ပတ်သတ်သော တင်စား သည့် မြန်မာစကားပုံများဖြစ်သည်။ ယနေ့ စိတ်ပညာရှင်များက ကျန်းမာရေးအတွက် စိတ်လူမှုဆက်ဆံရေးသည် များစွာအရေးကြီးကြောင်း တင်ပြလာကြသည်။ စိတ်ကျန်းမာရေးအတွက် အခြေခံစိတ်အဟာရနှင့် ဖြည့်စွက်စိတ်အဟာရများ ဖြည့်ဆည်းရေး ကိုဆောင်ရွက်ရန်လိုအပ်ပါသည်။ လူသားတို့သည် မိမိတို့၏ကိုးကွယ်ယုံကြည်ရာ ဘာသာတရား၏ ကောင်းမြတ် သော အဆုံးအမ တရားများကိုလေးစားလိုက်နာခြင်း၊ ဗုဒ္ဓဘာသာဝင်များအတွက် ဗုဒ္ဓအဆုံးအမ တရားတော်များ၊ (၃၈)ဖြာ မင်္ဂလာတရားတော်နှင့် လောကနီတိကျင့်ဝတ်များသည် လူတစ်ဦးချင်း တစ်ယောက်ချင်းစီတို့၏ အခြေခံ စိတ်အဟာရများပင်ဖြစ်သည်။ လူသားတို့သည် အခြေခံစိတ်အဟာရများအပြင် ဖြည့်စွက်စိတ်အဟာရ များကိုလည်း ကျွေးမွေးရန်လိုအပ်ရာ ကမ္ဘာပေါ်ရှိ မြေပေါ်မြေအောက်၊ ရေပေါ်ရေအောက်ရှိ သဘာဝ အလှ တရားများနှင့် လူလုပ်အလှတရားတို့၏ ထူးခြားဆန်းပြား သည်ကို ကြည်နူးလေ့လာခံစား စိတ်အပန်းဖြေခြင်းသည် အခြေခံစိတ်အဟာရအတွက် လိုအပ်သောဖြည့်စွက် စိတ်အဟာရများပင်ဖြစ်ပေသည်။ ယခုအခါ လူတို့သည် စိတ်ကျန်းမာရေးကို အလေးထားဆောင်ရွက်လာကြပြီး နေအိမ်ပတ်ဝန်းကျင်တွင် သစ်ပင်ပန်းမာန်များစိုက်ပျိုးခြင်း၊ နေအိမ်အတွင်း အလှအပများပြုပြင်မွမ်းမံခြင်း၊ သစ်ပင်ပန်းပင်ငယ်များ၊ အလှ စိုက်ပျိုးခြင်း၊ အလှမွေးငါးကလေးများကို မွေးမြူခြင်းဖြင့် စိတ်အပန်းဖြေစေရေး (သို့) ဖြည့်စွက်စိတ် အဟာရ ဖြည့်တင်းရေးကို ဆောင်ရွက်လာကြပြီဖြစ်သည်။ ဧည့်ခန်းအတွင်းသို့ ဝင်လိုက်သည်နှင့် အေးချမ်းမှုနှင့်အတူ အလှမွေး ငါးကန်လေးအတွင်း လွတ်လပ်စွာကူးခတ်နေသော ငါးကလေးနှင့် ညအခါ မီးရောင်စုံများကြားတွင် သဘာဝပတ်ဝန်းကျင်အတိုင်း ပြုပြင်ဖန်တီးထားသော ငါးကန်းအတွင်း ပျော်ရွှင်မြူးတူးစွာ ဆော့ကစားနေသော ငါးကလေးများကို ကြည့်ရှုရသည်မှာ ည၏အေးချမ်းမှုနှင့်အတူ ကြည်နူးမှုအရသာ (သို့) ဖြည့်စွက် စိတ်အဟာရ ကျွေးရသည်မှာ ဖော်မပြတတ်သော စိတ်ခံစားမှုတစ်မျိုးပင်ဖြစ်သည်။ တချို့ ဖွံ့ဖြိုးပြီးနိုင်ငံများတွင် သဘာဝ ရေဥယျာဉ်ကြီးများ တည်ဆောက်ကာ ပင်လယ်ငါးမန်းကြီးများ၊ မိကျောင်းများ၊ ပင်လယ်လိပ်ကြီးများ၊ လင်းပိုင်များနှင့် ရေသတ္တဝါအမျိုးမျိုးကို ကြီးကျယ်ခမ်းနားစွာမွေးမြူ၍ စိတ်အပန်းဖြေ အဟာရ ကျွေးမွေးခြင်းကို ဆောင်ရွက်လျက်ရှိသည်။ ယခင်က ငါးအလှကလေးများကို နိုင်ငံခြားမှဝယ်ယူ၍ ဆောင်ရွက်ခဲ့ကြသော်လည်း ယခုအခါ မြန်မာ့ သဘာဝ ရေချိုငါးအလှလေးများကို နိုင်ငံတကာသို့ ပို့ကုန် အမယ်တစ်မျိုးအဖြစ် တင်ပို့နေကြပြီဖြစ်သည်။ မြန်မာ့ သဘာဝ ငါးအလှလေးများကို မြန်မာနိုင်ငံငါးလုပ်ငန်းအဖွဲ့ချုပ် အောက်ရှိ ငါးအလှမွေးမြူသူများအဖွဲ့က မြန်မာ နိုင်ငံအရပ်ရပ်ရှိ တံငါသည်များနှင့်ညှိနှိုင်းကာ ဖမ်းယူ၍တင်ပို့လျှက်ရှိသည်။ တင်ပို့သည့် အလှမွေးငါး အမျိုး အစားများမှာ ငါးနီချောင်၊ ငါးခုံးမ၊ စမ်းငါးကျီး၊ တံငါငို၊ ငါးမြီးဝါ၊ ငါးမြီး လောင်းလေး၊ ငါးရွှေစာရေး၊ ငါးကြေးဆတ်၊ ငါးမွေထိုး၊ ငါးပနော်၊ ငါးဝက်ထော်၊ ငါးလေးသည်တော်၊ ငါးပုလဲဒိုင်နို့၊ ငါးကွက်ကြား၊ ငါးညောင်ရွှေ၊ ငါးသငယ်၊ ငါးမီးနီခေါင်းနီ၊ ငါးလေပြေ၊ ငါးကြေးနီပြတ်၊ ငါးပြားဆင်၊ ငါးကွက်ကြ၊ ငါးပြား၊ ငါးပက်လက် စသည့် မြန်မာပြည်အနှံ့အပြားရှိ မြစ်ချောင်း၊ အင်းအိုင် များမှထွက်ရှိသော ရေချိုငါးကလေးများ ကို တံငါငယ်များက ပိုက်ငယ်၊ မြုံး၊ ရင်ကွဲမြုံး၊ ရေကွင်း စသည့်ငါးဖမ်းကရိယာများဖြင့် ဖမ်းယူကြသည်။ ငါးအမျိုးအစား အလိုက်တစ်ကောင်လျှင် အနည်းဆုံး ၄၀ိ/- ကျပ် ပေး၍ဝယ်ရကြောင်းသိရှိရသည်။ အလှမွေးငါးကလေးများကို နိုင်ငံတကာသို့ လေကြောင်းလိုင်းဖြင့်တင်ပို့ကြသည်။ ထုပ်ပိုးပုံနည်းစနစ်မှာ ပလပ်စတစ်အိတ်အတွင်းသို့ ငါးကလေး များကို ရေနှင့်ရောကာ ထည့်သွင်းရသည်။ ထို့နောက် ပလပ်စတစ်အိတ်အတွင်းသို့ အောက်စီဂျင် ( ၂ )ဆ ထပ်မံ ဖြည့်ထည့်ပြီး၊ အလုံပိတ်ကာ ဖော့ဘူးအတွင်းထည့်ရသည်။ ဖော့ဘူးတစ်လုံးလျှင် ( ၄ ) ထုပ် ဆံ့ပြီး၊ အလေးချိန် ( ၁၈ Kg ) ခန့် လေးသည်။ ငါးကလေးများမှာ ပလပ်စတစ်အိတ်အတွင်း အနည်းဆုံး ( ၂၄ ) နာရီ ရှင်သန်နေထိုင်နိုင်ကြောင်း သိရှိရပြီး တင်ပို့သည့်နိုင်ငံများမှာ ထိုင်းနိုင်ငံ၊ စင်္ကာပူနိုင်ငံ၊ မလေးရှားနိုင်ငံ၊ တရုတ်နိုင်ငံ၊ ဟောင်ကောင်၊ ဂျပန်နှင့် ကူဝိတ် နိုင်ငံတို့ဖြစ်သည်။ ဝယ်လိုအားအများဆုံးနိုင်ငံမှာ စင်္ကာပူနိုင်ငံ ဖြစ်ကြောင်းသိရှိရသည်။ တင်ပို့မှုအနေဖြင့် ၂၀၁၀ - ၂၀၁၁ ခုနှစ်တွင် တန်ချိန် (၈)တန်ကျော်ခန့် တန်ဘိုး အမေရိကန်ဒေါ်လာ ၂၀၀၀၀ ကျော်ခန့်၊ ၂၀၁၁ - ၂၀၁၂ ခုနှစ်တွင် တန်ချိန်(၉) တန်ကျော်ခန့်၊ တန်ဘိုး အမေရိကန်ဒေါ်လာ ၂၇၀၀၀ ခန့်တင်ပို့ ခဲ့သည်ကို တွေ့ရှိရသည်။ ကာလတူ နှိုင်းယှဉ်ကြည့်သည့်အခါ တန်ချိန်နှင့် တန်ဘိုးပိုမိုတိုးတက်လာသည်ကို တွေ့ရှိရသည်။ လက်ရှိ ၂၀၁၂ - ၂၀၁၃ ဘဏ္ဍာနှစ်အတွက် ငါးအလှ တင်ပို့မှု အတွက် အခြေအနေကောင်းသည့် လက္ခဏာတစ်ရပ်ပင်ဖြစ်ပေသည်။ မြန်မာ့သဘာဝ ရေချိုငါးအလှကလေးများသည် မြန်မာပြည်အနှံ့အပြားပေါများကြွယ်ဝလှပါသည်။ ယနေ့ ဒီမိုကရေစီ နိုင်ငံသစ်တွင် ကုန်သွယ်မှု လျှင်မြန်ချောမွေ့စေရေးအတွက် ဖြေလျော့မှုများစွာဖြင့် ကုန်သွယ်မှု တန်ဘိုး တိုးမြှင့်စေရန် ကြိုးပမ်းဆောင်ရွက်လျှက်ရှိသည်။ နိုင်ငံတကာမှ တားဆီးပိတ်ပင်မှုများ ဖြေလျော့လိုက်ပြီး နိုင်ငံခြား ရင်းနှီးမြှုပ်နှံမှုများအလုံးအရင်းနှင့် ဝင်ရောက်လာကာ နိုင်ငံတကာသို့ လေကြောင်းလိုင်း (၂၁) လိုင်းဖြင့် ရန်ကုန် ၊ မန္တလေး၊ နေပြည်တော်မှသည် အာရှ ၊ ဥရောပမြို့ကြီးသို့ လေကြောင်းလိုင်းများ တိုးချဲ့ကာ ပျံသန်းနေပြီဖြစ်သည်။ အလားတူ ပြည်တွင်းလေကြောင်းလိုင်းများလည်း တိုးချဲ့ပျံသန်းလာပြီဖြစ်၍ လေယာဉ်ဖြင့် တင်ပို့ကြရသော ရေထွက်ကုန်ပစ္စည်း ငါးများအတွက် ကုန်သွယ်မှု လျင်မြန်လာပြီဖြစ်ပါသည်။ သိုပါ၍ ဈေးကွက်ရှာဖွေဖော်ထုတ်ကာ ကုန်သွယ်မှုမြှင့်တင်နိုင်ပါက သဘာဝငါးအလှ အရင်းအမြစ်အပေါ် ကြွယ်ဝလှသော မြန်မာပြည်အတွက် မြန်မာ့ ငါးအလှလေးများက ကျေးလက်နေပြည်သူတို့၏ ဆင်းရဲမှု လျော့ချရေးနှင့် ကျေးလက်နေပြည်သူတို့နှင့် တိုင်းပြည် ဝင်ငွေအားတဖက်တလမ်းမှ ကူညီရှာဖွေပေးမည့် ပို့ကုန်ပစ္စည်းအမယ်တစ်မျိုးဖြစ်လာတော့မည် ဖြစ်ကြောင်း ရေးသား တင်ပြလိုက်ရပါသည်။ (ထွန်းမြင့်ထွန်း) ပို့ကုန်ဌာန

