နှစ်နိုင်ငံ/လှုပ်ရှားမှုများ

    မြန်မာနိုင်ငံနှင့် အိန္ဒိယနိုင်ငံ၊အရှေ့မြောက်ပိုင်းဒေသတို့အကြား နယ်စပ်ကုန်သွယ်ရေးနှင့် ကုန်သွယ်မှုလွယ်ကူချောမွေ့ရေးဆိုင်ရာကိစ္စရပ်များ ပိုမိုမြှင့်တင်နိုင်ရေး တွေ့ဆုံဆွေးနွေးပွဲအား ကုန်သွယ်ရေးဦးစီးဌာန၊ ညွှန်ကြားရေးမှူးချုပ်နှင့် အိန္ဒိယနိုင်ငံ၊ North Eastern Development Finance Corporation Ltd. (NEDFi) မှ ဥက္ကဋ္ဌနှင့် ဦးဆောင်ညွှန်ကြားရေးမှူးတို့မှ ဦးဆောင်၍ ၂၀၂၃ ခုနှစ်၊ ဖေဖော်ဝါရီလ (၂၃) ရက်နေ့၊ နံနက် (၁၀:၃၀) နာရီအချိန်တွင် ရုံးအမှတ် (၃) ၊ နေပြည်တော်၌ ကျင်းပပြုလုပ်ခဲ့သည်။

    မြန်မာနိုင်ငံနှင့် အိန္ဒိယနိုင်ငံတို့အကြား နယ်စပ်ကုန်သွယ်ရေး ပိုမိုမြှင့်တင်နိုင်ရေးအတွက် အခြေခံအဆောက်အဦများဖွံ့ဖြိုးတိုးတက်‌အောင် ဆောင်ရွက်ခြင်းဖြင့် နယ်စပ်ဒေသတွင် ပိုမိုကောင်းမွန်သည့် စီးပွားရေးအချက်အချာနေရာများ ဖော်ဆောင်နိုင်ရေးကိုရည်ရွယ်၍ ကျင်းပခဲ့ခြင်းဖြစ်ပါသည်။

    တွေ့ဆုံဆွေးနွေးပွဲသို့ မြန်မာနိုင်ငံဘက်မှ ကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးဆောင်၍ ဒုတိယညွှန်ကြားရေးမှူးချုပ်၊ သက်ဆိုင်ရာညွှန်ကြားရေးမှူးများနှင့် ဘာသာရပ်တာဝန်ခံများ တက်ရောက်ခဲ့ပြီး အိန္ဒိယနိုင်ငံဘက်မှ North Eastern Development Finance Corporation Ltd. (NEDFi) မှ ဥက္ကဋ္ဌနှင့် ဦးဆောင်ညွှန်ကြားရေးမှူး Mr. V. Poduri ဦးဆောင်၍ ကိုယ်စားလှယ် (၁၀) ဦးတို့ တက်ရောက်ခဲ့ကြသည်။

      တွေ့ဆုံဆွေးနွေးပွဲတွင် နှစ်နိုင်ငံအကြား နယ်စပ်ကုန်သွယ်ရေးတွန်းအားပေး ဆောင်ရွက် မည့် ကိစ္စရပ်များ၊ ကုန်းကြောင်း၊ ရေကြောင်း၊ လေကြောင်း၊ ရထားအပါအဝင်လမ်းပန်း ဆက်သွယ်ရေး အခြေခံအဆောက်အဦများဖွံ့ဖြိုးတိုးတက်အောင် ဆောင်ရွက်နိုင်ရေးကိစ္စရပ်များ၊ အိန္ဒိယနိုင်ငံအနေဖြင့် မြန်မာနိုင်ငံသို့တင်ပို့နိုင်မည့် အလားအလာကောင်းသည့် ကုန်စည်များ၊ အိန္ဒိယနိုင်ငံသို့ နယ်စပ်မှတဆင့် ကုန်စည်ပိုမိုတင်ပို့နိုင်ရေးအတွက် ပို့ကုန်ကန့်သတ်ချက်များ ဖြေလျော့ပေး‌ရေး ကိစ္စရပ်များ၊ မြန်မာနိုင်ငံသို့ (၂) ဘီးယာဉ်၊ (၃) ဘီးယာဉ်အပါအဝင် လျှပ်စစ်ကားတင်သွင်းမှု၊ ရင်းနှီးမြှုပ်နှံမှုနှင့် ကုန်သွယ်မှုလွယ်ကူချောမွေ့စေရေးအတွက် ဆောင်ရွက်လျက်ရှိသည့် ကိစ္စရပ်များအား ဆွေးနွေးခဲ့ကြပြီး အစည်းအဝေးအား နေ့လယ် (၁၂:၀၀) နာရီအချိန် တွင် အောင်မြင်စွာ ရုပ်သိမ်းခဲ့ကြောင်း သတင်းရရှိသည်။

