၂၀၂၂ ခုနှစ်၊ အောက်တိုဘာလ(၁၈)ရက်နေ့၊ မြန်မာစံတော်ချိန် (၁၄:၀၀)နာရီအချိန်တွင် မြန်မာနိုင်ငံနှင့် တရုတ်နိုင်ငံ (ယူနန်ပြည်နယ်၊ တက်ဟုန်းပြည်နယ်ခွဲ)တို့အကြား နှစ်နိုင်ငံနယ်စပ် ကုန်သွယ်မှုအဆင့်မြှင့်တင်နိုင်ရေးနှင့် နှစ်နိုင်ငံနယ်စပ်ဂိတ်ပေါက်တွင် ကွန်တိန်နာဖြင့်သယ်ယူ ပို့ဆောင်ရေးစနစ်ကျင့်သုံးရေးကိစ္စရပ်များနှင့်ပတ်သက်သည့် လုပ်ငန်းညှိနှိုင်းအစည်းအဝေးအား ဗီဒီယိုကွန်ဖရင့်စနစ်ဖြင့် ကျင်းပပြုလုပ်ခဲ့ပါသည်။
အဆိုပါအစည်းအဝေးတွင် မြန်မာနိုင်ငံဘက်မှ ကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးမြင့်သူရ ၊ ဒုတိယညွှန်ကြားရေးမှူးချုပ်များ နှင့် ညွှန်ကြားရေးမှူးများ၊ အကောက်ခွန်ဦးစီးဌာနမှ ဒုတိယညွှန်ကြားရေးမှူးချုပ်၊ မူဆယ်ခရိုင်အုပ်ချုပ်ရေးမှူး ၊ မူဆယ်(၁၀၅)မိုင် ကုန်သွယ်ရေးဇုန်၊ မူဆယ်မြို့မှ သက်ဆိုင်ရာတာဝန်ရှိသူများနှင့် တရုတ်နိုင်ငံဘက်မှ တက်ဟုန်းပြည်နယ်ခွဲ ပြည်သူ့အစိုးရ၊ ပြည်နယ်ခွဲအုပ်ချုပ်ရေးမှူး Mr. Wei Gang ၊ တက်ဟုန်းပြည်နယ်ခွဲကုန်သည်ကြီးများအသင်း မှ ညွှန်ကြားရေးမှူး Mr.Li Qi Gui ၊ ရွှေလီမြို့ ပြည်သူ့အစိုးရ မြို့တော်ဝန် Mr.Shang La Bian နှင့် သက်ဆိုင်ရာ တာဝန်ရှိသူများ တက်ရောက်ခဲ့ကြပါသည်။
ယနေ့ကျင်းပသည့် လုပ်ငန်းညှိနှိုင်းအစည်းအဝေးသည် မူဆယ်-ရွှေလီနယ်စပ်ကုန်သွယ်မှု လွယ်ကူချောမွေ့စေရေးအတွက် ကွန်တိန်နာဖြင့် ကုန်စည်သယ်ယူပို့ဆောင်နိုင်ရေးကို အကောင်အထည်ဖော်ဆောင်ရွက်နိုင်ရေး၊ ကျယ်ဂေါင်ဂိတ်ပြန်လည်ဖွင့်လှစ်နိုင်ရေး၊ မြန်မာ-တရုတ် နှစ်နိုင်ငံအကြား ကျပ်/ယွမ်ဖြင့် ပေးချေမှုစနစ် ပိုမိုအဆင်ပြေချောမွေ့စေရေး၊ မြန်မာလယ်ယာထွက်ကုန် ထောပတ်သီး၊ နာနတ်သီး၊ ကျွဲကောသီး၊ သံပရာသီး၊ ကန်စွန်းဥတို့ကို တရုတ်နိုင်ငံသို့ တရားဝင် တင်ပို့နိုင်ရေးအတွက် တရုတ်နိုင်ငံအကောက်ခွန် အထွေထွေအုပ်ချုပ်မှုအာဏာပိုင်အဖွဲ့ (GACC) မှ အမြန်ဆုံးခွင့်ပြုဆောင်ရွက်ပေးရေး၊ မြန်မာနိုင်ငံဘက်မှ ကြံများ တရုတ်နိုင်ငံဘက်သို့ တင်ပို့သည့် ရာသီရောက်ရှိမည်ဖြစ်၍ ကြံတင်ဆောင်သော ယာဉ်များအား Green Line ပေးကာ တိုက်ရိုက် ဝင်ထွက်စေရေး၊ နယ်စပ်ကုန်သွယ်မှုပြန်လည်တိုးတက်လာစေရေးအတွက် တရုတ်နိုင်ငံဘက်မှ လက်ရှိဆောင်ရွက်လျက်ရှိသော ကိုဗစ်-၁၉ ရောဂါကာကွယ်ထိန်းချုပ်ရေးလုပ်ငန်းစဉ်များကို ဖြေလျှော့ဆောင်ရွက်ပေးသွားရေးကိစ္စများအား နှစ်ဘက်အပြန်အလှန် ညှိနှိုင်းဆွေးနွေး နိုင်ခဲ့ပါသည်။