အာဆီယံအဖွဲ့ဝင်နိုင်ငံများမှ ယှဉ်ပြိုင်မှုဥပဒေဆိုင်ရာ လုပ်ထုံးလုပ်နည်းများနှင့် လမ်းညွှန်ချက်များ ပြင်ဆင် ရေးဆွဲရေး အချက်အလက်များအား မျှဝေဆွေးနွေးခဲ့ကြ

Mon, 03/04/2019 - 08:09 -- competition

၂၀၁၉ ခုနှစ်၊ ဖေဖော်ဝါရီလ ၂၆ ရက်နေ့မှ ၂၈ ရက်နေ့အထိ နေပြည်တော်ရှိ သဂ်ဟဟိုတယ်တွင် ကျင်းပပြုလုပ်ခဲ့သည့် “ယှဉ်ပြိုင်မှုဥပဒေဆိုင်ရာ လုပ်ထုံးလုပ်နည်းများနှင့် လမ်းညွှန်ချက်များ ပြင်ဆင်ရေးဆွဲ ရေး” အလုပ်ရုံဆွေးနွေးပွဲတွင် အာဆီယံယှဉ်ပြိုင်မှုအာဏာပိုင်များနှင့် သြစတြေးလျ ယှဉ်ပြိုင်မှုနှင့် စားသုံးသူရေးရာကော်မရှင် (ACCC) မှ အရာရှိများမှ ယှဉ်ပြိုင်မှုဥပဒေဆိုင်ရာ လုပ်ထုံးလုပ်နည်းများနှင့် လမ်းညွှန်ချက်များ ပြင်ဆင်ရေးဆွဲရေး အတွေ့အကြုံများနှင့် မဟာဗျူဟာများကို မျှဝေဆွေးနွေးခဲ့ကြပါသည်။ အဆိုပါအလုပ်ရုံဆွေးနွေးပွဲကျင်းပပြုလုပ်ခဲ့ခြင်းဖြင့် ကမ္ဘောဒီးယား၊ လာအို၊ မြန်မာနှင့် ဗီယက်နမ် (CLMV) နိုင်ငံများအနေဖြင့် ၎င်းတို့၏ယှဉ်ပြိုင်မှုဥပဒေများကို အကောင်အထည်ဖော်ဆောင်ရွက်ရေးနှင့် ပတ်သက် သည့် လုပ်ထုံးလုပ်နည်းများနှင့် လမ်းညွှန်ချက်များကို ပြင်ဆင်ရေးဆွဲရာတွင် ၎င်းတို့၏ ချဉ်းကပ်နည်းလမ်း များ၊ အတွေ့အကြုံများနှင့် စိန်ခေါ်မှုများကို လေ့လာသုံးသပ်နိုင်ခဲ့ပြီး ၎င်းတို့၏ ဒေသဆိုင်ရာပူးပေါင်း ဆောင်ရွက်မှုကိုလည်း ပိုမိုအားကောင်းခိုင်မာစေခဲ့ပါသည်။

(CLMV) နိုင်ငံများသည် ယှဉ်ပြိုင်မှုဥပဒေသစ်ပြဌာန်းရန် သို့မဟုတ် ပြင်ဆင်ရေးဆွဲရန် ဆောင်ရွက် နေကြခြင်းကြောင့် ဤအလုပ်ရုံဆွေးနွေးပွဲမှ အဆိုပါဥပဒေများကို အကောင်အထည်ဖော်ဆောင်ရွက်ရန် အတွက် လမ်းညွှန်မှုပြုနိုင်မည့် နည်းဥပဒေများ၊ လုပ်ထုံးလုပ်နည်းများနှင့် လမ်းညွှန်ချက်များကဲ့သို့သော အရေးကြီးသည့် စာရွက်စာတမ်းများကို ပြင်ဆင်ထုတ်ပြန်နိုင်ရန် လက်တွေ့ကျသည့် အထောက်အပံ့များ ရရှိခဲ့ပါသည်။ ထို့ပြင် ဤအလုပ်ရုံဆွေးနွေးပွဲတွင်ပါဝင်တက်ရောက်သူများသည် ၎င်းတို့၏ အသိ ပညာများနှင့် ကျွမ်းကျင်မှုများကို လက်တွေ့အသုံးချနိုင်ရေးအတွက် နိုင်ငံအလိုက်အုပ်စုဖွဲ့၍ လက်တွေ့ ဆောင်ရွက်မှုများနှင့် အကြောင်းအရာအလိုက် ပိုမိုနက်နဲစွာဆွေးနွေးနိုင်ရေးအတွက် panel sessions များလည်း ပြုလုပ်ခဲ့ပါသည်။