စင်္ကာပူနိုင်ငံသို့ ခြေဆန့်တော့မည့် မြန်မာ့ဖရဲသီး အာဖရိကတိုက်တွင် စတင်စိုက်ပျိုးခဲ့သည်ဟု ယူဆကြသည့် ဖရဲသီးကို ယခုအခါ ကမ္ဘာတစ်ဝှမ်း စိုက်ပျိုး လာပြီ ဖြစ်ပါသည်။ ဖရဲသီးအား အစိတ်လေးများ စိပ် ၍လည်းကောင်း၊ ဖရဲသီးဖျော်ရည် အဖြစ်လည်းကောင်း၊ ဝိုင်အဖြစ်လည်း ကောင်း စားသုံးလျက်ရှိကြပါသည်။ ဖရဲသီးတွင် ရေဓါတ် ၉၂ % ပါဝင်ခြင်းကြောင့် အထူးသဖြင့် ပူအိုက်သည့် နွေရာသီ တွင် ဖရဲသီးအား စားသုံးခြင်းဖြင့် ရေငတ်ပြေစေနိုင်ပြီး စိတ်လန်းဆန်းမှုကို ဖြစ်စေနိုင်ပါသည်။ ဖရဲသီးတွင် ဘီတာမင်နှင့် သတ္တုဓါတ်များပါဝင်၍ ကျန်းမာရေးအတွက် ကောင်းမွန်စေသည့် အသီးဖြစ်ပါသည်။ ထို့အပြင် ကယ်လိုရီပါဝင်မှုနည်းပါး ၍အဆီဓါတ်ပါဝင်မှုမရှိခြင်း၊ အမျှင်ဓါတ်၊ ဘီတာမင်အေနှင့်စီ ပါဝင်မှုမြင့်မား၍ ကိုယ်အလေးချိန်လျှော့ချလိုသူများအတွက် သင့်တော်ကောင်းမွန်သည့်အသီး အဖြစ်လက်ခံထားကြပါသည်။ ဖရဲသီးတွင် ပိုတက်စီယမ်ပါဝင်မှု ကြွယ်ဝခြင်း ကြောင့်သွေးတိုးခြင်းနှင့် ကျောက်ကပ်တွင် ကျောက်တည်မှု အား ချေဖျက်ပေးနိုင်သည့် အစွမ်းသတ္တိရှိကြောင်း လေ့လာ တွေ့ရှိရပါသည်။ အဆိုပါ အစွမ်းသတ္တိများအပြင် လူခန္ဓာကိုယ်အသားအရေ အတွက် သဘာဝတိုနာ (Toner) အဖြစ် လည်းကောင်း၊ အစိုဓါတ်ထိန်းသိမ်းပေးသည့် Moisturizer အဖြစ်လည်းကောင်း အသုံးပြုနိုင်ကြောင်း တွေ့ရှိရပါသည်။ ဤကဲ့သို့ အမျိုးမျိုးအဖုံဖုံအသုံးဝင်သည့် ဖရဲသီးကို ယခင်က မူဆယ်နယ်စပ်မှတစ်ဆင့် တရုတ်နိုင်ငံသို့ တင်ပို့ ရောင်းချနေရာမှ ယခုအခါ ဝယ်လိုအား နည်းပါး လာခြင်းကြောင့် ဈေးကွက်ချဲ့ထွင်သည့် အနေဖြင့် ကုမ္ပဏီ တစ်ခုသည် စင်္ကာပူနိုင်ငံသို့ တင်ပို့ရန် ကုန်သွယ်ရေးညွန်ကြားမှုဦးစီးဌာနတွင် ပို့ကုန်လိုင်စင် လာရောက်လျှောက် ထားပြီး ဖြစ်ကြောင်း သိရှိရပါသည်။ အဆိုပါဖရဲသီးများအား ကဒ်ထူစက္ကူပုံးများဖြင့် ထုပ်ပိုးပြီး စင်္ကာပူနိုင်ငံသို့တင်ပို့သွားမည်ဖြစ်ကြောင်း သိရှိရပါသည်။ သို့ဖြစ်ပါ၍ မြန်မာ့သစ်သီးဝလံများ စင်္ကာပူနိုင်ငံသို့ ခြေဆန့်လျက်ရှိနေသည့် ယ္ခုအချိန်တွင် မြန်မာ့ဖရဲသီး ကလည်း ဈေးကွက်ချဲ့ထွင်သည့်အနေဖြင့် စင်္ကာပူနိုင်ငံသို့ သွားရောက်တော့မည့်အကြောင်းသိရှိနိုင်ရန် သတင်းကောင်း ပါးလိုက်ရပါသည်။ စန္ဒာထွန်း (ပို့ကုန်)

