၂၀၂၂ ခုနှစ်၊ ဇွန်လ ၁၂ ရက်နေ့၊ (၁၁:၀၀) နာရီအချိန်တွင် ရန်ကုန်မြို့၊ ကမာရွက်မြို့နယ်ရှိ LOTTE Hotel ၌ ကျင်းပပြုလုပ်ခဲ့သည် မြန်မာနိုင်ငံသားများဘဏ်လီမီတက်၏ နှစ် (၃၀) ပြည့် ပုလဲရတု အခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်း တက်ရောက်အမှာစကားပြောကြားခဲ့သည်။
ပြည်ထောင်စုဝန်ကြီးက အမှာစကားပြောကြားရာတွင် မြန်မာနိုင်ငံသားများဘဏ်ကို ၁၉၉၂ ခုနှစ်မှစတင် ဖွင့်လှစ်ခဲ့ရာယခုအခါ နှစ်(၃၀) ပြည့် ပုလဲရတုသို့ ရောက်ရှိခဲ့ပြီဖြစ်ပါကြောင်း၊ ရန်ကုန် စတော့ချိန်း (YSX) ၌ စာရင်းဝင် အများပိုင်ကုမ္ပဏီတစ်ခုဖြစ်သည် နှင့်အညီ အစုရှယ်ယာရှင်များ၏ ကောင်းကျိုးကို ရှေးရှု၍ အစဉ်တစိုက် ကြိုးစားဆောင်ရွက်သွားရန်နှင့် ပွင့်လင်းမြင်သာ မှုရှိပြီး နည်းစနစ်မှန်ကန်သော ဘဏ်တစ်ခုအဖြစ် ရပ်တည်ဆောင်ရွက်သွားရန် လိုအပ်ပါကြောင်း၊ ထို့အပြင် မြန်မာနိုင်ငံတော်ဗဟိုဘဏ်မှ ချမှတ်ထားသည့် စည်းမျဉ်းစည်းကမ်းများကိုလည်း တိကျစွာလိုက်နာ ဆောင်ရွက်သွားရန် တိုက်တွန်းပြောကြားလိုကြောင်း၊
ဘဏ်လုပ်ငန်းများသည် တိုင်းပြည်စီးပွားရေး၏ အဓိကကျသော အခန်းကဏ္ဍတစ်ခုမှ ပါဝင်နေသည့်အပြင် စျေးကွက်စီးပွားရေးစနစ် ပီပြင်စွာဖော်ဆောင်နိုင်ရန်အတွက် အခြေခံကျသည့် အခန်းကဏ္ဍမှလည်း ပါဝင်နေပါကြောင်း၊ သုံးစွဲသူများ၏ လိုအပ်ချက်များကို စနစ်တကျနည်းလမ်း မှန်ကန်စွာနှင့် ဆောင်ရွက်ပေးပြီး မြန်ဆန်ကောင်းမွန်သော ဝန်ဆောင်မှုများပေးနိုင်ရန် ပိုမိုကြိုးစားသွားကြရန် လိုအပ်ကြောင်း၊ သုံးစွဲသူများ၏ လိုအပ်ချက်များ၏ အဓိကကျသည့် Digital အသွင်ကူးပြောင်းရေးကိုလည်း အရှိန်အဟုန်ဖြင့် ဆက်လက်လုပ်ဆောင်သွားရန် လိုအပ်မည်ဖြစ်ကြောင်း၊ ဘဏ်၏ ဒီဂျစ်တယ် စနစ်ကို Upgrade ပြုလုပ်ပြီး Customer များ အသုံးပြုရာတွင် လွယ်ကူစေရေးနည်းလမ်းများ ရှာဖွေဆောင်ရွက်သွားရန်လိုအပ်ပါကြောင်း ပြောကြားခဲ့သည်။
ထို့နောက် မြန်မာနိုင်ငံသားများဘဏ် ဥက္ကဋ္ဌ ဦးတိုးအောင်မြင့်၊ CEO Mr. Gavinda Gurung နှင့် တာဝန်ရှိသူများက ကြိုဆိုနှုတ်ခွန်းဆက် စကားများ အသီးသီးပြောကြားခဲ့ပြီး ပြည်ထောင်စုဝန်ကြီးနှင့်အတူ တက်ရောက်လာကြသူများက မှတ်တမ်းတင်ဓာတ်ပုံရိုက်ကူးပြီး အခမ်းအနားကို ရုပ်သိမ်း လိုက်ကြောင်း သတင်းရရှိသည်။