နည်းပညာနှင့် တီထွင်ဆန်းသစ်မှု အထောက်အကူပြုစင်တာများနှင့် စီးပွားရေးလုပ်ငန်းရှင်များအတွက် တီထွင်မှုမူပိုင်ခွင့်ဆိုင်ရာ အသိပညာပေးဆွေးနွေးပွဲကျင်းပခြင်း

နေပြည်တော် ၊ မတ်လ ၁၄
 

   နည်းပညာနှင့် တီထွင်ဆန်းသစ်မှု အထောက်အကူပြုစင်တာများနှင့် စီးပွားရေးလုပ်ငန်းရှင်များအတွက် ရည်ရွယ်ကျင်းပပြုလုပ်သော တီထွင်မှုမူပိုင်ခွင့်ဆိုင်ရာ အသိပညာပေးဆွေးနွေးပွဲကို ၂၀၂၄ ခုနှစ်၊ မတ်လ ၁၄ ရက်နေ့နံနက် ၁၀ နာရီအချိန်တွင် နေပြည်တော်ရှိ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၅၂)၊ အစည်းအဝေးခန်းမ၌ Virtual စနစ်ဖြင့် ကျင်းပခဲ့ရာ မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ်က အဖွင့်အမှာစကားပြောကြား ခဲ့သည်။

   အဆိုပါ အသိပညာပေးဆွေးနွေးပွဲသို့ မူပိုင်ခွင့်ဦးစီးဌာန ဒုတိယညွှန်ကြားရေးမှူးချုပ် ညွှန်ကြားရေးမှူးများ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအောက်ရှိ ပြည်ထောင်စုဝန်ကြီးရုံးနှင့် ဦးစီးဌာနများမှ အရာထမ်းအမှုထမ်းများ၊ နည်းပညာနှင့်တီထွင်ဆန်းသစ်မှုအထောက်အကူပြုစင်တာများမှ ဆရာ/ဆရာမများနှင့် ကျောင်းသား/သူများ၊ စုစုပေါင်း (၁၅၀)ဦးခန့်တက်ရောက်ကြသည်။
 

   ဆွေးနွေးပွဲတွင် ညွှန်ကြားရေးမှူးချုပ်က တီထွင်ဖန်တီးမှုများကို မူပိုင်ခွင့်ဥပဒေများအရ အကာအကွယ်ပေးခြင်းအားဖြင့် တီထွင်ဖန်တီးမှုများကို ပိုမိုမြှင့်တင်နိုင်မည်ဖြစ်ပါကြောင်း၊ တီထွင်ဖန်တီးမှုများ၊ နည်းပညာများ အားကောင်းသည့် နိုင်ငံများသည် ကမ္ဘာပေါ်တွင် ရှေ့တန်းမှ ဦးဆောင်သည့် နိုင်ငံများအဖြစ် ရပ်တည်လျက်ရှိပါကြောင်း၊ တီထွင်မှုများနှင့် ဆက်စပ်လျက်ရှိသော တီထွင်ဆန်းသစ်မှုအထောက်အကူပြုစင်တာ (တက္ကသိုလ်၊ ကောလိပ်၊ သုတေသနစင်တာ) များသည် နိုင်ငံဖွံ့ဖြိုးတိုးတက်ရေးအတွက် လွန်စွာအရေးပါသော အခန်းကဏ္ဍမှ ပါဝင်လျက်ရှိပြီး သုတေသနဌာနများနှင့်ချိတ်ဆက်၍ ပူးပေါင်းဆောင်ရွက်အကောင်အထည်ဖော်နိုင်ခြင်းအားဖြင့် တီထွင်မှုမူပိုင်ခွင့်စနစ်များအား ပိုမိုထိရောက်အောင် ဆောင်ရွက်လာနိုင်ပြီးဖြစ်ပြီး၊  တီထွင်မှုမူပိုင်ခွင့်စနစ်ကို သိရှိအသုံးချနိုင်ခြင်းအားဖြင့် တီထွင်ဖန်တီးမှုအသစ်များ၊ နည်းပညာအသစ်များ များစွာပေါ်ထွန်းလာနိုင်ပြီး မိမိတို့၏ သုတေသနနှင့် တီထွင်ဖန်တီးမှုများတွင် လက်တွေ့အသုံးချခြင်းအားဖြင့် နိုင်ငံ့စီးပွားရေးဖွံ့ဖြိုးတိုးတက်လာမည် ဖြစ်ပါကြောင်းပြောကြားခဲ့သည်။

   ဆက်လက်၍ မူပိုင်ခွင့်ဦးစီးဌာန၊ တီထွင်မှုမူပိုင်ခွင့်ဌာနခွဲမှ ညွှန်ကြားရေးမှူး ဒေါက်တာပွင့်ဖြိုးဝင်းက တီထွင်မှုမူပိုင်ခွင့်စနစ်နှင့်စပ်လျဉ်း၍လည်းကောင်း၊ တီထွင်မှုမူပိုင်ခွင့်ကို အသုံးပြု၍ နည်းပညာအချက်အလက်များရှာဖွေခြင်းနှင့်စပ်လျဉ်း၍လည်းကောင်း ရှင်းလင်းဆွေးနွေးခဲ့ပါသည်။ ထို့နောက် တက်ရောက်လာကြသူများက သိရှိလိုသည်များကို မေးမြန်းခြင်းများအပေါ် သက်ဆိုင်ရာဘာသာရပ်တာဝန်ခံက ပြန်လည်ရှင်းလင်းဖြေကြားခဲ့ပြီး ဆွေးနွေးပွဲကို ရုပ်သိမ်းခဲ့ကြောင်း သတင်းရရှိသည်။