မြန်မာ(မူဆယ်)-တရုတ်(‌ရွှေလီ) နယ်စပ်စီးပွားရေးပူးပေါင်းဆောင်ရွက်မှုဇုန် တည်ထောင် အကောင်အထည်ဖော်ရေးဆိုင်ရာနှစ်နိုင်ငံဒေသအဆင့်လုပ်ငန်းအဖွဲ့၏ တတိယအကြိမ်အစည်း အဝေးကို ၂၀၂၂ ခုနှစ်၊ နိုဝင်ဘာလ (၂၄)ရက်နေ့တွင်  နေပြည်တော်၊ စီးပွားရေးနှင့်ကူးသန်းရောင်းဝယ် ရေးဝန်ကြီးဌာန၊ကုန်သွယ်ရေးဦးစီးဌာန နှင့် တရုတ်နိုင်ငံဘက်မှ ယူနန်ပြည်နယ်၊ ကူးသန်းရောင်းဝယ်ရေး ဌာနတို့အကြား ဗီဒီယိုကွန်ဖရင့်စနစ်ဖြင့် အောင်မြင်စွာကျင်းပခဲ့ပါသည်။

            အဆိုပါအစည်းအဝေးကိုမြန်မာနိုင်ငံဘက်မှကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးမြင့်သူရနှင့် တရုတ်နိုင်ငံဘက်မှ ယူနန်ပြည်နယ်၊ ကူးသန်းရောင်းဝယ်ရေးဌာန၊ ညွှန်ကြားရေး မှူးချုပ် Mr.Li Chenyang  တို့မှဦးဆောင်၍ ကျင်းပပြုလုပ်ခဲ့ကြပါသည်။ အစည်းအဝေးသို့ ကုန်သွယ်ရေးဦးစီးဌာနမှ ဒုတိယညွှန်ကြားရေးမှူးချုပ် ဦးဝင်းလွင် ၊ ဒုတိယညွှန်ကြားရေးမှူးချုပ် ဦးသိန်းထွန်းဦး၊  နှစ်နိုင်ငံ ဒေသအဆင့် လုပ်ငန်းအဖွဲ့ဝင် အဆင့်မြင့်အရာရှိကြီးများ ၊ ကူမင်းမြို့ရှိ မြန်မာကောင်စစ်ဝန်ချုပ်၊မူဆယ်(၁၀၅)မိုင်ကုန်သွယ်ရေးဇုန်၊ ညွှန်ကြားရေးမှူး နှင့် ကူမင်းမြို့ရှိ မြန်မာစီးပွားရေးသံမှူး တို့ပါဝင်တက်ရောက်ခဲ့ပါသည်။ ထို့အပြင် အစည်းအဝေးသို့ ရန်ကုန်မြို့ အခြေစိုက် ၊ တရုတ်သံရုံး မှ မြန်မာနိုင်ငံဆိုင်ရာ တရုတ်စီးပွားရေးသံမှူး Mr.Tan Shufu မှလည်း ပါဝင်တက်ရောက်ခဲ့ပါသည်။

အစည်းအဝေးတွင်မြန်မာ-တရုတ်နယ်စပ်စီးပွားရေးပူးပေါင်းဆောင်ရွက်မှုဇုန်တည်ထောင် အကောင်အထည်ဖော်ရေးဆိုင်ရာကိစ္စရပ်များနှင့်စပ်လျဉ်း၍ ဖြစ်ပေါ်တိုးတက်မှုအခြေအနေများ၊ ရှေ့ဆက်ဆောင်ရွက်သွားမည့်အစီအမံများ၊ အကြံပြုချက်များ၊ ဒေသအဆင့် လုပ်ငန်းအဖွဲ့ အစည်း အဝေးများအား ပုံမှန်ကျင်းပနိုင်ရေး ကိစ္စရပ်များကို အသေးစိတ်ညှိနှိုင်း ဆွေးနွေးခဲ့ကြပါသည်။

ဆက်လက်၍ ဒေသအဆင့်လုပ်ငန်းအဖွဲ့၏စတုတ္ထအကြိမ်အစည်းအဝေး ကို ၂၀၂၃ ခုနှစ်၊ ဖေဖော်ဝါရီလအတွင်း ကျင်းပနိုင်ရေး ညှိနှိုင်းဆောင်ရွက်သွားရန် နှစ်ဘက်စလုံးမှ သဘောတူညီ ခဲ့ကြကြောင်းနှင့် အစည်းအဝေးသည် မြန်မာ-တရုတ် နှစ်နိုင်ငံ၏ အစဉ်အလာကောင်းခဲ့သော ချစ်ကြည်ရင်းနှီးမှုကို ပိုမိုခိုင်မာစေပြီး နယ်စပ်ဒေသနှင့် နယ်စပ်နေပြည်သူများ အကျိုးစီးပွားပိုမို တိုးတက်လာစေရန်အတွက် နယ်စပ်စီးပွားရေးပူးပေါင်းဆောင်ရွက်မှုဇုန်များ အကောင်အထည်ဖော် ဆောင်ရွက်နိုင်ရန်အတွက် များစွာအထောက်အကူပြုသည့်အစည်းအဝေးဖြစ်ပါကြောင်း ရေးသား တင်ပြလိုက်ပါသည်။