မြန်မာ့ လက်ရာများအတွက်ပို့ကုန်ဈေးကွက်သစ်ရှာဖွေရေး

မြန်မာ့သစ် အချောထည်များကို တင်ပို့လျှက်ရှိသည့် ရွှေကြယ် ကုမ်ပဏီသည် အယ်ဗားရှား (ALBASIA LVL – Laminated Veneer Length) သစ်များကို ပြည်ပနိုင်ငံများမှ (မလေးရှား၊ ထိုင်း) တင်သွင်း ပြီး ဂျပန်ရိုးရာ ဘုရားစင်အစိတ်အပိုင်းများပြုလုပ်ကာ ရှီကိုကု (SHIKOKU –Thailand) ကုမ်ပဏီသို့ ပြန်လည်တင်ပို့လျှက်ရှိပါသည်။ အယ်ဗားရှား သစ်၏ Country of Origin မှာ အင်ဒိုနီးရှား နိုင်ငံဖြစ်ပြီး ၎င်းသစ်များကို ထိုင်းနိုင်ငံရှိ ရှီကိုကု (SHIKOKU –Thailand) ကုမ်ပဏီနှင့် APP Timber Ltd တို့မှ တဆင့် ဝယ်ယူတင်သွင်းပြီး၊ ထုတ်လုပ်ပြီးသည့် ကုန်ချောများကို ထိုင်းနိုင်ငံရှိ ၎င်းကုမ်ပဏီ သို့သာ ပြန်လည်တင်ပို့ နေရသဖြင့် အမှန်တကယ်ထွက်ရှိသည့် ဈေးကွက် နှင့် အမှန်တကယ် ဝယ်လက်ရှိသည့် နိုင်ငံများနှင့် ချိတ် ဆက်ဆောင် ရွက်နိုင်ရေး တွန်းအားပေးဆောင်ရွက် သင့်ပါသည်။ မြန်မာနိုင်ငံသည် သစ်အများ အပြား ထွက်ရှိ ပြီး ၎င်း သစ်အမျိုအစားများကိုလည်း စိုက်ပျိုးနိုင်ရေး ဆောင်ရွက် သွားသင့်ပါသည်။

                                                                                                                                                                               (NNL-AD)

                                                                                                                                                                                            (DOT_EXP)

(က) ကုမ္ပဏီ Letter Head ဖြင့် လျှောက်လွှာမူရင်း။

(ခ) Online Application Form ။ ၆၀၀ ကျပ်တန် တံဆိပ်ခေါင်းကပ်ပြီးလျှောက်လွှာ။

(ဂ) ပြည်ပကုမ္ပဏီနှင့် ချုပ်ဆိုထားသော အရောင်းအဝယ်စာချုပ် (Sales Contract/Invoice)။