လုပ်ထုံးလုပ်နည်းများနှင့် လမ်းညွှန်ချက်များကို ရှင်းလင်းခြင်းနှင့် အသိပညာပေးမှု မြှင့်တင်နိုင်ရန် အတွက် ပါဝင်ပတ်သက်သူများနှင့် ညှိနှိုင်းတိုင်ပင်ခြင်း၊ ထိရောက်သော ဆက်သွယ်ဆောင်ရွက် ခြင်းတို့၏ အရေးပါပုံတို့အပေါ် ပုဂ္ဂလိကကဏ္ဍ၏ အမြင်များကို ဆွေးနွေးနိုင်ရန်အတွက် နိုင်ငံတကာဥပဒေအကျိုး ဆောင်အဖွဲ့ဖြစ်သည့် Baker & McKenzie ရန်ကုန်ရုံးမှ ကိုယ်စားလှယ်တစ်ဦးနှင့် Melbourne University Law School မှ Dr. Wendy Ng တို့မှလည်း ပါဝင်ဆွေးနွေးခဲ့ကြပါသည်။ အာဆီယံနိုင်ငံများ၏ ယှဉ်ပြိုင်မှုအာဏာပိုင်များမှာ ပိုမိုဖွံ့ဖြိုးတိုးတက်ရေးအတွက် ဆောင်ရွက်လျက်ရှိရာ အနာဂတ်တွင် ၎င်းတို့၏ ယှဉ်ပြိုင်မှုဥပဒေများ အာဏာသက်ဝင်စေရေးလုပ်ငန်းများ အောင်မြင်စေရန်အတွက် ယခုအလုပ်ရုံဆွေးနွေး ပွဲသည် များစွာအထောက်အကူဖြစ်နိုင်ပါသည်။

ဗီယက်နမ်ယှဉ်ပြိုင်မှုနှင့် စားသုံးသူရေးရာကော်မရှင် (VCCA) မှ အလုပ်ရုံဆွေးနွေးပွဲတက်ရောက် လာသည့် ကိုယ်စားလှယ်က “၎င်းတို့၏ ယှဉ်ပြိုင်မှုဥပဒေသစ်မှာ ၂၀၁၉ ခုနှစ် ဇူလိုင်လတွင် အာဏာသက်ဝင်မည်ဖြစ်သောကြောင့် ဤအလုပ်ရုံ ဆွေးနွေးပွဲတွင် ပါဝင်တက်ရောက်ခြင်းမှာ အလွန်ပင် အသုံးဝင် အကျိုးရှိပါကြောင်း၊ ဥပဒေ ထိရောက်စွာ အာဏာသက်ဝင်ရေးအတွက် လက်ရှိအချိန်တွင် အကောင်အထည်ဖော်ဆောင်ရွက်ရေးအမိန့်(၃)ခုနှင့် လမ်းညွှန်ချက်၊ မူဝါဒများစွာ မူကြမ်းရေးဆွဲလျက်ရှိ ပါကြောင်း၊ ဤအလုပ်ရုံ ဆွေးနွေးပွဲမှ ထိုကဲ့သို့သော စာရွက်စာတမ်းများကို အစမှအဆုံးအထိ မူကြမ်း ရေးဆွဲရန်လိုအပ်သည့် အသိပညာဗဟုသုတများနှင့် လက်တွေ့ကျွမ်းကျင်မှုများကို ရရှိခဲ့ပါကြောင်း” ပြောကြားခဲ့ပါသည်။

လာအိုနိုင်ငံမှ အလုပ်ရုံဆွေးနွေးပွဲတက်ရောက်လာသည့် ကိုယ်စားလှယ်ကလည်း “အသစ်ဖွဲ့စည်း ထားသည့် လာအိုယှဉ်ပြိုင်မှုကော်မရှင်သည် stakeholder များအနေဖြင့် ယှဉ်ပြိုင်မှုဥပဒေကို အသေးစိတ် ရှင်းလင်းစွာ ပိုမိုသိရှိနိုင်ရေးအတွက် အကောင်အထည်ဖော်ဆောင်ရွက်ရေး နည်းဥပဒေများနှင့် လမ်းညွှန် ချက်များကို မူကြမ်းရေးဆွဲလျက်ရှိကြောင်း၊ ဤအလုပ်ရုံဆွေးနွေးပွဲမှ ရရှိခဲ့သော အသိပညာဗဟုသုတ များနှင့် အတွေ့အကြုံများကို မိမိတို့ဌာနတွင် တိုက်ရိုက်အသုံးချနိုင်လိမ့်မည်ဖြစ်ကြောင်း” ပြောကြားခဲ့ပါ သည်။

ဤအလုပ်ရုံ ဆွေးနွေးပွဲကို အာဆီယံ-သြစတြေးလျ-နယူးဇီလန် လွတ်လပ်သောကုန်သွယ်မှုဒေသ စီးပွားရေးပူးပေါင်းဆောင်ရွက်မှု အစီအစဉ်အောက်မှ ယှဉ်ပြိုင်မှုဥပဒေအကောင်အထည်ဖော်ရေးအစီအစဉ် (CLIP) အဖြစ် ACCC မှ အာဆီယံအတွင်းရေးမှူးချုပ်ရုံး၏ ထောက်ပံ့ကူညီမှုဖြင့် စီစဉ်ဆောင်ရွက်ခဲ့ ခြင်းဖြစ်ပါသည်။ လက်ရှိအချိန်တွင် ၎င်း၏တတိယမြောက်အဆင့်အဖြစ် CLIP သည် တစ်ဦးတစ်ယောက် ချင်းစီနှင့် အသင်းအဖွဲ့တစ်ခုချင်းစီ၏ လက်တွေ့ကျွမ်းကျင်မှုနှင့် အသိပညာဗဟုသုတများ တိုးတက်စေ ရေးအတွက် အထောက်အပံ့ပေးလျက်ရှိပါသည်။

Source : www.asean-competition.org