ဒေသထွက် ၀ဥသီးနှံ ဈေးဆက်ကောင်းနိုင်

Wed, 08/21/2019 - 08:52 -- admin_ygn

       ကရင်ပြည်နယ်သည် စိုက်ပျိုး ရေးကို အခြေခံသော စီးပွားရေးလုပ်ငန်းများ ဆောင်ရွက်လျက်ရှိရာ စိုက်ပျိုးရေး ကဏ္ဍတွင် ဆန်စပါး၊ ရော်ဘာ၊ သီးနှံ အမျိုးမျိုး စိုက်ပျိုးထုတ်လုပ်လျက်ရှိသည့်အပြင် ဆေးဖက်ဝင်သီးနှံတွင် ပါဝင်သည့် ၀ဥသီးနှံကို စိုက်ပျိုးလျက် ရှိသည်။ စိုက်ပျိုးပြီး တစ်နှစ် သို့မဟုတ် နှစ်နှစ်တွင် ဥများကို  တူးဖော်နိုင်ခြင်း၊ ပြည်ပဈေးကွက်ဝင်  ဖြစ်ခြင်းနှင့်အညီ ဆေးဖက်ဝင် သီးနှံတစ်မျိုးဖြစ်သည့်အတွက် အကျိုးအမြတ်ကို မျှော် ကိုးပြီး စိုက်ပျိုးလျက်ရှိရာ တစ်နှစ်ထက်တစ်နှစ် ဈေးပိုရလာပြီး အရောင်းအ၀ယ်လည်း သွက်ခဲ့ကြောင်း သိရသည်။

       ၀ဥသီးနှံကို မိုးဦးမေလတွင်စတင် စိုက်ပျိုးပြီး   မိုးအကုန်  ဆောင်းရာသီ နိုဝင်ဘာလနှင့် ဒီဇင်ဘာလတွင် မြေ ပေါ်ပင်ပိုင်းညှိုးခြောက်သွားချိန်မှာ တူး ဖော်ကြောင်း ဈေးကွက်အတွင်းမှ သိရသည်။  ၀ဥသီးနှံသည် ပြည်ပ ၀ယ်လို အားရှိပြီး နိုင်ငံခြားဝင် ငွေရရှိနိုင်သော သီးနှံဖြစ်သည့်အတွက် ၀ဥ၀ယ်လိုအားမှာလည်း တစ်နှစ်ထက် တစ်နှစ် ပိုမို တိုးတက်လာပြီး ဈေးကောင်းလည်းရရှိလာကြောင်း ကရင်ပြည်နယ် မြ၀တီခရိုင်တွင် ၀ဥအ၀ါရောင်မျိုး အား ၀ယ်လက်တွေက အဓိက၀ယ်ယူလျက်ရှိပြီး ၂၀၁၇ နှစ်က ၀ဥ အစို တစ်ပိဿာလျှင် ကျပ် ၂၅၀ မှ ၄၀၀၊ ၀ဥအခြောက် တစ်ပိဿာ လျှင်  ကျပ်  ၄၀၀  မှ  ၆၀၀  အတွင်း အရောင်းအ၀ယ်ဖြစ်ခဲ့သော်လည်း ၂၀၁၈ ခုနှစ်ထွက် ၀ဥအခြောက် တစ်ပိဿာကို ကျပ် ၈၀၀ ဖြင့် စတင်ဈေးဖွင့်ခဲ့ပြီး ဈေးပိတ် ချိန်တွင် ၀ဥအစို တစ်ပိဿာ  ကျပ် ၁၉၅၀၊ ၀ဥအခြောက် တစ်ပိဿာကို ကျပ် ၁၃၂၀ ဈေးအထိ ဈေးကောင်းရပြီး အရောင်းအ၀ယ်ဖြစ်ခဲ့ကြောင်း   ဈေး ကွက်အတွင်းမှ သိရသည်။  ၀ဥသီးနှံ ကို နိုင်ငံတကာတွင် ခေါက်ဆွဲမျှင်၊ ဂျယ်လီ၊ အသားတု၊ ပူတင်း၊ ကော်ဖီ၊ သကြားလုံးများ ပုံစံအမျိုးမျိုးနှင့် စား သောက်ကြကြောင်း ကျန်းမာရေး အတွက်လည်း အထောက်အကူပြုသည့် အပြင် တိုင်းရင်းဆေးနှင့် ခေတ်မီဆေး ၀ါးအဖြစ် ထုတ်လုပ်သုံးစွဲနေကြောင်း သိရသည်။ ဈေးကွက်၌ ၀ဥသီးနှံ ထွက်ချိန် တွင် အ၀ယ်ဒိုင်ခွဲငယ်လေးများ ဖွင့်ပြီး အရည်အသွေးအပေါ်မူတည်ကာ ဈေး ပေးအ၀ယ်ရှိခဲ့ကြောင်း၊ ယခု  ၀ဥသီးနှံ ထွက်ရှိမည့်ကာလတွင်လည်း    နိပွန် ဖောင်ဒေးရှင်းမှ အရည်အသွေးအလိုက် ဈေးပေး  ၀ယ်ယူမည်ဖြစ်ကြောင်း သိရ သည့်အတွက် ၀ဥသီးနှံဈေးဆက်လက် မြင့်တက်ပြီး  အရောင်းအ၀ယ်လည်း သွက်လာနို င်ကြောင်း ဈေးကွက်အတွင်း မှသိရှိရသည်။

 

ခင်မောင်မောင်အုန်း (ဇွဲကပင်)

Local Trade News

Pages