(ဃ) ချုပ်ပြီးအထည်လျှောက်ထားလျှင် စက်မှုဝန်ကြီးဌာန၊ မြန်မာ့အထည်အလိပ်လုပ်ငန်းထောက်ခံချက်။

(င) ဖိနပ်၊ Transformer Parts လျှောက်ထားလျှင် MIA မြန်မာနိုင်ငံစက်မှုကုန်ထုတ်လုပ်သူများအသင်း၏

ထောက်ခံချက်။

(စ) CMP လိုင်စင်လျှောက်ထားမှု စိစစ်ထောက်ခံရေးအဖွဲ့၏ ထောက်ခံချက်။

(ဆ) လျှောက်ထားသည့် ကုမ္ပဏီ၏ ကိုယ်စားလှယ်ကဒ် မူရင်း/မိတ္တူ ။

(ဇ) သင်္ဘောတင်ပြီးစီးမှုကို ဌာနသို့ အထောက်အထားဖြင့် တင်ပြရန်။

ထန်းပင်ကို အညာဒေသတွင် ပဒေသာပင်ဟုခေါ်ဆိုပြီး နှစ်ရှည်သီးနှံအမျိုးအစားတွင်ပါဝင်သော ထန်းပင်တွေ ကို မြန်မာနိုင်ငံရှိ မြေပြန့်ဒေသများတွင် အများဆုံးတွေ့ရှိရပြီး မြန်မာနိုင်ငံအောက်ပိုင်းတွင် ထားဝယ်မြို့၊ အလယ်ပိုင်းတောင်ငူမြို့နှင့် အထက်ပိုင်းတွင်တောင်သာ၊ကျောက်ပန်းတောင်း၊မလှိုင်၊ရေစကြိုမြို့ များ ၌ ထန်းတော ကြီးများကို အများအပြား တွေ့ရပါတယ်။

ထန်းသီးများကို တော်သလင်း၊သီတင်းကျွတ်တွင် စိုက်ပျိုးလေ့ရှိကြပြီး အသီးများအနေဖြင့်မူ ဝါဆို၊ ဝါခေါင်လတွင်မှည့်ကြပါတယ်။ ထန်းပင်တစ်ပင်ဖြစ်ဖို့ ဆိုရင် ထန်းသီးစေ့ကို စိုက်ပျိုးရပြီး တစ်နှစ်ခန့်အကြာမှာ အပင်ပေါက်ကလေးဟာ မြေပေါ်ကို ထွက်လာပါတယ်။ အရွယ်ရောက်ထန်းပင်ကို ကုန်းပေါ်တွင် (၂၅)နှစ်သား အရွယ်တွင်လည်း ကောင်း၊ ချိုင့်ထဲတွင် (၁၅)နှစ်သားအရွယ်မှစ၍ ပန်းပြလေ့ရှိကြောင်းသိရပါတယ်။ ထန်းပင် သက်တမ်းဟာ နှစ် ၁၀၀ခန့်အထိ ရှိပါတယ်။ ထန်းသီးမှာ အဖိုပင် နှင့်အမပင် ရှိပါတယ်။ အဖိုပင်ရဲ့ ထန်းနို့ကို လှီးရင် ထန်းရည်ချို ထွက်ပြီး အမပင် က အသီးသီးပါတယ်။ အမပင်၏ ထန်းသီးခိုင်ကို ညှပ် နဲ့ညှပ်ပြီး ထန်းရည်ထုတ်ယူနိုင်ပါတယ်။ ထန်းမပင်များသည် တန်ခူးလပြည့်ကျော်မှ တော်သလင်းလအထိ ထန်းရည် ထွက်ပြီး ထန်းဖိုပင်များသည် ပြာသိုလနောက်ပိုင်းမှ ကဆုန်လကုန်အထိ ထန်းရည်ရရှိနိုင်ပါတယ်။ ထန်းပင် သက်တမ်း နှစ်(၆၀)ရှိလျှင် ထန်းရည်မရရှိတော့ခြင်း၊ ကြီးထွား ဖြစ်ထွန်းမှု မရှိတော့ဘဲ ပင်အိုအဖြစ် သတ်မှတ် ကြောင်းသိရှိရပါတယ်။

