အင်္ဂါနေ့ ။ ၀၈ ဇန်နဝါရီလ ၂၀၁၃ ၁၆:၄၅
တမူးနယ်စပ် ကုန်သွယ်ရေးစခန်းရဲ့ ထုတ်နုတ် အင်အားဖြင့် ဖွဲ့စည်းထားတဲ့ Mobile Team အဖွဲ့ဟာ စားသုံးသူ အကာအကွယ် ပေးရေး၊ ကုန်သွယ်မှု မြှင့်တင်ရေးနဲ့ တရားမဝင် ကုန်သွယ်မှု လျော့နည်း ပပျောက်ရေး တို့အတွက် တမူး-ကလေး ကားလမ်းမပေါ်ရှိ တမူးမှ ၁၅ မိုင် အကွာ ခွန်မွန်းနွန်ရွာ မှာ ၂ဝ၁၃ ခုနှစ် ဇန်နဝါရီလ ၅ ရက်နေ့က မော်တော်ယာဉ်များ၊ ဆိုင်ကယ်များအား စစ်ဆေး ရှာဖွေမှုများ ပြုလုပ်ခဲ့ ပါတယ်။ ပြည်သူများ စားသုံးရန် မသင့်သော ၇၃ ကီလိုဂရမ် ခန့်ရှိသော ကွမ်းပေါင်းထုပ်ကြီး ၂၅ ထုပ်၊ အကောက်ခွန်မဲ့ သယ်ဆောင် လာသော ၁၈ဝ ကီလိုဂရမ် ခန့်ရှိသော စွန်ပလွန်ယို အိတ်ကြီး ၆ အိတ်၊ ပါတိတ် လုံချည် ၂၇၅ ထည်၊ မစီးဖိနပ် ၄၅ ရံ ၊ Sandal Wood တံဆိပ် အမွှေးတိုင် ၁၂ ထုပ်ပါ အထုပ် ကြီး ၁၆ဝ ၊ Sirode Luxe တံဆိပ် အမွှေးတိုင် ၇၂ ထုပ်ပါ အထုပ်ကြီး ၇၆ ထုပ် စုစုပေါင်းခန့်မှန်း သိန်း ၂ဝ ကျော်ဖိုး ကို Mobile Team အဖွဲ့မှ စစ်ဆေး ဖမ်းဆီးရမိ ခဲ့တယ် လို့ သတင်း ရရှိပါတယ်။
ဖမ်းဆီးရမိသော အကောက်ခွန်မဲ့ ပစ္စည်းကိုမူ အခွန် တိမ်းရှောင်၍ တစ်နိုင်တစ်ပိုင် ရောင်းဝယ်နေသူများ အား တရားဝင် လမ်းကြောင်း ပေါ်သို့ ရောက်ရှိပြီး ရောင်းဝယ် လာတတ်ရန် ပညာပေး ကာလ ဖြစ်တဲ့အတွက် လိုင်စင် ပြုလုပ်ပြီး အခွန် ပေးဆောင်စေကာ ပြန်လည် ထုတ်ပေးသွားမှာ ဖြစ်ကြောင်းနဲ့ စားသုံးရန် မသင့်သော ကွမ်းပေါင်း အထုပ်များအား လုပ်ထုံး လုပ်နည်းများ နဲ့အညီ ဖျက်ဆီး ဆောင်ရွက် သွားမယ်လို့ သိရှိရပါတယ်။
လှဌေး (တမူး )
တနင်္ဂနွေနေ့ ။ ၀၆ ဇန်နဝါရီလ ၂၀၁၃ 21:15 PM
စားသုံးသူ အကာအကွယ် ပေးရေးနဲ့ တရားမဝင် ကုန်သွယ်မှုများ တားဆီး ထိန်းချုပ်ရန် မူဆယ်ဘက်နဲ့ မြဝတီဘက် ကုန်သွယ်မှု လမ်းကြောင်းပေါ်မှာ Mobile Team အဖွဲ့ -၂ ဖွဲ့ တာဝန်ချထား ဆောင်ရွက်ပေးနေပြီး စခန်း ထုတ်နုတ် အင်အားနဲ့ စစ်ဆေးမှုများကိုလည်း ဆောင်ရွက်လျက် ရှိပါတယ်။
