ဗီယက်နမ်ကုမ္ပဏီများစွာသည် သီဟိုဠ်သီးအခွံများနှင့် ကြံကြိတ်တ်ဖတ်များကဲ့သို့သော လယ်ယာ ထွက်ကုန် ဘေးထွက်ပစ္စည်းများကို အသုံးပြု၍ တိရစ္ဆာန်စာများ ထုတ်လုပ်ကာ ပြည်ပသို့တင်ပို့ခြင်းဖြင့် တစ်နှစ်လျှင် ဝင်ငွေကန်ဒေါ်လာ သန်းပေါင်းများစွာ ရရှိနေသည်ဟု သိရသည်။ သီဟိုဠ်သီးအခွံမှ ဆီထုတ်၍ ပြည်ပသို့တင်ပို့ရာ ယခင်နှစ်က တန်ချိန် ၆၀၀၀၀ တင်ပို့နိုင်ခဲ့ပြီး ဝင်ငွေကန်ဒေါ်လာသန်း ၅၀ ရရှိခဲ့သည်ဟု Phue Dung Company က ပြောကြားသည်။
ယင်းကုမ္ပဏီသည် Binh Phuoc ပြည်နယ်အခြေစိုက် ကုမ္ပဏီတစ်ခုဖြစ်သည်ဟု သိရသည်။ အဆိုပါ ပြည်နယ်တွင် တစ်နှစ်လျှင် သီဟိုဠ်သီးအခွံတန်ချိန် ၁၀၀,၀၀၀ ကို ပြုပြင်၍ ထုတ်လုပ်နိုင်သော ကုမ္ပဏီ ၁၅ ခုဝန်းကျင်ရှိကြောင်း ၊ သီဟိုဠ်သီးအခွံမှထုတ်သော ဆီကိုလက်ရှိဈေးကွက် ဝယ်လိုအား ပြည့်မီအောင် ဖြည့်ဆည်းပေးနိုင်ခြင်းမရှိသေးကြောင်း ၊ သီဟိုဠ်သီးမှ ဆီထုတ်လုပ်သည့် လုပ်ငန်းသည် သီဟိုဠ်စေ့ ထုတ်လုပ်သည့် လုပ်ငန်းနှင့်အပြိုင် ဖွံ့ဖြိုးတိုးတက်လာသော လုပ်ငန်းတစ်ရပ်ဖြစ်လာကြောင်း သိရသည်။
ယခုအခါ ဗီယက်နမ်ကုမ္ပဏီများသည် သီဟိုဠ်သီးအခွံအပြင် လိမ္မော်ခွံများ ၊ နာနတ်သီးအခွံများနှင့် နဂါးမောက်သီးအခွံများကိုပါ ပြုပြင်ထုတ်ပိုး၍ တိရစ္ဆာန်စာအဖြစ် တင်ပို့ကာ ဝင်ငွေရရှိလျက်ရှိသည်ဟု ဗီယက်နမ်သစ်သီးဝလံနှင့် ဟင်းသီးဟင်းရွက်များအသင်း (Vinafruit) က ပြောကြားသည်။ ဟိုချီမင်းအခြေစိုက် Kim Nghia ကုမ္ပဏီသည် လစဉ်လတိုင်း ကြံကြိတ်ဖတ်များ ၊ နာနတ်သီးအခွံများ ၊ လိမ္မော်သီးအခွံများနှင့် ပီလောပီနံရွက်များမှ ပြုပြင်ထုတ်လုပ်ထားသော တိရစ္ဆာန်စာများကို ကွန်တိန်နာအလုံး (၃၀) ကျော် (ကွန်တိန်နာ တစ်လုံးလျှင် တန်ချိန် ၂၄-၂၆ ဝန်းကျင်လေးသည်) ဖြင့် တင်ပို့ကာ ဝင်ငွေများစွာရလျက်ရှိ ကြောင်း၊ ဂျပန်နိုင်ငံမှ တိရစ္ဆာန်စာအဖြစ် ဝယ်ယူနေကြောင်း သိရသည်။ သိုသော် ဂျပန်နိုင်ငံသည် စားနပ်ရိက္ခာလုံခြုံစိတ်ချရမှုနှင့် သန့်ရှင်းမှုကို အထူးအလေးထားပြီး တင်းကျပ်သော စည်းမျဉ်းများ သတ်မှတ်ထားသဖြင့် ယင်းကုန်စည်များမတင်ပို့မီ သေချာစွာစစ်ဆေးရကြောင်း ၊ ဂျပန်သည် နို့စားနွားများနှင့် အသားစားနွားများအတွက် အစာကို တစ်နှစ်လျှင် ကန်ဒေါ်လာ ၁၀ ဘီလီယံဖိုး အကုန်အကျခံကာ တင်သွင်း လျက်ရှိသော်လည်း ဗီယက်နမ်အနေဖြင့် ယင်းပမာဏ၏ ၁% ကိုပင် ပြည့်မီအောင် တင်ပို့နိုင်ခြင်း မရှိသေး ကြောင်း သိရသည်။
တောင်ကိုရီးယားကလည်း ယင်းသို့သော တိရစ္ဆာန်စာများကို ဝယ်လိုအားမြင့်မားကြောင်း ၊ သို့သော် ဗီယက်နမ် အနေဖြင့် ဝယ်လိုအားကို ပြည့်မီအောင် မစွမ်းဆောင်နိုင်သေးကြောင်း Vinafruit မှ ဒုဥက္ကဌက ပြောကြားသည်။
Source: vietnamnet.vn
Date : 9 July 2012
pa pa