ထန်းပင်တစ်ပင်လုံးသည် လူသားများအတွက် အကျိုးပြုပါတယ်။ ထန်းပင်မှထန်းပင်ပေါက် (ထန်းပင် မြစ်)၊ထန်းလုံး(ပင်စည်)၊ထန်းရွက်၊ထန်းလက်၊ထန်းစစ်၊ထန်းသီး၊ထန်းနို့(အဖိုပွင့်အခိုင်)စသည်ဖြင့်အသုံးချ နိုင် ပါတယ်။ထန်းပင်ကို ခုတ်လှဲပြီး နှစ်ရက် အတွင်း အချောသပ်ရွေပေါ်ထိုးပြီး ပေါ်လစ်အရောင် တင်ဆီသုတ်လိုက် ရင် အင်မတန်လှပပါတယ်။ အမြင့် ခြောက်ပေ၊ ခုနစ်ပေလောက် အမြင့်ရဲ့ ထိပ်ဝကို အလယ်မှ ထွင်းပြီး ဟိုတယ်ကြီး နှင့် အိမ်ခြံဝင်း မြက်ခင်းပြင်တွေမှာ အလှပန်းအိုးအဖြစ်တခမ်းတနား အသုံးပြုကြသည်ကို တွေ့ဘူး ပါတယ်။ထန်းရည်ချိုဟာ အစာကြေညက်စေပြီး ထန်းရည်ခါးကတော့ဆီးရွှင်စေပါတယ်။ ထန်းပင်မြစ်ကို မီးဖုတ်လို့ဖြစ်စေ၊ပြုတ်လို့ဖြစ်စေ နှစ်ခြိုက်စွာ သုံးဆောင် နိုင်ပါတယ်။ ထန်းရွက်ကို ဇာတာ ဖွဲ့ခြင်း၊ အိမ်မိုးခြင်း၊ ကာခြင်းများပြုလုပ်ပါတယ်။ ထန်းလက်ကို ကုလားထိုင်လုပ်ခြင်း၊ ထန်းပင်စည်ကို အိမ်တိုင်၊ ထုတ်တန်း၊ ရက်မ၊

ကြမ်းခင်းအဖြစ် အိမ်ဆောက်ရာမှာ သုံးကြ ပြီး ထက်ခြမ်းခွဲပြီး ရေတံလျှောက်၊ နွားစားခွက်လဲ လည်း လုပ်နိုင် ပါသေးတယ်။ ထန်းသီးအား ဟင်းလျာ အဖြစ် ချက်ပြုတ်စားသောက်ခြင်းနှင့် မုန့်များတွင် ထည့်သွင်းအသုံးပြုကြ ပါတယ်။

ပင်လယ်ရေကြောင်းမှ ထန်းလျှက်တင်ပို့မှုကိုကြည့်ပါက (၂၀၁၀-၂၀၁၁) ဘဏ္ဍာနှစ်တွင် တန်ချိန် (၁၀၀၀)ကျော်ခန့်၊ (၂၀၁၁-၂၀၁၂) ဘဏ္ဍာနှစ်တွင် တန်ချိန် (၁၀၀၀၀)ကျော်ခန့်၊ ၂၀၁၂-၂၀၁၃ ဘဏ္ဍာနှစ် (ဒီဇင်ဘာလ ၁၄ ရက် နေ့ အထိ) တန်ချိန် (၁၀၀၀)ကျော်ခန့် တင်ပို့ခဲ့ ပြီး ထန်းသီး တင်ပို့မှု ကို ကြည့်ပါ က လည်း (၂၀၁၀-၂၀၁၁) ဘဏ္ဍာနှစ်တွင် တန်ချိန် (၂၀၀)ကျော်ခန့်၊ (၂၀၁၁-၂၀၁၂) ဘဏ္ဍာနှစ် တွင်လည်း တန်ချိန် (၂၀၀)ကျော်ခန့်၊ ၂၀၁၂-၂၀၁၃ ဘဏ္ဍာနှစ် (ဒီဇင်ဘာလ ၁၄ ရက် နေ့ အထိ) တန်ချိန် (၄၈)တန်ခန့် တင်ပို့ခဲ့ကြောင်းတွေ့ရှိရပါတယ်။ထန်းလျှက်ကို မလေးရှားနိုင်ငံ နှင့် ထန်းသီးကို တရုတ်နိုင်ငံတို့ အများဆုံး တင်ပို့သည်ကို တွေ့ရှိရပါတယ်။