မြဝတီ-ရန်ကုန် လမ်းကြောင်းပေါ်ရှိ Mobile Team အဖွဲ့-၂ ရဲ့ ဒီဇင်ဘာလ ၂၅ ရက်မှ ၃၁ ရက်ထိ ကာလ အတွင်း ဒိုက်ဦး-မြစ်ကျိုး၊ လမ်းသစ် လမ်းဟောင်း လမ်းဆုံမှာ စားသုံးသူ အကာ အကွယ်ပေးရေး၊ တရားမဝင် လိုင်စင်မဲ့ ကုန်ပစ္စည်းများနဲ့ ကန့်သတ် ကုန်ပစ္စည်းများအား Spot Check စနစ်နဲ့ တားဆီး ရှာဖွေ စစ်ဆေးမှုများ ပြုလုပ်ရာမှာ ယာဉ် ၁၂၆ စီးပေါ်မှ နို့စိမ်း၊ အုန်းနို့ဘူး၊ စားဆီ၊ ခရုဆီ၊ ကြာဆံပြာ၊ ပဲနို့၊ ငံပြာရည်၊ ငါးသေတ္တာဘူး၊ အသားတု၊ အချိုမှုန့်၊ မုန့်၊ ဝေဖာ၊ သကြားလုံး၊ ချောကလက်၊ ကွတ်ကီး၊ Lipo အချိုရည်၊ Dec Do အချိုရည်၊ ဒူးရင်းသီး၊ ပန်းသီး စတဲ့စားသောက် ကုန်များ၊ မျက်နှာသုတ်ပုဝါ၊ ဂျာစီပိတ်၊ အင်္ကျီ၊ ဖိနပ်၊ နိုင်လွန်/ ချည်စများ၊ အလှကုန် (ခေါင်းလျှော်ရည်၊ နှုတ်ခမ်းနီ၊ Hair Coat)၊ ပလပ်စတစ်ဖျာ၊ ကလေး မွေ့ယာ၊ မီးပူ၊ ထမင်းပေါင်းအိုး၊ Laptop၊ TV စင်၊ ရေအေးစက်၊ အကြော်အိုး၊ ၂ ပေ မီးချောင်း စတဲ့ လျှပ်စစ် ပစ္စည်းများနဲ့ ဆက်စပ် ပစ္စည်းများ၊ သစ်ခွ၊ ကားတံခါး၊ မီးခွက်၊ ကားရှဲလ်၊ ဂီယာ Box စတဲ့ ကားဆက်စပ် ပစ္စည်းများ၊ Handset ၊ PVC ပေါင်ဒါ၊ ကော်ဖြတ်စနဲ့ ဘီယာများကို စစ်ဆေး တွေ့ရှိခဲ့ပြီး ခေတ္တ ထိန်းသိမ်းမှုများ လုပ်ဆောင်ခဲ့ပါတယ်။ ဒီပစ္စည်းတွေ ထဲမှာ ကန့်သတ်ကုန်၊ လိုင်စင်မဲ့၊ ဂျူတီမပါ၊ Brand အလွဲတွေ ပါရှိပြီး အချို့ ပစ္စည်းများကိုမူ အခွန်ဆောင်ပြီး ဖြစ်တဲ့ အတွက် ပြန်လည် ပေးအပ်ပြီး ဖြစ်တယ်လို့ သိရပါတယ်။
Mobile Team အဖွဲ့များနဲ့ လက်ရှိ လုပ်ငန်း ဆောင်ရွက်နေမှုများနဲ့ စပ်လျဉ်းပြီး အသိပေး ရှင်းလင်းပွဲကို ဇန်နဝါရီလ ၅ ရက် စနေနေ့ ၁၀းဝ၀ ချိန်မှာ ရန်ကုန်တိုင်း ဒေသကြီး ရုံးခွဲ၊ ပဉ္စမထပ် ညီလာခံ ခန်းမမှာ နယ်စပ် ကုန်သွယ်ရေး ဦးစီးဌာန ညွှန်ကြားရေးမှူးချုပ် ဦးခင်မောင်လေးမှ ဦးဆောင်ပြီး ကျင်းပခဲ့ရာ ဌာနဆိုင်ရာများ၊ ကုန်သည် အသင်း အဖွဲ့များ၊ ကုန်သည်များ၊ ကုန်စည် ပို့ဆောင်ရေးနဲ့ ခရီးသည် ပို့ဆောင်ရေး ယာဉ်အသင်းများမှ တာဝန်ရှိသူများ တက်ရောက်ခဲ့ ကြတယ်လို့ သတင်း ရရှိပါတယ်။
Source: လရ-၂ ပန်
တနင်္ဂနွေနေ့ ၀၆ ဇန်နဝါရီလ ၂၀၁၃ 21:00 PM
