မူပိုင်ခွင့်စရာဗဟုသုတလက်ကမ်းစာစောင်များ

စက်မှုလုပ်ငန်းနယ်ပယ်တွင် တီထွင်မှုမူပိုင်ခွင့်များသည် အလွန်အရေးပါသော အခန်းကဏ္ဍမှ ပါဝင်လျက်ရှိသည်။ တီထွင်မှုမူပိုင်ခွင့်ဥပဒေအရ တီထွင်သူများသည် ၎င်းတို့၏ တီထွင်မှုများအတွက် အကာအကွယ်များရရှိစေပြီး ဆန်းသစ်တီထွင်မှုများနှင့် အသစ်သစ်သော တီထွင်ဖန်တီးမှုများဖြစ် ပေါ်လာစေရန် အားပေးလှုံ့ဆော်လျက်ရှိသည်။ နည်းပညာတိုးတက်မှုအတွက်လည်း အခြေခံအုတ် မြစ်တစ်ခုအဖြစ် လုပ်ဆောင်ပြီး တီထွင်သူများအား ၎င်းတို့၏ ဖန်တီးမှုများကို သတ်မှတ်ထားသည့် အချိန် အတွင်း သီးသန့်အခွင့်အရေးများပေးဆောင်၍ စီးပွားရေးရင်းနှီးမြှုပ်နှံရန် ကုမ္ပဏီများနှင့် စီးပွား‌ရေး လုပ်ငန်းရှင်များအား ဆွဲဆောင်လျက်ရှိသည်။

တီထွင်မှုမူပိုင်ခွင့်များ၏ အရေးပါမှုသည် တီထွင်သူများ၏ အခွင့်အရေးများကို အကာအကွယ် ပေးရုံသာမက စီးပွားရေးတိုးတက်မှုကို တွန်းအားပေးရာတွင်လည်း လွန်စွာအရေးပါလျက်ရှိပေသည်။ တီထွင်မှုမူပိုင်ခွင့်ရရှိထားသော တီထွင်မှုများသည် ကုမ္ပဏီများအား ရင်းနှီးမြှုပ်နှံမှုများ ပြုလုပ်ရန် ဆွဲဆောင်ခြင်း၊ အလုပ်အကိုင်အခွင့်အလမ်းများ ဖန်တီးပေးခြင်းနှင့် စက်မှုလုပ်ငန်းချဲ့ထွင်ခြင်းတို့ကို လည်း ကူညီပံ့ပိုးပေးသည်။ ဥပမာအားဖြင့် ထိုင်းလူမျိုးတစ်ဦးမှ တီထွင်ခဲ့သော နည်းပညာအား ဂျပန်နိုင်ငံ ကုမ္ပဏီတစ်ခုမှဝယ်ယူ၍ တီထွင်မှုမူပိုင်ခွင့်ရယူကာ စီးပွားရေးရင်းနှီးမြှုပ်နှံမှုများ ပြုလုပ်ခြင်းကြောင့် တီထွင်သူသာမက ရင်းနှီးမြှုပ်နှံသူများပါ အကျိုးအမြတ်များစွာ ရရှိနိုင်ပေသည်။

တီထွင်မှုမူပိုင်ခွင့်များသည် စဉ်ဆက်မပြတ်သော ဆန်းသစ်တီထွင်မှုများကို ဖန်တီးရာတွင် လည်း အခရာကျသောအခန်းကဏ္ဍမှပါဝင်ပါသည်။ စျေးကွက်တွင် အသာရနေစေရန်အတွက် သုတေသနနှင့် ဖွံ့ဖြိုးရေးလုပ်ငန်းများတွင် ကုမ္ပဏီများကို ရင်းနှီးမြှုပ်နှံလာစေရန်လှုံ့ဆော်ပေး၍ တီထွင်သူများကိုလည်း ‌ဈေးကွက်တွင် ယှဉ်ပြိုင်နိုင်စွမ်းရှိသော ဆန်းသစ်တီထွင်နိုင်မှုစွမ်းရည်များ ပေးခြင်းဖြင့် စက်မှုလုပ်ငန်းများတွင် ဦးဆောင်လျက်ရှိစေသည်။

