မြန်မာနိုင်ငံ၊ ကုန်သွယ်ရေးဦးစီးဌာနနှင့် တရုတ်နိုင်ငံ၊ လင်ချမ်းမြို့ မြို့တော်ဝန်ဦးဆောင်သည့် ကိုယ်စားလှယ်အဖွဲ့တို့အကြား စီးပွားရေးနှင့် ကုန်သွယ်ရေးကိစ္စရပ်များ ပိုမိုမြှင့်တင်နိုင်ရေး ညှိနှိုင်းအစည်းအဝေး အောင်မြင်စွာ ကျင်းပပြီးစီး

Tue, 03/21/2023 - 11:17 -- Dotbilateral

     မြန်မာနိုင်ငံ၊ ကုန်သွယ်ရေးဦးစီးဌာနနှင့် တရုတ်နိုင်ငံ၊ လင်ချမ်းမြို့၊ မြို့တော်ဝန်ဦးဆောင် သည့် ကိုယ်စားလှယ်အဖွဲ့တို့အကြား စီးပွားရေးနှင့် ကုန်သွယ်ရေးကိစ္စရပ်များ ပိုမိုမြှင့်တင်နိုင်ရေး ညှိနှိုင်းအစည်းအဝေးတစ်ရပ်အား ကုန်သွယ်ရေးဦးစီးဌာန ညွှန်ကြားရေးမှူးချုပ် ဦးမြင့်သူရနှင့် တရုတ်နိုင်ငံ၊ လင်ချမ်းမြို့၊ မြို့တော်ဝန် Mr. Du Jianhui တို့ ဦးဆောင်၍ ၂၀၂၃ ခုနှစ်၊ မတ်လ (၂၁) ရက်နေ့၊ နေ့လယ် (၁၄:၃၀) နာရီ အချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃) နေပြည်တော်၌ ကျင်းပပြုလုပ်ခဲ့ပါသည်။

     အစည်းအဝေးအား မြန်မာ-တရုတ် နှစ်နိုင်ငံအကြား စီးပွားရေးနှင့် ကုန်သွယ်ရေးကိစ္စရပ်များအား ပိုမိုမြှင့်တင်ဆောင်ရွက်ရန် ရည်ရွယ်၍ ကျင်းပခြင်းဖြစ်ပါသည်။      

     အစည်းအဝေးသို့ မြန်မာနိုင်ငံဘက်မှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးမြင့်သူရနှင့်အတူ မြန်မာကုန်သွယ်မှုမြှင့်တင်ရေးအဖွဲ့ ညွှန်ကြားရေးမှူးချုပ် ဒေါ်နော်မူတာကပေါ၊ ကုန်သွယ်ရေးဦးစီးဌာန ဒုတိယညွှန်ကြားရေးမှူးချုပ်၊ ညွှန်ကြားရေးမှူးများနှင့် ဘာသာရပ်တာဝန်ခံများ တက်ရောက်ပြီး  တရုတ်နိုင်ငံဘက်မှ လင်ချမ်းမြို့၊ မြို့တော်ဝန် Mr. Du Jianhui ဦးဆောင်သည့် ကိုယ်စားလှယ် (၈) ဦးတို့ တက်ရောက်ခဲ့ကြပါသည်။

              အစည်းအဝေးတွင် (၄) ကြိမ်မြောက် မြန်မာ (လားရှိုး) - တရုတ် (လင်ချမ်း) နယ်စပ်စီးပွား ကုန်စည်ပြပွဲအောင်မြင်စွာ ကျင်းပနိုင်ရေးကိစ္စရပ်များ၊ တရုတ် - မြန်မာ နှစ်နိုင်ငံအကြား တစ်ဆင့်ဖြတ်သန်းကုန်သွယ်မှုဆိုင်ရာသဘောတူညီချက်ရေးထိုးနိုင်ရေး နှစ်ဦးနှစ်ဘက်မှတွန်းအားပေးဆောင် ရွက်နိုင်ရေးကိစ္စရပ်များ၊ တရုတ် - မြန်မာ နယ်စပ် ချင်းရွှေဟော်ဂိတ်မှ ဖြတ်ကျော်သည့် တတိယနိုင်ငံ၏ ကုန်ပစ္စည်းကုန်သွယ်မှုဆိုင်ရာ အဆင်ပြေချောမွေ့ရေး ဆောင်ရွက်ရန်ကိစ္စရပ်များ၊ မိန့်တိန်-ချင်းရွှေ ဟော် နယ်စပ်ဂိတ်ကုန်သွယ်မှုမြှင့်တင်နိုင်ရေးကိစ္စရပ်များအပြင် မြန်မာ-တရုတ် နှစ်နိုင်ငံအကြား စီးပွားရေးနှင့်ကုန်သွယ်ရေးကိစ္စရပ်များ ပိုမိုမြှင့်တင်နိုင်ရေးကိစ္စရပ်များအား ဆွေးနွေးခဲ့ကြပြီး အစည်း အဝေးကို ၁၆ : ၀၀  နာရီအချိန်တွင် အောင်မြင်စွာ ရုပ်သိမ်းခဲ့ပါသည်။