ကုန်သွယ်မှု မြှင့်တင်ရေး ဆောင်ရွက်ရာမှာ ကုန်သည် လုပ်ငန်းရှင်များ ပါဝင်မှု နည်းပါး နေသေးကြောင်းနဲ့ လုပ်ထုံး လုပ်နည်းနဲ့ အညီ ကုမ္ပဏီ မရှိသူများကို တစ်ဦးချင်း ကုန်သွယ်ခွင့် ကတ်ပြား (Individual Trading Card) ထုတ်ပေးနိုင်လျှင် ကုန်သွယ်မှု ပိုမို များပြား လာစေမှာ ဖြစ်တဲ့ အတွက် ရခိုင်ပြည်နယ် အတွက်လည်း ITC ထုတ်ပေးရန် မြန်မာ့ လယ်ယာထွက် ကုန်ပစ္စည်း ရောင်းဝယ်ရေး ပြည်နယ်မန်နေဂျာ ဦးစိုးပိုင်က ဒီဇင်ဘာလ အတွင်းက ရခိုင် ပြည်နယ် ကုန်သည်များနဲ့ စက်မှု လက်မှု လုပ်ငန်းရှင်များ အသင်း အစည်း အဝေးခန်းမမှာ ပြုလုပ်တဲ့ ကုန်သွယ်မှု မြှင့်တင်ရေး အစည်းအဝေးမှာ တင်ပြ ဆွေးနွေးခဲ့တယ်လို့ သတင်းရရှိပါတယ်။
ရခိုင် ပြည်နယ် ကုန်သည်များနဲ့ စက်မှု လက်မှု လုပ်ငန်းရှင်များ အသင်း ဥက္ကဌ ဦးရွှေထွန်းအောင် ကလည်း ITC ကတ်နဲ့ ပတ်သက်၍ တစ်ဦးချင်း ကုန်သွယ်ခွင့် ကတ်ပြား အကြောင်း တစ်ပိုင် တစ်နိုင် လုပ်ကိုင် နေကြတဲ့ ကုန်သည်များ ကျယ်ကျယ် ပြန့်ပြန့် သိရှိအောင် အများနဲ့ ထိတွေ့ ချပြရှင်းလင်း ပေးစေလိုကြောင်းနဲ့ တစ်ပိုင် တစ်နိုင် ကုန်သည်ငယ်များ ကုန်သွယ်မှု လုပ်ခြင်း အတွက် ကုမ္ပဏီကြီးများကို ထိခိုက် စေနိုင်မယ် မထင်ကြောင်း တင်ပြ ဆွေးနွေးခဲ့တယ်လို့ သတင်းရရှိ ပါတယ်။
Source: နကသ (စစ်တွေ)စစ်တွေမောင်
ဗုဒ္ဓဟူးနေ့၊ ၀၂ ဇန်နဝါရီလ ၂၀၁၃ 17:00 PM
လှုပ်ရှား ရှာဖွေ တားဆီးရေး အဖွဲ့ Mobile Team နဲ့ စခန်း ထုတ်နုတ် အင်အားဖြင့် ရှာဖွေ တားဆီးရေး အဖွဲ့များနဲ့ နိုဝင်ဘာလ ၁ ရက်မှ ဒီဇင်ဘာလ ၃၁ ရက် အထိ ပညာပေး ကာလ သတ်မှတ် ဆောင်ရွက်ခဲ့ပြီး ၂ဝ၁၃ ခုနှစ် ဇန်နဝါရီလ ၁ ရက်နေ့မှ စပြီး တရားမဝင် အကောက်ခွန်မဲ့ ကုန်ပစ္စည်းများ သယ်ဆောင်မှုကို တွေ့ရှိပါက ဖမ်းဆီး အရေးယူ ဆောင်ရွက်မည် ဖြစ်ကြောင်း၊ ထို့အပြင် ကုန်ပစ္စည်းကို နိုင်ငံတော် ဘဏ္ဍာအဖြစ် သိမ်းဆည်းခြင်း၊ ယာဉ်မောင်း ယာဉ်နောက်လိုက်များကို အရေးယူခြင်း၊ ပစ္စည်း ပိုင်ရှင် ဖော်ထုတ် အရေးယူခြင်း အပြင် သိမ်းဆည်း တန်ဖိုးဟာ ယာဉ်တန်ဖိုး ထက်ဝက်ထက် ကျော်ပါက ယာဉ် သိမ်းဆည်းခြင်းကို ဆောင်ရွက်သွားမှာ ဖြစ်ကြောင်း၊ ဒေသခံ ပြည်သူများ နစ်နာမှု မရှိစေရေး လုပ်ငန်းရှင်များ၊ ကုန်သည်များ၊ မော်တော်ယာဉ် ဂိတ်မှုများကို ဖိတ်ကြားပြီး ချင်းရွှေဟော် နယ်စပ်ကုန်သွယ်ရေး စခန်း တာဝန်ခံ ဒုတိယညွှန်ကြားရေးမှူး ဦးမြင့်ကျော်က ဒီဇင်ဘာလ အတွက် ပြုလုပ်တဲ့ ကုန်သွယ်မှု မြှင့်တင်ရေး အစည်းအဝေးမှာ ချပြရှင်းလင်းခဲ့တာ ဖြစ်ပါတယ်။