ထို့ပြင် တီထွင်မှုမူပိုင်ခွင့်များသည် အသိပညာများဖြန့်ဝေရာတွင်လည်း အထောက်အကူဖြစ် စေသည်။ တီထွင်မှုများကို အများပြည်သူသိရှိစေရန်ထုတ်ပြန်ကြေညာခြင်းသည် သာမန်တတ်ကျွမ်း သူမှသည် ကျွမ်းကျင်ပညာရှင်များအထိ ယင်းတီထွင်မှုကို သိရှိလုပ်ဆောင်နိုင်ရန် အသိပညာပေးခြင်း သာမက အနာဂတ်ဆန်းသစ်တီထွင်မှုများအတွက် အခြေခံအုတ်မြစ်အဖြစ်လည်း ဆောင်ရွက်ပေးပြီး နောက်ထပ်သော တီထွင်ဖန်တီးမှုများကိုလည်းဖြစ်ပေါ်လာစေပါသည်။ ယင်းတီထွင်မှုမူပိုင်ခွင့်များကို လေ့လာနိုင်စေရန်အတွက် World Intellectual Property Organization(WIPO) ၊ United States Patent and Trademark Office (USPTO) ၊ European Patent Office(EPO) စသော  နိုင်ငံတကာ အဖွဲ့အစည်းများ၏ အင်တာနက်စာမျက်နှာများတွင် မှတ်သားလေ့လာဖတ်ရှုခြင်းဖြင့် မိမိတီထွင်မှု သည် အသစ်ဖြစ်မဖြစ်နှင့် တီထွင်မှုမူပိုင်ခွင့်ရရှိနိုင်ခြင်း ရှိ/မရှိကိုလည်း သုံးသပ်နိုင်ပေသည်။

တီထွင်မှုမူပိုင်ခွင့်များသည် နိုင်ငံတကာပူးပေါင်းဆောင်ရွက်မှုအတွက်လည်း လွန်စွာအ‌ရေးပါ လျက်ရှိသည်။ နိုင်ငံအတွင်း ခိုင်မာသောတီထွင်မှုမူပိုင်ခွင့်စနစ်တစ်ခုကိုထူထောင်ပြီး ပါရီကွန်ဗင်းရှင်း နှင့် World Trade Organization(WTO) ကဲ့သို့သော နိုင်ငံတကာအဖွဲ့အစည်းများ၊ Patent Cooperation Treaty (PCT) ကဲ့သို့သော သဘောတူစာချုပ်များမှ တစ်ဆင့် ပူးပေါင်းဆောင်ရွက်မှုကို လုပ်ဆောင်ခြင်းဖြင့် နည်းပညာဖလှယ်မှုကို မြှင့်တင်နိုင်ပါသည်။ ထို့ပြင် တီထွင်ဖန်တီးမှုများနှင့်ပတ် သက်၍ နိုင်ငံ၏ယုံကြည်စိတ်ချရသော၊ လွယ်ကူသော တီထွင်မှုမူပိုင်ခွင့်စနစ်ကို နိုင်ငံတကာပူးပေါင်း ဆောင်ရွက်ခြင်းဖြင့် နည်းပညာများဖလှယ်နိုင်ခြင်း၊ သတင်းအချက်အလက်များ ဖလှယ်နိုင်ခြင်းဖြင့် တီထွင်ဖန်တီးမှုများအတွက် အထောက်အကူပြုနိုင်ရုံသာမက စက်မှုလက်မှုကဏ္ဍအတွက်လဲ အကျိုး ကျေးဇူးများ ဖြစ်ထွန်းစေနိုင်ပါသည်။

အချုပ်အားဖြင့်ဆိုသော် တီထွင်မှုမူပိုင်ခွင့်များသည် ဆန်းသစ်တီထွင်မှု၊ စီးပွားရေးတိုးတက် မှုနှင့် ရင်းနှီးမြှုပ်နှံမှုများကိုမြှင့်တင်ပေးသည့် စက်မှုလုပ်ငန်းတိုးတက်မှု၏ အခြေခံအချက်များပင် ဖြစ် ပါသည်။ ယနေ့ခေတ်ကဲ့သို့ စက်မှုလုပ်ငန်းများ၏ အခန်းကဏ္ဍ အရှိန်အဟုန်မြှင့် ဆောင်ရွက်လျက်ရှိ ချိန်တွင် မိမိ၏တီထွင်ဖန်တီးမှုများအား တီထွင်မှုမူပိုင်ခွင့်ရယူထားခြင်းဖြင့်  စက်မှုလုပ်ငန်းများတွင် ရင်းနှီးမြှုပ်နှံမှုများ၊ အကျိုးတူပူးပေါင်းဆောင်ရွက်မှုများ၊ စီးပွားရေးအကျိုးအမြတ်များစွာ ဖြစ်ပေါ်စေ ခြင်းကြောင့် တီထွင်မှုမူပိုင်ခွင့်များသည် အရေးပါသော အခန်းကဏ္ဍမှ ပါဝင်လျက်ရှိပါသည်။

မူပိုင်ခွင့်ဦးစီးဌာန

တီထွင်မှုမူပိုင်ခွင့်ဌာနခွဲ

၀၆၇-၃၄၃၀၅၇၅