ငွေကုန်ကြေးကျသက်သာသော အညာဒေသ၏ ထွက်ကုန်လေးများကလည်း သူ့နေရာနှင့်သူ အသုံးဝင်နေတာမို့လို့ တန်ဖိုးမြှင့် ထုတ်ကုန်အဖြစ် ပြုပြင်ထုတ်လုပ် တင်ပို့ရောင်းချနိုင်ရေး ကြိုးပမ်း ဆောင်ရွက်သွားရမည်ဖြစ်ပြီး သဘာဝသစ်တောတွေဟာ ရာသီဥတုအတွက် အင်မတန် အရေးပါသဖြင့် စိုက်ပျိုးရေး၊စီးပွားရေး၊လူမှုရေး၊ကျန်းမာရေး ရေရှည်တည်တံ့စေရေးအတွက် ထန်းပင်အိုများခုတ်လှဲနေသည့် နေရာများတွင်ထန်းပင်သစ်များကိုလည်းအစားထိုးဖြည့်စွက်စိုက်ပျိုးသင့်ပါတယ်။ထန်းပင်ကို ဧကဖွဲ့ စိုက်ပျိုးနိုင် သလို လယ်၊ယာ၊ အိမ်ခြံ များတွင် ခြံစည်းရိုးတစ်လျှောက် မြေနေရာသီးသန့်မယူဘဲ စိုက်ပျိုးနိုင်သဖြင့် ခြံစည်းရိုးမှ ဝင်ငွေရအောင် စိုက်ပျိုးနိုင်သော နှစ်ရှည်သီးနှံပင် တစ်မျိုးလည်းဖြစ်ပါတယ်။

အညာဒေသမှာ ရိုးရာအစားအစာအဖြစ် ထမင်းစားပြီးတိုင်း အချိုတည်းလေ့ရှိသော ရိုးရာမုန့်များ အတွင်း ထည့်သွင်းပြုလုပ်ရသော ချိုမြိန်သောအရသာရှိသည့် ထန်းလျှက်များကို ပြည်တွင်းစားသုံးမှုသာမက ပြည်ပသို့တင်ပို့ခြင်းဖြင့် ဝင်ငွေရရှိလျှက်ရှိပါတယ်။ ထန်းရည်အားကျိုချက်၍ ထန်းလျှက်ပြုလုပ်ရာတွင် ရိုးရာနည်းများအတိုင်း ထုတ်လုပ်နေခြင်းဖြစ်ရာ အရည်အသွေးမြှင့် ( Value Added ) ထုတ်လုပ်တင်ပို့နိုင်ရေး စက်ကရိယာနှင့် နည်းပညာများ ပံ့ပိုးပေးရန် အလုပ်ရုံဆွေးနွေးပွဲတစ်ခုအား ရန်ကုန်မြို့တွင် ကျင်းပပြုလုပ်ခဲ့ ကြောင်းသိရှိရသဖြင့် ရိုးရာထုတ်လုပ်မှုမှ ခေတ်မီစက်ကရိယာများဖြင့် အဆင့်မီထုတ်လုပ်နိုင်တော့မည့်                                                                         အလားအလာရှိနေပြီဖြစ်ရာ ပြည်တွင်းစားသုံးရုံသာမက နိုင်ငံခြားဝင်ငွေပါ ပိုမိုတိုးတက် ရှာဖွေပေးနိုင်လာ တော့မည့် ထုတ်ကုန်တစ်မျိုးဖြစ်ပါကြောင်း သတင်းကောင်း ရေးသား တင်ပြလိုက်ပါတယ်။

 

Source: စိုက်ပျိုးရေးဦးစီးဌာန၊

 

ခင်စန်းဝင်း(DOT)

Pages

Subscribe to ပညာပေး/လှုပ်ရှားမှုများ