ဒီဇင်ဘာလ ၂၆ ရက်နေ့က နိုင်ငံတော် သမ္မတမှ အစိုးရဌာန အဖွဲ့အစည်းများရဲ့ စီမံ အုပ်ချုပ်မှု စနစ် တိုးတက် ကောင်းမွန်အောင် ပြုပြင်ပြောင်းလဲ ဆောင်ရွက်ရေးနဲ့ စပ်လျဉ်းပြီး ပြောကြားခဲ့တဲ့ မိန့်ခွန်းမှာ ပြည်သူ လူထု သဘောထား ဆန္ဒနဲ့ ပြည်သူလူထုရဲ့ အသံကို နားမထောင်ဘဲ၊ မတိုင်ပင်ဘဲ မိမိတို့သဘော အလျောက် ဆောင်ရွက်နေခြင်း၊ မိမိတို့ လုပ်ဆောင်မှုများကို ပွင့်လင်း မြင်သာမှု မရှိခြင်း၊ ပြည်သူ လူထု ကျယ်ကျယ် ပြန့်ပြန့် သိအောင် ချပြမှု မရှိခြင်း၊ ပြည်သူ လူထုက သိလို၍ မေးမြန်းခြင်းနဲ့ ပြည်သူ လူထုရဲ့ လိုအပ်ချက် တောင်းဆိုခြင်းများ အပေါ် တာဝန်ယူ ဖြေရှင်း ပေးမှု မရှိခြင်း၊ ဥပဒေနဲ့ အညီ ဆောင်ရွက်မှု မရှိခြင်းကြောင့် နောက်ဆက်တွဲ အဂတိ လိုက်စားမှု၊ လာဘ်ပေး လာဘ်ယူမှုများ ဖြစ်ပေါ်ခြင်း တို့ကို ထည့်သွင်း ပြောကြားခဲ့ ပါကြောင်း၊ ဒါကြောင့်လည်း ယခုကဲ့သို့ မိမိတို့ လုပ်ကိုင်မဲ့ လုပ်ငန်းစဉ်များကို ပွင့်လင်း မြင်သာမှုရှိအောင် ချပြ ရှင်းလင်းခြင်း ဖြစ်ကြောင်းနဲ့ လုပ်ငန်းရှင်များ အနေနဲ့ အခက်အခဲများကို ပွင့်ပွင့် လင်းလင်း တင်ပြပေးရန် ဖိတ်ခေါ်ေ ပြာကြားမှုကို စခန်း တာဝန်ခံ ဒုတိယညွှန်ကြားရေးမှူး ဦးမြင့်ကျော်က ပြောကြားခဲ့တယ်လို့ သိရပါတယ်။
ဝကိုယ်ပိုင် အုပ်ချုပ်ခွင့်ရ ဒေသ အောက်ရှိ ဒေသမှာ ကြံနဲ့ ရော်ဘာ အဓိကထား အများဆုံး စိုက်ပျိုးလျက်ရှိတဲ့ ဟိုပန် စိုက်ပျိုးရေး ဦးစီးဌာန၊ ဦးစီမှူး ဦးသိန်းဝင်း ကဟိုပန်၊ လားရှိုး မော်တော်ယာဉ် အသင်းအား ဖိတ်ကြားမှသာ Mobile Team အကြောင်း သိရှိရပြီး၊ ယာဉ်အသင်းများ မလိုလား အပ်တဲ့ ပြဿနာများ မဖြစ်ပေါ်စေရေး အတွက် နောင်လာမဲ့ အစည်းအဝေးများမှာ ဝကိုယ်ပိုင် အုပ်ချုပ်ခွင့်ရ တိုင်းအစိုးရမှ တာဝန်ရှိသူများအား ဖိတ်ကြားပြီး သိသင့် သိထိုက်တဲ့ ကိစ္စများ ပြောကြား ပေးစေလိုကြောင်းနဲ့ သို့မှသာ ဒေသရှိ မော်တော်ယာဉ် အသင်း လုပ်ငန်းရှင်များ သိရှိနားလည် သဘောပေါက် စေမယ်လို့ တင်ပြ ဆွေးနွေးခဲ့ ပါတယ်။ တင်ပြချက်နဲ့ စပ်လျဉ်ပြီး စခန်း တာဝန်ခံက နောင်အစည်းအဝေးများမှ ဝကိုယ်ပိုင် အုပ်ချုပ်ခွင့်ရ တိုင်းမှ တာဝန်ရှိသူများကို ဖိတ်ကြား ပေးသွားမယ်လို့ ပြန်လည် ပြောကြားခဲ့တယ်လို့ သတင်း ရရှိပါတယ်။
Source: နကသ (ချင်းရွှေဟော်) CMK
အင်္ဂါနေ့၊ ၀၁ ဇန်နဝါရီလ ၂၀၁၃ 19:30PM
တရားမဝင် ကုန်သွယ်မှုပြုသူများအား အကာအကွယ်ပေးနိုင်ရေး အတွက် Mobile Team အဖွဲ့များ ဖွဲ့စည်း ဆောင်ရွက်ပေးလျက် ရှိပါကြောင်း၊ Mobile Team အဖွဲ့များ စတင်ဆောင်ရွက်တဲ့ နိုဝင်ဘာလနဲ့ အောက်တိုဘာလ ကုန်သွယ်မှု ပမာဏများကို နှိုင်းယှဉ်လျှင် ဒေါ်လာ ၂၆ သန်းခန့် ပိုမို တိုးတက်လာကြောင်း၊ ပို့ကုန်ပိုင်းမှာ ဒေါ်လာ ၆ သန်းခန့် ပိုမိုမှုဟာ Mobile Team ဆောင်ရွက်မှုကြောင့်လို့ မဆိုသာပေမဲ့ သွင်းကုန်ပိုင်းမှာ ဒေါ်လာ သန်း ၂ဝ ခန့် ပိုမို လာခြင်းကတော့ Mobile Team ကြောင့် ဆိုတာသိသာ ပါကြောင်း၊ မူဆယ် ၁ဝ၅ မိုင် နယ်စပ်ကုန်သွယ်ရေး စခန်း တာဝန်ခံ ဦးဦးဟန်က မူဆယ်မှာ ဒီဇင်ဘာလ အတွက် ကျင်းပတဲ့ ကုန်သွယ်မှု မြှင့်တင်ရေး အစည်းအဝေးမှာ ချပြ ဆွေးနွေးခဲ့တာ ဖြစ်ပါတယ်။ တရားမဝင် ကုန်သွယ်မှု တားဆီးရေး ဗဟိုကော်မတီ ဖွဲ့စည်းမှုကို နိုင်ငံတော် သမ္မတရုံးမှာ အမိန့်ထုတ်ပြန်ပြီး ဖြစ်တယ်၊ နယ်စပ်စခန်းအားလုံး သင်္ဘောဆိပ်၊ လေဆိပ်စတဲ့ တစ်နိုင်ငံလုံး၊ Port အားလုံးကို နိုင်ငံတော် အစီအစဉ်နဲ့ ဆောင်ရွက်သွားမှာ ဖြစ်တယ်။ တရားဝင် ကုန်သွယ်မှုပြုသူ အားလုံး ဈေးကွက်မှာ ယှဉ်ပြိုင် အသာစီး ရရှိစေရေး အတွက် အကာ အကွယ်ပေး ဆောင်ရွက်သွားမှာ ဖြစ်ကြောင်းနဲ့ အရှိန်မရသေး ချိန်မှာ သည်းခံ ပေးစေလိုကြောင်း၊ အရှိန်ရရှိ လာပါက တရားဝင် ကုန်သွယ်မှု ပြုသူများဖက်က အပြည့်အဝ ရပ်တည်ပေး နိုင်မှာ ဖြစ်တယ်လို့ ဦးဦးဟန်က ကုန်သွယ်မှုမြှင့်တင်ရေး အစည်းအဝေးကို တက်ရောက် လာကြတဲ့ ကုန်သည် လုပ်ငန်းရှင်များကို အသိပေး ပြောကြားခဲ့တာ ဖြစ်ပါတယ်။
Source: နကသ (မူဆယ်) ဂန္ဓမာ